У Мінлясгасе распавялі пра тэрміны правядзення акцыі «Тыдзень лесу» у рэгіёнах

Сталі вядомыя тэрміны правядзення рэспубліканскай акцыі «Тыдзень лесу» у рэгіёнах, паведамілі ў прэс-службе Мінлясгаса.

У Брэсцкай вобласці акцыя пройдзе з 1 па 8 красавіка, у Гомельскай і Мінскай — з 8 па 15 красавіка, у Віцебскай і Гродзенскай — з 15 па 22 красавіка, у Магілёўскай — з 17 па 23 красавіка.

Штогод кампанія праводзіцца па ініцыятыве Міністэрства лясной гаспадаркі. У 2023-м яна будзе праходзіць ужо ў 16-ы раз і прысвечана Году міру і стваральнай працы.

«Стаць удзельнікам акцыі можа кожны. Для гэтага дастаткова звярнуцца ў бліжэйшы лясгас або лясніцтва і заявіць пра сваё жаданне. Лесагаспадарчыя ўстановы забяспечаць валанцёраў усім неабходным пасадачным матэрыялам, а таксама інвентаром, пазначаць аб’екты, якія маюць патрэбу ў пасадцы лесу», — адзначылі ў ведамстве.

Прэв’ю: pixabay.com