Вы тут

Валянціна Быстрымовіч. «Можа, сапраўды нешта не так?»


Нaiля прачнулася і паглядзела ў акно. «Сёння пайду да лекара і ўсё дазнаюся», — падумала яна і пакратала вусны. Месяц не праходзіла назойлівае паколванне вуснаў. Спачатку думала — само пройдзе. Потым схадзіла да зубнога. Лекар агледзеў губу і сказаў: «Усё добра».


Фота: pixabay.com

Дзіўнае адчуванне турбавала. Тут яшчэ муж сяброўкі ляжаў у бальніцы з анкалогіяй губы. Аўтаматычна праведзеная паралель падштурхнула схадзіць на прыём да тэрапеўта.

Прыемная бландзінка са стомленымі вачыма доўга слухала, як працуе яе сэрца, мімаходзь спытала:

— А ў зубнога былі?

Нaiля адказала:

— Так, ён не знайшоў праблем. Што гэта можа быць?

— Звярніцеся да ЛОРа, — параіла бландзінка. Яна нешта пісала ў картцы. У паліклініцы ішла праверка, і ёй было не да пацыенткі... Нaiля зразумела, што гэта ўсе рэкамендацыі, і пайшла запісвацца да ЛОРа.

Запісалі на чацвер.

— Як заўсёды, — прамармытала яна, — пасля дожджычка ў чацвер!

Незразумелае адчуванне спараджала страх. Перадумала ўсякае... Можа, я сапраўды не ў сабе? Але паколванне было рэальным і настойліва турбавала нават па начах. Павінен жа хтосьці паставіць дыягназ або ў крайнім выпадку падказаць, куды звярнуцца!

З надзеяй яна ўвайшла ў кабінет да ЛОРа. Сямідзесяцігадовы лекар дрэнна чуў і двойчы перапытаў:

— А ў зубнога былі?

Нaiля адказала:

— Так, ён нічога не знайшоў.

ЛОР таксама не знайшоў. Ён агледзеў вушы, нос і горла і пачаў пісаць у картцы.

— З вушамі ўсё ў парадку? — з сумам спытала Наіля.

— У поўным, — адказаў доктар.

— А што вы там пішаце? — пацікавілася жанчына.

Да каго яшчэ ёй звярнуцца, ён не ведаў.

У даведачным акне паліклінікі на пытанне, да якога спецыяліста звярнуцца, маладзенькая дзяўчына паціснула плячыма і спытала:

— А ў зубнога…

— Была.

— Тады не ведаю, — сказала дзяжурная ў акенцы.

Наiля дрэнна спала, у галаву лезлі нядобрыя думкі. Распавяла пра праблему на працы. Калегі ўдакладнілі: «У зубнога была?» Наiля сцвярджальна кіўнула і паёжылася. Чуллівыя жанчыны паахалі і параілі звярнуцца да «бабкі», уручыўшы ёй пару адрасоў.

Пастаяўшы пад дзвярыма знахаркі, Наiля ўвайшла. «Бабцы» было гадоў сорак — дагледжаная жанчына ў шыкоўна абстаўленым пакоі з абразамі ў чырвоным куце, картамі і свечкамі на стале. Наiля выклала сутнасць пытання. «Бабка» асцярожна спытала:

— У зубнога была?

«Так», — Наіля ўсміхнулася.

— Начаравана, — упэўнена ўстанавіла дыягназ «бабка», расклаўшы карты, якія Наiле прыйшлося зрушваць і дзяліць на купкі.

— Жанчына вядзьмарыла — цёмная такая. Ведаеш, пра каго кажу?

Нaіля не ведала. «Бабка» ўдакладніла:

— Разам з табой працуе! Старэйшая за цябе... ведаеш, пра каго кажу?

Зноў Наiля не ведала…

— На «Т» клічуць, — падказала «бабка». На «Т» з Наiлёй працавала некалькі жанчын.

— Зайздросціць, вось і навядзьмарыла. Я табе вады дам. Своечасова прыйшла!

