У дзень памяці спаленых вёсак у Пінскім раёне праходзіць шэраг памятных мерапрыемстваў. Найбольш масавым стаў мітынг-рэквіем у вёсцы Любель-Поль. Пра гэта паведаміў начальнік аддзела ідэалогіі і па справах моладзі райвыканкама Юрый Бушык.
Да помніка спаленай вёскі прыехалі прадстаўнікі працоўных калектываў, вучні мясцовых школ, прадстаўнікі грамадскасці. Памяць ахвяраў найперш ушанавалі хвілінай маўчання.
Любель-Поль і суседнюю Вульку карнікі спалілі ў 1943 годзе. Людзей сагналі ў хлеў на сядзібе Антона Жылевіча. У нейкі момант сяляне зразумелі, што гэта іх апошняя дарога, і рашыліся ўцякаць. Хто пабег у бок цяперашняй шашы, застаўся жыць: акупант, які стаяў там, страляў уверх, даваў людзям выратавацца. Хто выбраў супрацьлеглы напрамак, таго дагнала куля. Астатніх спалілі ў хляве. Калі загарэлася, людзі рынуліся ў дзверы, іх сустракалі кулямётным агнём. Толькі адна дзяўчынка Таццяна Пронька, калі яе збілі з ног, упала і праляжала пад целамі, аж пакуль усё не сціхла. Яна ў тым пекле засталася жывой. А 105 яе аднавяскоўцаў загінула.
Вёска адрадзілася, на месцы трагедыі ўстаноўлены памятны знак, летась яго рэканструявалі. Цяпер сюды не зарастае сцежка: людзі прыходзяць, ускладваюць кветкі, схіляюць галовы, згадваюць трагічную гісторыю.
Акцыі памяці таксама праходзяць у Пінчыцах, Невелі, Дубновічах. Усяго ў Пінскім раёне часткова або поўнасцю была знішчана 61 вёска.
Святлана ЯСКЕВІЧ
Фота тэлеграм-канала Пінскага райвыканкама
Канцэрт для дзяцей і моладзі, пластычны спектакль Ягора Дружыніна і «Рок-панарама».