Хакеісты «Ак Барса» выйшлі ў фінал Усходняй канферэнцыі КХЛ

У Кантынентальнай хакейнай лізе вызначыўся другі ўдзельнік фіналу Усходняй канферэнцыі — ім стаў Казанскі «Ак Барс», паведамляе БелТА.

У другім раўндзе плэй-оф Кубка Гагарына клуб з Татарстана сустракаўся з далёкаўсходнім «Адміралам». Да шостай гульні серыі, якая адбылася ва Уладзівастоку, каманды падышлі пры ліку 3:2 на карысць казанцаў. Выконваць задачу па выхадзе ў наступную стадыю госці пачалі неадкладна: ужо на 3-й хвіліне Ілля Сафонаў вывеў «Ак Барс» наперад, а праз пяць хвілін Мікіта Дыняк падвоіў перавагу «зялёных». У наступнай трэці супернікі абмяняліся шайбамі — на другі гол Дыняка адказаў форвард «маракоў» Мікалай Чабыкін. Трэці перыяд каманды пачалі пры ліку 3:1, за 20 хвілін лічбы на табло не змяніліся. У выніку 4:2 у супрацьстаянні, казанцы адпраўляюцца ў фінал Усходу ў восьмы раз у сваёй гісторыі.

За выхад у чэмпіёнскую серыю Кубка Гагарына «Ак Барс» паспрачаецца з омскім «Авангардам», які раней у чатырох матчах справіўся з магнітагорскім «Металургам». На Захадзе пакуль вядомы толькі адзін фіналіст канферэнцыі — гэта Пецярбургскі СКА, які выбіў з барацьбы за трафей ніжагародскае «Тарпеда» (4:0). Апошні ўдзельнік топ-4 сезона вызначаецца ў серыі ЦСКА і «Лакаматыва», пасля пяці матчаў у серыі вядуць «армейцы» (3:2). Шостая гульня ў гэтай пары пройдзе 27 сакавіка ў Яраслаўлі і стартуе ў 19.30.

Прэв’ю: БелТА