На Міншчыне распачалася акцыя «Мой ліст салдату»

З 25 студзеня па 20 лютага на Міншчыне праходзіць акцыя «Мой ліст салдату» у межах святкавання Дня абаронцаў Айчыны і Узброеных Сіл Рэспублікі Беларусь.

У акцыі бяруць удзел педагогі, навучэнцы, творчыя калектывы ўстаноў агульнай сярэдняй і прафесійнай адукацыі. Матэрыялы падаюцца ў выглядзе малюнка (для дзяцей 6–9 гадоў), ліста салдату (вучні 11–13 гадоў), відэароліка (падлеткі 14–17 гадоў). 

У лісце можна павіншаваць салдата, падзякаваць за службу. Змест залежыць ад фантазіі і таленту ўдзельніка акцыі. Ліст павінен быць аформлены ў электронным выглядзе, аб’ёмам да трох друкаваных лістоў, выкананы ў праграме Microsoft Office Word, шрыфт 14-га памеру, Times New Roman з міжрадковым інтэрвалам 1, у фарматах doc, docx, txt. Дапускаецца і варыянт напісанага ліста ад рукі, але каліграфічным почыркам. Лісты будуць перададзены ваеннаслужачым, якія праходзяць службу на тэрыторыі Мінскай вобласці, і ўручаны ветэранам Вялікай Айчыннай вайны.

Малюнкі можна выконваць у розных тэхніках — акварэль, пастэль, гуаш і г. д. Працягласць відэароліка не павінна перавышаць дзве хвіліны, мінімальнае вырашэнне 1280 на 720 пікселяў. Для здымкі падыдуць смартфоны, планшэты, відэакамеры і іншыя прыстасаванні. Забараняецца кантэнт, інфармацыя экстрэмісцкага накірунку, прапаганда псіхаактыўных рэчываў, ненарматыўная лексіка. Пад кожнай работай павінны быць указаны звесткі пра аўтара, яго прозвішча, імя, узрост, а таксама інфармацыя пра кіраўніка ўстановы адукацыі (яго імя і імя па бацьку, прозвішча, кантактны тэлефон), паштовы адрас навучальнай установы.

Арганізатар акцыі — галоўнае ўпраўленне па адукацыі Мінаблвыканкама. Мерапрыемства ладзіцца з мэтай патрыятычнага выхавання дзяцей і навучэнцкай моладзі, для фарміравання ў падрастаючага пакалення маральных і духоўных якасцей, нацыянальнай самасвядомасці, далейшага развіцця супрацоўніцтва паміж установамі адукацыі і воінскімі часцямі і падраздзяленнямі. Акцыя фінансуецца за кошт абласнога і раённых бюджэтаў.

Таццяна ЛАЗОЎСКАЯ

Прэв’ю: pixabay.com