Беларусь і Свярдлоўская вобласць дамовіліся аб развіцці супрацоўніцтва ў сферы энергетыкі

Беларусь і Свярдлоўская вобласць дамовіліся аб развіцці супрацоўніцтва ў сферы энергетыкі. Сумесныя праекты абмяркоўваліся 28 сакавіка на сустрэчы міністра энергетыкі Беларусі Віктара Каранкевіча з першым намеснікам губернатара Свярдлоўскай вобласці Расіі Аляксеем Шмыковым, паведамілі ў прэс-службе Мінэнерга.

Беларусь і Свярдлоўскую вобласць звязваюць моцныя гандлёва-эканамічныя і кааперацыйныя сувязі, у тым ліку ў энергетычнай галіне. Нягледзячы на геаграфічную аддаленасць, колькасць сумесных праектаў з рэгіёнам, які з’яўляецца найбуйнейшым прамысловым цэнтрам Расіі, адным з лідэраў па дынаміцы эканамічнага развіцця ў краіне, пашыраецца. «Неабходна і далей паглыбляць наша супрацоўніцтва, магчымасці для гэтага ёсць», — адзначыў міністр.

Канкрэтныя напрамкі двухбаковага ўзаемадзеяння разгледжаны на паседжанні рабочай групы Міністэрства энергетыкі Беларусі і ўрада Свярдлоўскай вобласці, якое адбылося сёння ў Мінэнерга. Як адзначыў намеснік міністра энергетыкі Міхаіл Міхадзюк, Беларусь зацікаўлена як у далейшай арганізацыі паставак энергетычнага абсталявання са Свярдлоўскай вобласці ў Беларусь, так і ў рэалізацыі праектаў па сумеснай вытворчасці запасных частак і вузлоў, у тым ліку з удзелам Уральскага турбіннага завода.

«Асаблівую ўвагу нам неабходна надаць імпартазамяшчэнню, вырашыць пытанні па газавых турбінах. У нашай краіне рэалізуюцца праекты па будаўніцтве і рэканструкцыі падстанцый, гатовыя больш актыўна працаваць з вашымі вытворцамі і па электратэхнічным абсталяванні», — сказаў намеснік міністра.

Мінэнерга Беларусі гатова прапанаваць паслугі спецыялізаваных арганізацый у праектаванні, будаўніцтве, рамонце і наладцы аб’ектаў энергетыкі як на тэрыторыі Расіі, так і ў трэціх краінах.

Акрамя гэтага, узаемавыгадным можа быць двухбаковае супрацоўніцтва ў газавай галіне. У Свярдлоўскай вобласці рэалізуецца маштабная праграма газіфікацыі: Беларускія газазабеспячальныя арганізацыі маюць неабходны вопыт па будаўніцтве газаправодных сетак і могуць удзельнічаць у адпаведных праектах. У якасці магчымай сферы ўзаемадзеяння таксама названа тарфяная прамысловасць. Акрамя таго, Мінэнерга Беларусі зацікаўлена ў далейшым вывучэнні вопыту расійскіх калег у галіне абыходжання з радыеактыўнымі адходамі.

Фота: Мінэнерга