Восем чалавек у розных раёнах шпіталізаваныя з атручваннем газам з-за няправільнай эксплуатацыі печаў

Восем чалавек за суткі шпіталізаваныя ў розных раёнах Беларусі з-за атручвання чадным газам. Ва ўсіх выпадках прычынай стала заўчаснае закрыццё засаўкі дымаходу печы ў жылым доме. Такая інфармацыя размешчаная на сайце МНС, паведамляе БелТА.

Першы за мінулыя суткі выпадак адбыўся ў вёсцы Кляпава Круглянскага раёна Магілёўскай вобласці. Паведамленне аб шпіталізацыі трох чалавек паступіла ратавальнікам 25 сакавіка ў 6.20. Пацярпелі дзве жанчыны і мужчына.

Яшчэ адзін выпадак у Магілёўскай вобласці адбыўся ў вёсцы Бялынкавічы Касцюковіцкага раёна. Увечары 25 сакавіка ратавальнікаў праінфармавалі аб шпіталізацыі жанчыны і мужчыны.

Прыкладна ў той жа час аналагічнае паведамленне паступіла ратавальнікам і ў Гомельскай вобласці. Чадным газам атруціліся два пенсіянеры — мужчына і жанчына — з гарадскога пасёлка Лельчыцы.

Падобны выпадак адбыўся і ў вёсцы Заполле Крупскага раёна Мінскай вобласці. З атручваннем чадным газам шпіталізаваная жанчына.

Прэв’ю: БелТА