Кашаль у дзяцей — справа тонкая, скажа любы дасведчаны доктар. Сапраўды, ніводны іншы сімптом хваробы не мае столькі нюансаў. Сухі і вільготны, глухі і звонкі, моцны і слабы — можна пералічваць велізарную колькасць адценняў. Таму перш чым пачынаць лячыць кашаль, трэба зразумець яго прычыну. Разбіраемся, што варта абавязкова зрабіць, перш чым звяртацца па лекі, і што трэба ведаць аб прэпаратах перад тым, як ісці ў аптэку.
«Лекі ад кашлю» для ўрача гучыць гэтак жа недарэчна, як «лекі ад галавы» ці, напрыклад, «ад паносу». Ніводны доктар не можа прызначыць іх, не ўбачыўшы хворага і не ўяўляючы, аб якім кашлі і пра якую хваробу ідзе гаворка.
— Лечаць не кашаль, а хваробу, якая прывяла да яго ўзнікнення. Ёсць нешта, што раздражняе слізістыя абалонкі дыхальных шляхоў і прыводзіць да ўтварэння макроты і ўзнікнення кашлю, — тлумачыць загадчыца 3-га педыятрычнага аддзялення 3-й гарадской дзіцячай клінічнай паліклінікі Мінска Людміла Кіпцэвіч. — Ліквідуем тое «нешта» — кашаль спыніцца. І тут ёсць некалькі варыянтаў. Пры бактэрыяльнай інфекцыі прызначаюцца антыбіётыкі, пры алергіі — супрацьалергічны прэпарат, пры віруснай інфекцыі проста чакаем, пакуль арганізм сам справіцца з вірусам, або прызначаем супрацьвірусныя прэпараты.
Такім чынам, трэба разумець, што кашаль не пройдзе, пакуль не будзе ліквідавана яго прычына. Калі вы ці ваша дзіця кашляеце таму, што ў пакоі вельмі суха, вы будзеце кашляць да той пары, пакуль не купіце ўвільгатняльнік, альбо пакуль не прыйдзе вясна і не адключыцца цэнтральнае ацяпленне.
У той жа час кашаль істотна пагаршае жыццё хворага дзіцяці і яго сваякоў. Таму проста цярпліва чакаць, пакуль кашаль пройдзе, не варта.
— Кашаль пры ВРЗ — не проста сімптом, які перашкаджае жыць, гэта ключавы механізм актыўнай ачысткі дыхальных шляхоў. Таму галоўны прынцып сімптаматычнага лячэння кашлю — не ліквідаваць яго, а павышаць эфектыўнасць, — кажа ўрач. — Найважнейшая асаблівасць эфектыўнага кашлю — выдаленне назапашанай макроты.
Таму часта надзвычай важна ўплываць на якасць макроты, каб яна стала больш вадкай, лягчэй адыходзіла. І тут важна падтрымліваць рэжым прахалоднага вільготнага паветра, што з'яўляецца прафілактыкай перасыхання макроты і слізістых. Неабходна таксама шмат піць для забеспячэння нармальнай рэалогіі крыві.
— Калі дзіця цёпла адзетае, шмат п'е, у пакоі халаднавата і вільготна, гэта азначае, што амаль 90 % мерапрыем-
стваў, накіраваных на сімптаматычнае лячэнне кашлю, вы ўжо ажыццявілі, — звяртае ўвагу ўрач.
Існуюць дзве асноўныя групы лекавых сродкаў. Першая група — супрацькашлевыя сродкі, якія яго прыбіраюць. Другая — адхарквальныя лекі, якія паляпшаюць кашаль.
Першая група прызначаецца ў сітуацыях, калі кашаль не карысны, не мае фізіялагічнай мэтазгоднасці, не спрыяе выздараўленню, а толькі перашкаджае. Такіх выпадкаў няшмат. Самае відавочнае паказанне — коклюш. Акрамя таго, запаленне вонкавай абалонкі лёгкіх — плеўры. Таксама прэпараты першай групы прызначаюцца пры некаторых надзвычай небяспечных лёгачных хваробах, як правіла, анкалагічных, і пры падрыхтоўцы да правядзення хірургічных або оталарынгалагічных маніпуляцый, калі інструмент уводзіцца ў дыхальныя шляхі.
Адхарквальныя сродкі прызначаюцца, калі трэба вывесці макроту з дыхальных шляхоў.
Асартымент адхарквальных сродкаў, якія ёсць у аптэчнай сетцы і рэальна выкарыстоўваюцца ў дзіцячым узросце, велізарны — некалькі сотняў прэпаратаў у самых разнастайных лекавых формах.
— Паказанні да ўжывання, выбар канкрэтнага прэпарату, працягласць выкарыстання, доза — усё гэта вельмі індывідуальна, вызначаецца дыягназам, цяжарам захворвання, узростам пацыента і самае галоўнае — урачом, — рэзюмуе Людміла Кіпцэвіч.
Алена КРАВЕЦ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
