Футбалісты Казахстана атрымалі другую перамогу на турніры ў Мінску

У мінскім футбольным манежы сёння праходзяць матчы другога тура традыцыйнага міжнароднага турніру юнацкіх зборных «Кубак развіцця» на прызы асацыяцыі «Беларуская федэрацыя футбола» і Мінгарвыканкама, паведамляе БелТА.

У стартавым паядынку другога гульнявога дня каманда Казахстана (U-17) здабыла другую вікторыю, перамогшы каманду Узбекістана (U-16) са значным лікам 3:0. У першай гульні групы А казахстанскія футбалісты перемаглі каманду Расіі (U-16) з мінімальнай перавагай — 1:0. Сёння расіяне будуць сапернікамі зборнай Беларусі (U-17), якая на старце разграміла ўзбекскіх футбалістаў з вынікам 3:0.

У папярэдняй групе В сёння таксама пройдуць дзве сустрэчы. Зборная Беларусі (U-16) згуляе з камандай Таджыкістана (U-17), а Расія (U-17) сустрэнецца з равеснікамі з Ірана. У першым туры беларусы ўступілі іранцам — 0:4, а таджыкі і расіяне не выявілі пераможцу — нічыя 1:1.

Групавы этап завершыцца 9 лютага, а 11 лютага адбудуцца стыкавыя паядынкі за падагульняючыя месцы.

Для дзвюх беларускіх каманд гэтыя спаборніцтвы з’яўляюцца этапам падрыхтоўкі да кваліфікацыйных турніраў чэмпіянату Еўропы. Зборнай, што складаецца з футбалістаў 2006 года нараджэння, давядзецца з 22 па 28 сакавіка ў Сербіі згуляць у элітным раўндзе юнацкага першынства кантынента 2023 года супраць гаспадароў спаборніцтваў, а таксама равеснікаў з Ізраіля і Босніі і Герцагавіны. Беларуская каманда 2007 года нараджэння восенню пачне адборачны турнір ЧЕ-2024 разам з футбалістамі Шатландыі, Турцыі і Казахстана.

Год таму ўладальнікамі Кубка развіцця сталі футбалісты Ізраіля. Больш за ўсё перамог на рахунку зборнай Расіі, якая пяць разоў заваёўвала трафей (2008, 2010, 2014, 2015, 2017), па чатыры разы поспех святкавалі футбалісты Беларусі (2006, 2007, 2019, 2020) і Украіны (2009, 2012, 2016 і 2018), двойчы лепшай станавілася каманда Бельгіі (2011, 2013), у 2005 годзе не было роўных зборнай Сербіі і Чарнагорыі, у 2021-м перамаглі таджыкі.