Кіраўніку на заметку: як паводзіць сябе з падначаленымі, каб цябе паважалі і цанілі

Кіраўніку неабходна разумець базавыя прынцыпы паводзін сваіх супрацоўнікаў. Паводзіны падначаленага — гэта ў першую чаргу рэакцыя на вашы паводзіны. Страх, няўпэўненасць кіраўніка неўсвядомлена счытваюцца падначаленымі. Жаданне падпарадкоўвацца ў іх знікае. Акрамя таго, уключаецца іерархічны інстынкт. Яны адчуваюць сябе псіхалагічна мацнейшымі. Адсюль насмешка, дзёрзкасць і хамства ў дачыненні да вас. І калі вас не слухаюцца, значыць, не ўспрымаюць як начальніка. Давайце разбірацца, як будаваць зносіны з супрацоўнікамі, каб паміж вамі былі паразуменне і павага.

Парады: 

• Праяўляйце цярпенне з новымі супрацоўнікамі. Дайце новаму супрацоўніку магчымасць прайсці адаптацыю. На гэта спатрэбіцца не менш за тры тыдні. Не рабіце паспешных высноў пра яго працу, бо памылкі могуць быць справакаваны напружаным станам.
• Дэлегуйце абавязкі. Вы — дырэктар, вы больш вопытны і мудры. Канешне, спачатку калегі зробяць не так добра, як вы гэта сабе ўявілі, але з часам навучацца.
• Будзьце прыкладам для супрацоўнікаў. Захоўвайце аптымізм і энтузіязм, будзьце энергічным і мэтанакіраваным. Супрацоўнікі павінны чуць і бачыць, што вы як кіраўнік увесь час самаўдасканальваецеся і пры гэтым усё паспяваеце.
• Праяўляйце эмпатыю. Імкніцеся зразумець перажыванні супрацоўнікаў, размаўляйце з імі пра магчымыя цяжкасці, разам шукайце рашэнне. Вы як ніхто іншы зацікаўлены, каб у вашай кампаніі працавалі задаволеныя людзі.
• Зносіны з падначаленымі не трэба будаваць на аснове фамільярнага стаўлення ці быць занадта строгім начальнікам. У кожнага ёсць свае інтарэсы і мэты, трэба паважаць іх.
• Паспрабуйце зразумець прычыну нізкай эфектыўнасці супрацоўніка — гэта дапаможа вам прыняць правільнае рашэнне. Адкрыта гаварыце з падначаленым пра тое, што вас турбуе. Не спадзявайцеся толькі на ўласныя назіранні; паразмаўляйце з калегамі, якім давяраеце.
• Ніколі не мяркуйце, што падначаленыя самі ведаюць, да чаго яны павінны імкнуцца. Не пакідайце супрацоўніка сам-насам з задачай. Давайце падначаленаму зваротную сувязь так часта, як яму гэта патрабуецца. Ён павінен бачыць, якія вынікі прыносяць яго дзеянні.
• Будуйце зносіны з пазіцыі «выйграць-выйграць». Пакажыце супрацоўніку, што яго і вашыя дзеянні прыносяць выгаду і яму таксама.
• Давайце свабоду дзеянняў. У некаторых пытаннях давайце супрацоўнікам магчымасць самастойна прымаць рашэнні. Людзі шануюць, калі ім давяраюць, і будуць развівацца, разумеючы, што на іх ускладзена адказнасць.
• Захоўвайце субардынацыю. Рабочыя задачы і дзелавыя зносіны ніхто не адмяняў, і вы не павінны закрываць вочы на памылкі і баяцца зрабіць заўвагу. Галоўнае — не пераходзьце на асобы і пазбягайце негатыву. Калі хтосьці з супрацоўнікаў памыляецца, не трэба раз’юшана кідацца і ўсё вырашаць самому. Разбярыце сітуацыю разам з падначаленым, высветліце прычыны, зрабіце высновы і скарэктуйце далейшую працу.

• Калі вы хочаце, каб кампанія расла, а праца выконвалася якасна, неабходна, каб прафесійна рос і персанал. Інвестуйце час або грошы ў навучанне кожнага. Памятайце, што ўсе выдаткаваныя рэсурсы вернуцца, бо кампанія будзе развівацца, а прыбытак — павялічвацца.
• Улічвайце здольнасці супрацоўніка. Ваша задача — зразумець, якая праца ідэальна падыходзіць канкрэтнаму чалавеку. Калі людзі знаходзяцца на сваім месцы, яны лёгка і з задавальненнем рэалізоўваюць сябе. І ў вас усё добра — і супрацоўнік задаволены.
• Не лічыце, што супрацоўнік павінен разумець вас з паўслова. Перш за ўсё гэта ваша адказнасць — азнаёміць яго са сваім бачаннем. Заўсёды ўдакладняйце, як вас зразумелі. Не задавайце пытанне: «Табе ўсё зразумела?». На яго амаль заўсёды і ўсе адказваюць сцвярджальна. Замест гэтага лепш папрасіце супрацоўніка: «Паўтары, калі ласка, як ты зразумеў, што трэба зрабіць/пра што мы з табой дамовіліся». Далей пераканайцеся, што супрацоўнік не ўпусціў важныя моманты. Пры неабходнасці прагаварыце іх паўторна.
• Заахвочвайце. Выкарыстоўвайце заахвочванні. Гэта дае выдатную матывацыю работніку, бо ён разумее, што яго старанні заўважаюць і ўлічваюць. Праца будзе найбольш эфектыўнай, калі вы ведаеце моцныя і слабыя бакі кожнага супрацоўніка, яго кампетэнцыі і выбудоўваеце камунікацыі з улікам дадзеных параметраў.

Памятайце, што камусьці з супрацоўнікаў трэба больш зносін, камусьці — менш. Для гэтага ўзгадніце з супрацоўнікамі колькасць камунікацый, асабліва наконт кантролю і зваротнай сувязі. І не дазваляйце выводзіць вас з кіраўніцкай пазіцыі ў менш выгадныя фарматы.

Псіхолаг Алена ШАЎЧЭНКА

Фота: pexels. com