Супрацоўнікі Аператыўнай мытні — у гасцях у Беларускага дзяржаўнага ансамбля «Песняры»

25 студзеня, напярэдадні Міжнароднага дня мытніка, супрацоўнікі Аператыўнай мытні сустрэліся з артыстамі Беларускага дзяржаўнага ансамбля «Песняры».

Артысты Беларускага дзяржаўнага ансамбля «Песняры» цёпла прынялі ў сваёй студыі афіцэраў Аператыўнай мытні, з якімі іх звязваюць шматгадовыя сяброўскія адносіны.

Сустрэча пачалася з канцэртнай праграмы і не пакінула нікога абыякавым. Магчымасць праспяваць разам з славутым калектывам была прадастаўлена госцю —старэйшаму інспектару Аператыўнай мытні Канстанціну Карчэўскаму.

— У свой час я скончыў музычную школу па класу скрыпкі. Займаюся вакалам з 1993 года. Творчасцю займаюся практычна ўвесь вольны час. Упэўнена магу сказаць, што супрацоўнікі мытні не толькі прафесіяналы ў сваёй справе, але і рознабакова развітыя асобы. Мы ведаем, цэнім і не забываем культурныя дасягненні нашага народа. Творчасць Уладзіміра Мулявіна — гэта наш нацыянальны здабытак, — падзяліўся з чытачамі партала Выдавецкага дома «Звязда» Канстанцін Карчэўскі.

Пасля імправізаванага выступу Канстанціна чакала яшчэ адна прыемная і адказная падзея ў яго творчай біяграфіі — запіс вакальнай партыі з кампазіцыі «Рушнікі» ў прафесійнай студыі «Песняроў».

У далейшым, пасля ювелірнай працы гукарэжысёра, слухачы змогуць пачуць вядомую кампазіцыю ўжо ў сумесным выкананні салістаў ансамбля і Канстанціна Карчэўскага.

Мастацкі кіраўнік заслужанага калектыву Раман Козыраў правёў экскурсію для гасцей, звярнуўшы ўвагу на музычную апаратуру папярэдніх складаў ансамбля, арыгіналы нотных запісаў, выкананых рукой майстра — народнага артыста СССР, заснавальніка Беларускага дзяржаўнага ансамбля «Песняры» Уладзіміра Мулявіна.