Вы тут

Юбілеі Леаніда Шчамялёва, Расціслава Янкоўскага і Леаніда Гайдая


З нагоды юбілейных дат на сацыякультурным канале працягваюць успамінаць адметных дзеячаў культуры. Бліжэйшыя выхадныя не сталі выключэннем.


У прыватнасці, 5 лютага, у дзень нараджэння акцёра тэатра і кіно, народнага артыста Беларусі, народнага артыста СССР Расціслава Янкоўскага на «Беларусь 3» убачым мастацкі фільм «Задача з трыма невядомымі» (1979 г., «Беларусьфільм»). У кадры з выдатным акцёрам   Барыс Шчарбакоў, Уладзімір Герасімаў, Тамара Чарнова і іншыя. Гледачы ў кампаніі супрацоўнікаў крымінальнага вышуку змогуць паназіраць за расследаваннем справы абрабавання заводскага касіра. Героі кінастужкі — маёр Дорахаў і лейтэнант Матушкін — павінны цяпер знайсці злачынцаў па нешматлікіх зачэпках і адзіным доказе — андатравым капелюшы, які ўцекачы пакінулі на месцы злачынства... Апынуцца ў атмасферы дэтэктыўнага фільма, убачыць Мінск мінулых гадоў зможаце падчас прагляду кінастужкі рэжысёра Барыса Шадурскага, які пазней палюбіўся гледачам яшчэ і такімі фільмамі, як «Кантрольная па спецыяльнасці» (1981), «Кіроўца аўтобуса» (1983) і г. д.

А вось магчымасць успомніць творчасць кінарэжысёра, сцэнарыста, акцёра, народнага артыста СССР Леаніда Гайдая (30 студзеня споўнілася 100 гадоў з дня нараджэння кінамаэстра) будзе падчас паказу яго мастацкага фільма «Спортлато-82» (1982 г.) у нядзелю на сацыякультурным канале. Эксцэнтрычная камедыя, знятая сорак
гадоў таму, дазволіць ізноў паназіраць за тым, як героі кінастужкі будуць шукаць «згубленае шчасце» на вадзе, на сушы і нават у гарах. Менавіта ў такіх незапланаваных абставінах і выяўляюцца часам зусім новыя характарыстыкі людзей. Тое ж адбылося і з гэтай кампаніяй, а ў выніку кожны застаўся пры сваім... Фільм, дарэчы, стаў лідарам пракату ў год выхаду, сабраўшы на прагляды 55,2 млн гледачоў.

Сёлета спаўняецца 215 гадоў з дня нараджэння паэта, драматурга, тэатральнага дзеяча, класіка беларускай літаратуры Вінцэнта Дуніна-Марцінкевіча. Дакументальны фільм Белтэлерадыёкампаніі з удзелам даследчыкаў творчасці класіка раскажа пра «майстра эпатажу», аднаго з роданачальнікаў новай беларускай літаратуры, які знайшоў сябе ў творчасці, з'яўляючыся практыкуючым юрыстам. Паглядзець на аўтара «Пінскай шляхты», які неяк зазначыў: «Няхай што хочуць гавораць, але ж гэта я паэзію нашага сялянскага люду апрануў у шаты народнай эстэтыкі, увёў на сцэну жыцця і пакінуў у шэрагу твораў айчыннага пісьменства, чым і ганаруся», праз прызму яго біяграфіі, творчага шляху — у «Запісках на палях».

У нядзелю, 5 лютага, на «Беларусь 3» не прапусціце стужку «Фарбы памяці» (БТРК, 2019 г.), прысвечаную народнаму мастаку Беларусі Леаніду Шчамялёву, 100 гадоў з дня нараджэння адзначаецца ў гэты дзень. Ён не марыў быць мастаком, але сустрэча з настаўнікам Марка Шагала і яго пахвала канчаткова пераканала творцу зрабіць свой выбар на карысць мастацтва. А як усё склалася з часам, у што верыў і пра што пераважна выказваўся Леанід Дзмітрыевіч на сваіх палотнах — распавядаюць стваральнікі дакументальнага цыкла. Пасля дакладна захочацца наведацца ў музей, каб па-іншаму паглядзець на работы Леаніда Шчамялёва, у якіх заўсёды знаходзіш глыбіню зместу і прагу да жыцця.

Алёна ДРАПКО

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».