Ваду Наiля ўзяла: дапаможа, не дапаможа? Разлічылася па ўсталяванай таксе і стала піць ваду нашча — так сказала «бабка».

Паколванне не праходзіла. Успомніла, што ёсць знаёмы неўролаг у адной з гарадскіх бальніц, якой яна калісьці аказала дабрачынную дапамогу на рамонт палаты. 

Уладзімір Уладзіміравіч сустрэў ветліва, прадставіў Наілю жанчыне ў белым халаце, якая сядзела ў яго кабінеце і была падобная на лялечку:

— Гэта наш спонсар!

«Лялячка» ўсміхнулася, запляскала доўгімі вейкамі.

— Ой, як цікава!

— Ну-с, што вас прывяло да нас? З чым завіталі? — Уладзімір Уладзіміравіч важнічаў і відавочна маляваўся перад «лялячкай». Наiля коратка выклала праблему. Ён усміхнуўся:

— У зубнога…

— Так, і ў ЛОРа таксама.

— Можа, гэта вам здаецца, што ў вас праблемка?

— Не, мяне гэта рэальна турбуе, — адказала жанчына. Уладзімір Уладзіміравіч, нават не зірнуўшы на губу, паабяцаў:

— Не хвалюйцеся, усё вылечым!

І выпісаў рэцэпт. Яна адразу ж купіла таблеткі і адну прыняла. За тры гадзіны адчуванне не змянілася. «Ну, не адразу», — падумала яна і выпіла другую. Не праходзіла... ад таблетак хацелася спаць. «Напэўна, з заспакаяльным эфектам», — падумала Наiля і вырашыла прачытаць інструкцыю. І прачытала — ад шызафрэніі... тут ужо пачалася сапраўдная паніка! Тэлефанаваць сябрам? Яны могуць падумаць, што насамрэч у яе шызафрэнія.

Наiля ў роспачы папрасіла прыехаць старога сябра Мікалая, толькі яму яна магла даверыць свае сумневы. Ён дакладна не падумае, што ў яе псіхічнае захворванне. Ён паглядзеў на яе са спачуваннем і няўпэўнена спытаў:

— Можа, табе здаецца? А ў…

Жанчына стрымала галашэнне.

— Мяне сапраўды гэта турбуе, — сказала яна скрозь слёзы. Мікалай збянтэжыўся і патэлефанаваў знаёмаму лекару скурвендыспансера Юрыю. Той уважліва выслухаў і спытаў:

— Колькі часу вас турбуюць гэтыя адчуванні?

— Месяц.

— А ў зубнога…

Наіля рыпнула зубамі:

— Сказаў — усё ў парадку.

— Што ў вас было месяц таму асаблівага?

Наiля падумала і адказала:

— Дзень нараджэння.

— А што вы елі і пілі ў свой дзень нараджэння?

— Як заўсёды, ніякай экзотыкі.

— А чым вы фарбуеце свае выдатныя губкі?

— Тая ж памада.

— Можа, вы чымсьці яшчэ іх пафарбавалі, напрыклад, чужой памадкай?

У голасе мужчыны гучала падлашчванне, што ніяк не спалучалася з настроем жанчыны.

— Здзекуецеся? Усе вы, мужыкі…

Яна сказала б больш, у яе накіпела, але раптам успомніла:

— Перад днём нараджэння, па парадзе суседкі, памазала герпес на губе настойкай пропалісу. Ён на губе за ноч ссох, раніцай я зафарбавала герпес памадай, і на ўрачыстасці ён не быў бачны.

— А! — з радасцю ўсклікнуў доктар Юрый. — Вось і знайшлі прычыну! У вас алергія на пропаліс! Тры дні па таблетцы вось гэтага лякарства раніцай і ўвечары — і ўсё пройдзе.

Хапіла дзвюх таблетак. Колькі перадумала Наіля, колькі лекараў яна абыйшла, а ўсё аказалася проста. Цяпер яна ведае, што ў яе алергія на пропаліс, а вось таблеткі ад шызафрэніі прымусілі задумацца. Можа, сапраўды нешта з ёю не так?

Валянціна БЫСТРЫМОВІЧ

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».