Як трэнерская сям'я Дубровых выхоўвае чэмпіёнаў па тэнісу

«Вы — самая лепшая каманда, без вас нічога не было б», — гэта першыя словы чэмпіёнкі Australian Open 2022 года Арыны Сабаленкі пасля перамогі. Камеры захавалі для гісторыі не толькі яе перамогу, але і слёзы радасці. А камеры, якія здымалі трыбуны, зафіксавалі маладога мужчыну, які таксама не хаваў сваіх слёз. Слёз радасці і гонару не саромеўся Антон Дуброў, які амаль два гады трэніруе першую ракетку Беларусі. 

Трэнерскі шлях Антон Дуброў пачынаў пад крылом дзядулі — вядомага беларускага трэнера Эдуарда Уладзіміравіча Дуброва. З яго вучаніцай Верай Лапко ў якасці спарынг-партнёра Антон упершыню аказаўся на Турніры Вялікага шлема. І гэта быў якраз Адкрыты чэмпіянат Аўстраліі. Антон Дуброў некаторы час быў спарынг-партнёрам многіх членаў нацыянальнай каманды. Супрацоўнічаў з Вольгай Гаварцовай, з якой таксама ездзіў у Аўстралію. Дапамагаў на спаборніцтвах Аляксандры Сасновіч, Вікторыі Азаранка і іншым членам беларускай каманды. А затым Арына Сабаленка запрасіла працаваць толькі з ёй. Пасля спынення супрацоўніцтва з Дзмітрыем Турсуновым тэнісістка спрабавала трэніравацца з нямецкім спецыялістам Дытэрам Кіндльманам, але супрацоўніцтва не склалася. «Антон мяне даўно ведае, ведае мае слабыя кропкі», — растлумачыла тады свой выбар Арына. Трэнер сапраўды даўно ведае спартсменку, ездзіў з ёй на турніры, калі той было 16-17 гадоў. І самае галоўнае — ён змог знайсці падыход да спартсменкі. 

«Ён ніколі мяне не асуджаў, ніколі на мяне не ціснуў, і ён мяне вельмі добра ведае. Ён разумее мяне з паўслова і ведае, калі, што і як можна сказаць, калі трэба павысіць голас, а калі спакойна растлумачыць. І з ім камфортна. Я бачу, што ён увесь час у пошуку. Ён ведае, у якім напрамку развіваць мой тэніс», — дзялілася Арына. 

У мінулым сезоне вялікім галаўным болем для Арыны Сабаленка была падача. Сама тэнісістка адзначала, што прычына няўдач — у галаве. Але ж галава і цела звязаныя. Антон Дуброў лічыць, што калі ёсць нейкія пытанні, то можна прыйсці праз фізіку да галавы і праз галаву да фізікі. Трэнер па фізпадрыхтоўцы Джэйсан Стэйсі прапанаваў адпрацаваць працу з біямеханікам, што, безумоўна, дапамагло Арыне. Давер паміж членамі каманды, правільны трэнерскі разлік спрацавалі ў Аўстраліі. Поспех Арыны Сабаленкі, яе трэнера Антона Дуброва і ўсёй каманды — адна з яркіх старонак гісторыі беларускага тэніса. 

З прозвішчам Дуброў звязана не менш яркая старонка. У 2017 годзе ў фінал Кубка Федэрацыі беларускую каманду прывёў Эдуард Уладзіміравіч Дуброў. Лідарам гэтай каманды была Арына Сабаленка. У фінале 19-гадовая Арына абыграла пераможцу US Open Слоан Стывенс, праўда, потым дастойна ўступіла Кока Вандэвеге. Выступіць у вырашальным парным матчы капітан каманды таксама даверыў Арыне Сабаленка, якая разам з Аляксандрай Сасновіч пасля адзіночных матчаў выйшла на корт супраць Кока Вандэвеге і Шэлбі Роджэрс. На жаль, цуду не здарылася. Трафей дастаўся амерыканскім тэнісісткам. Але засмучаным у беларускай камандзе не быў ніхто, у тым ліку і капітан Эдуард Дуброў. Упершыню ў гісторыі дайсці да фіналу самага прэстыжнага каманднага турніру і даць дастойны адпор моцным сапернікам — гэта ўжо поспех. 

Эдуард Уладзіміравіч аддаў тэнісу больш за паўстагоддзя. У асноўным ён трэніраваў дзяцей, пры чым у 1980-я гады сумяшчаў гэта з працай на заводзе. Па адукацыі Эдуард Уладзіміравіч — інжынер, яго веды спатрэбіліся і ў тэнісе. Эдуард Дуброў змайстраваў спецыяльны станок для перацяжкі струн. «Гэта, вядома, не маё ноу-хау, такі станок быў і ў цэнтры алімпійскай падрыхтоўкі. Але я яго ўдасканаліў: прыдумаў спецыяльны трымальнік, спрасціў механізм нацяжэння. Мой станок лёгка заціскаў струну. Я яго з сабой на ўсе турніры браў. У Турцыі ад жадаючых перацягнуць струны менавіта на маім станку адбою не было, гадзінамі струны перацягваў. Нават нейкую капейчыну зарабляў на гэтым. Станок, між іншым, да гэтага часу працуе», — успамінаў трэнер. 

За час працы дзіцячым трэнерам Эдуард Уладзіміравіч падрыхтаваў 30 майстроў спорту, з іх сем — міжнароднага класа. Гэта Марына Сцец, Надзея Астроўская, Дар’я Кустава, Уладзімір Ігнацік, Лідзія Марозава, Іма Богуш. У 2006 годзе быў капітанам нацыянальнай зборнай. У той камандзе былі Іма Богуш, Ксюша Мілеўская, Віка Емяльяненка. Спачатку на чэмпіянаце Еўропы дзяўчаты прайгралі расіянкам за выхад у чацвёрку. Але прабіліся на чэмпіянат свету, дзе ў фінале зноў сустрэліся з расіянкамі. І на гэты раз чэмпіёнкамі сталі беларускія тэнісісткі. Гэта адна з ключавых перамог беларускага тэніса, якую краіне прынёс трэнер Дуброў.

Пераемнасць пакаленняў, спартыўныя дасягненні даюць надзею, што беларускі тэніс будзе жыць і развівацца, радаваць новымі перамогамі. Арына Сабаленка — спартсменка, якая не спыняецца на дасягнутым. У Дубровых гэта таксама не прынята. Таму чакаем новых перамог гэтага тандэма. А на выпадак складаных сітуацый у іх ёсць мудры вопытны настаўнік. 

Валерыя СЦЯЦКО