Новы спосаб дастукацца да тых, хто смеціць, выпрабуюць камунальшчыкі Савецкага раёна Гомеля, распавялі ў гарадскім часопісе «Белка». У месцах неарганізаванага адпачынку на прыродзе з’явяцца таблічкі з выявай свінні і надпісам «Кідаючы смецце, не забудзься рохкаць».
Першы адрас, дзе правядуць эксперымент, — тэрыторыя ўздоўж дарогі са Шведскай Горкі ў Любенскі мікрараён. Практычна пад кожным густым кустом тут можна ўбачыць сляды адпачынку не вельмі культурных гамяльчан. На гэта паказваюць кучы смецця, большая частка — упакоўкі ад піва і закусак да яго.
У раённай адміністрацыі аб праблеме ведаюць, перыядычна для ручной уборкі накіроўваюць у пойменную зону супрацоўнікаў «ГарСАПа», але праз месяц-два вырастаюць новыя смеццевыя востравы.
«Шчыра кажучы, дзівіць культура людзей, дакладней, яе адсутнасць. Няўжо так складана прыбраць за сабой? Спецыяльна для непамятлівых хутка ўсталюем таблічкі з выявай свінні і надпісам „Кідаючы смецце, не забудзься рохкаць“. Спадзяемся, што яны спрацуюць на апярэджанне, і людзі будуць смеціць менш», — распавёў пра ініцыятыву начальнік аддзела ЖКГ і добраўпарадкавання раённай адміністрацыі Вадзім Самуйленка.
Учора, са слоў Самуйленкі, у неафіцыйнай зоне адпачынку зноў наводзілі парадак працоўныя «ГарСАПа», працягнуць і пасля выходных. На прапанову «Белкі» усталяваць тут адзін-два кантэйнеры кіраўнік адказаў, што такі ўжо ёсць — ён знаходзіцца ў раёне пляцоўкі для выгулу сабак на вуліцы Хмяльніцкага.
Фота: «Белка»
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
