Вы тут

Валянціна Быстрымовіч. «Крэатыўныя зубрылкі»


Вясна ўступіла ў свае правы ўжо ў красавіку і набірала абароты. Бярозы зазелянелi ліпкай і яшчэ зусім маленькай лістотай, адхоны чыгункі і наша гара пакрыліся залацістым дываном дзьмухаўцоў. Усё ажывае і радуецца, птушачкі ціўкаюць, а мы ў клопатах: заканчэнне навучальнага года, падрыхтоўка да іспытаў. Восьмы класс як нiяк. 


Фота: pixabay.com

Але вясной ёсць яшчэ адна важная рэч: вясной самы прыгожы загар — залацісты. У чэрвені ўжо такога не будзе, будзе цёмны. Не выглядаць жа нам белымі паганкамі ў пачатку лета з-за экзаменаў! Мы заняліся пошукам аптымальнага рашэння, як сумясціць гэтыя дзве справы.

Каб дасягнуць мэты — яе трэба спачатку абазначыць. І мы вызначылі сваю мэту так: напісалі плакаты «Даеш экзамен!» і павесілі ў сваіх пакоях. Узялі падручнік і адправіліся загараць на дах нашай веранды. Веранда з боку саду, а, значыць, мы не на вачах у суседзяў.

У канцы красавіка яшчэ недастаткова цёпла, але на даху веранды сонца награвае чорны руберойд. Але ветрык халодны з палёў з-за чыгункі. Мы настойліва загаралі, сінеючы ад холаду, і рыхтаваліся да іспыту на даху. Затое ні мух, ні камароў.

Пісалі формулы і доказы тэарэм на руберойдзе крэйдай. Спачатку я, поўзаючы па даху, чарціла і даказвала тэарэму, а потым мая сяброўка Галка. Крэйда дрэнна пісала на руберойдзе, але мы вучыліся і загаралі. Заклала нас баба Маня, яна спытала ў мамы: «А што гэта ў вас дзеўкі на даху на кукішках поўзаюць у негліжэ? Гэта мода такая, ці што іншае?»

Маму шакавала такая вестка, і яна зладзіла нам допыт з прыхільнасцю. А тата злазіў на дах. Спусціўшыся, ён доўга смяяўся: «Дахавыя Піфагоры ўвесь дах спісалі! За вішні перажываць не варта будзе! Птушкі будуць аблятаць і дах, і гарод!»

Аб нашым крэатыўным метадзе вучобы хутка загаварыў увесь завулак, і мы больш на дах не лазілі, туды была накіравана ўвага суседзяў. І ўсяму віной была пільнасць бабы Мані. Вось ужо цікаўная! Не разумее яна крэатыўнага падыходу да пытання.

У суботу мае бацькі з’ехалі ў вёску, а Галка адпрасілася да мяне начаваць, сказала, што будзем вучыць адказы на экзаменацыйныя пытанні па матэматыцы. У нас была новая ідэя — мы даказвалі тэарэмы — пісалі і чарцілі крэйдай на падлозе.

Падлога ў нас прыгожая, чырвона — карычневая з бляскам. Мы размалявалі яе ва ўсіх пакоях. Пісалі і даказвалі, чарцілі і даказвалі. Потым выціралі анучай і зноў пісалі і даказвалі... амаль да раніцы. Калі прыехалі бацькі, мы спалі: Галка на канапе, а я, не распранаючыся, на ложку. Мама вылупіла вочы: «У нас рамонт прайшоў? Столі бялілі?»

Наша бліскучая падлога сапраўды была, як пасля рамонту. «Як хочаце, але вымывайце падлогу да бляску!» — сказала мама і пайшла ў краму. Мы мылі падлогу, некалькі разоў мянялі ваду, але яна заставалася бялявай, цьмянай і з разводамі. Зайшла баба Маня, даведаўшыся, у чым мы правініліся, параіла дадаць у ваду алею і сышла.

Я збегала на кухню і плюхнула паўбутэлькі алею ў вядро з вадой. Бялявыя разводы зніклі і падлога заблішчала, толькі стала ліпкай. Аказваецца, алею трэба было дадаць ўсяго дзве сталовыя лыжкі на вядро, а не літр на паўвядра.

«Цяпер намыльвайце анучы мылам і вымывайце падлогу па кавалачку, пакуль алей не прысох», — сказала засмучаная мама і стала нам дапамагаць. Мы патрацілі шмат часу на мыццё падлогі, але метад выявіўся дзейсным. Можна сказаць, што мы зрабілі адкрыццё, як удасканаліць памяць. Мы ад кропкі да кропкі запомнілі тэарэмы і формулы, якія даказвалі на падлозе. І экзамен здалі выдатна.

Валянціна БЫСТРЫМОВІЧ

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».