У Магілёве запрашаюць на сустрэчу з вясной праз фота Мікалая Хацяінцава

На вуліцы яшчэ снег, а ў Магілёўскім абласным краязнаўчым музеі імя Е.Раманава ўжо ва ўсю моц буяніць вясна. І няхай толькі ўмоўна, але пейзажы на здымках фотамастака, члена магілёўскага фотаклуба «Вясёлка» Мікалая Хацяінцава ствараюць адпаведны настрой. Яшчэ не кожны зможа зняць прыроду так, каб яна натхняла. Сакрэт у тым, што аўтар бачыць крыху болей, чым астатнія. На яго здымках — застыўшая паэзія.

Нездарма адкрыццё выставы пачалося з паэтычных радкоў Васіля Ларушына «Вясны чароўная сіла». Дарэчы, яна так і называецца. Супрацоўнікі музея і калегі Мікалая выказвалі спадзяванні, што вясна цяпер абавязкова паспяшаецца з прыходам.

У экспазіцыі 49 фотаздымкаў, якія прысвечаныя самай чароўнай пары года, гэта своеасаблівы гімн абнаўленню прыроды. Фота размешчаны ўздоўж лесвіцы з першага па трэці паверх. Ідзеш як быццам па вясноваму лугу. Натхненне аўтар чэрпае ў маляўнічых кутках Магілёва, ваколіцах вёскі Малыя Мхінічы Чавускага раёна. 

— Я ў захапленні, выстава сапраўды вельмі светлая і натхняючая, — прызналася на адкрыцці намеснік дырэктара музея Аляксандра Буракова. — Мы заўсёды рады, калі ў нашым музеі з’яўляецца вясёлка. Гэта сімвал усіх тых асноўных фарбаў, з якіх ствараюцца любыя адценні і тоны. Прадстаўнікі магілёўскага фотаклуба «Вясёлка» сваёй творчасцю увасабляюць гэты сімвал. Іх творчасць шматгранна. І вельмі цудоўна, калі сур’ёзныя рэтраспектыўныя выставы змяняюць вось такія прыгожыя, лёгкія, лірычныя. 

Мікалай Хацяінцаў прызнаны майстар. Ён з’яўляецца лаўрэатам II Усесаюзнага фестывалю народнай творчасці ў Маскве, прызёрам гарадскога конкурсу на лепшую фотасерыю ў Магілёве. Яго работы экспанаваліся ў фотасалонах Польшчы, Іспаніі, Ганконга, Бельгіі. Ён пастаянны ўдзельнік гарадскіх выставак і конкурсаў. Калегі лічаць, што асабліва тонка ў яго атрымліваецца перадаваць змены ў прыродзе. 

Як выказаўся кіраўнік фотаклуба «Вясёлка» Анатоль Талкачоў, яго калега па творчасці — майстар пейзажнай здымкі, прычым любой пары года. А вядомая магілёўская мастачка Вера Юркова прызналася, што фотаработы Мікалая Хацяінцава ёй падабаюцца тым, што яны — ціхія, размераныя, мілыя.

— Да пейзажаў я прыйшоў не адразу, — канстатуе аўтар. — Спрабаваў сябе ў рэпартажным фота, здымаў вяселлі, але задавальненне, якое атрымліваеш ад назірання за прыродай, нельга параўнаць ні з чым. Уменне бачыць незвычайнае ў звычайным з’явілася з часам. І вельмі рады, калі ў мяне атрымліваецца перадаць гэты стан і настрой гледачам. 

Захапленне фота падзяляе ўнук майстра Арсеній Хацяінцаў, які прыйшоў падтрымаць дзеда. 

— Гэта мой першы памочнік і дарадца, — усміхаецца Мікалай. — Я падарыў яму фотаапарат і мы разам ходзім на фотапрагулкі. 

Ён з гонарам адзначае, што ў яго паслядоўніка добры густ. Хлопчык па-майстэрску фарміруе букеты, якія з вялікім задавальненнем дорыць матулі і бабулі. А яшчэ ён дапамагаў дзеду ў адборы фота для выстаўкі. «Удачны кадр яшчэ трэба злавіць, а фотаапарат толькі інструмент», — па даросламу разважае хлопчык. І цалкам згодны з дзедам, які кажа, што ў фотасправе больш важна разумець, што ты здымаеш і навошта. Мікалай Хацяінцаў не выключае, што з часам фота для Арсенія стане такім жа ўсёпаглынальным хобі, якім яно з’яўляецца для яго.

Дарэчы, у музеі гэта ўжо не першая выстава «на лесвіцы» членаў фотаклуба «Вясёлка». Магілёўскія фотамастакі ствараюць своеасаблівы летапіс падзей, якія адбываюцца ў горадзе і яго наваколлі. А гэта заўсёды цікава наведвальнікам.

Нэлі ЗІГУЛЯ

Фота аўтара