Магілёўскі раён — напэўна, самы вялікі ў вобласці. У яго склад уваходзіць 15 сельскіх Саветаў, дзе пражывае 42 тысячы чалавек. Яшчэ амаль столькі ж дадаецца ў летні перыяд. Гэта звычайныя дачнікі плюс жыхары 179 садовых таварыстваў. І трэба прыкласці шмат намаганняў, каб арганізаваць парадак на тэрыторыі. Сёння ў раёне поўным ходам ідзе месячнік навядзення парадку на зямлі — праводзяцца суботнікі, санітарныя дні, нават семінары.
— Людзей на нашай тэрыторыі бывае шмат, і трэба выразна размеркаваць усе зоны адказнасці, — адзначае старшыня Магілёўскага райсавета Сяргей Ярошчанка. —Праводзім сходы, дзе насельніцтва мае магчымасць сустрэцца з усімі зацікаўленымі службамі. Запрашаем камунальнікаў, каб загадзя скласці дагаворы на вываз смецця з тымі ж дачнікамі.
Суразмоўнік звяртае ўвагу на тое, што ў раёне распрацавана праграма навядзення парадку, дзе выразна прапісаны кожны населены пункт, кожная вуліца, хто за што адказвае, што павінна быць зроблена, з указаннем канкрэтных тэрмінаў. І кожны сельсавет зацвердзіў для сябе план дзеянняў. Паралельна ажыццяўляецца канцэпцыя па азеляненні раёна, дзе ўлічаны малыя архітэктурныя формы, клумбы, кветнікі.
— Вырашылі сёлета ў кожным аграгарадку ўздоўж пешаходных сцежак пасадзіць кветкі, — адзначае Сяргей Ярошчанка. — І прыгожа, і настрой узнімае.
Хутка Радаўніца, і ў разгары навядзенне парадку на могілках — вывозіцца смецце, падвозіцца пясок, выразаюцца аварыйныя дрэвы.
— Найбольш складаная сітуацыя па могілках, якія каля горада, — дзеліцца набалелым старшыня райсавета. — Імі актыўна карыстаюцца гараджане, а гэта дадатковая нагрузка на раён. Напрыклад, на могілках у Бароўцы з больш як ста пахаваных за год людзей мясцовых — адзінкі. Улічваючы, што там тысячы пахаванняў, парадак навесці больш складана і стратна.
Налета Магілёўскаму раёну спаўняецца сто гадоў і шмат штоо трэба рэалізаваць, каб ён стаў яшчэ больш прыгожы і ўтульны. Напрыклад, дапамагчы насельніцтву памяняць агароджу там, дзе яна прыйшла ў непрыдатнасць. Зразумела, што задавальненне нятаннае, таму шукаліся найбольш прымальныя варыянты.
— Дамовіліся з дрэваапрацоўшчыкамі, што людзі змогуць набыць сабе плот па цане 24 рублі за дзесяць пагонных метраў, прычым у растэрміноўку, — удакладняе суразмоўнік. — Сельсаветы даюць агульную лічбу і пастаўшчыкі дастаўляюць груз оптам.
Па раёне плануецца ўстанавіць тры дзіцячыя пляцоўкі — у Палыкавічах, Мяжысетках, Буйнічах. Праекты ўжо праходзяць экспертызу, сельсаветы, дзе з'явіцца абсталяванне, вядуць перагаворы з насельніцтвам. Гульнявыя комплексы набываюцца за кошт бюджэтных сродкаў, астатняе — азеляненне, добраўпарадкаванне, пасадка дрэў — за жыхарамі. Яшчэ адна дзіцячая пляцоўка размесціцца ў Сумарокаве. Месцічы пагадзіліся ўзяць асабісты ўдзел у набыцці карыснага абсталявання і ўзяць частку выдаткаў на сябе. Астатнюю суму выдзяляе абласная асацыяцыя мясцовых Саветаў дэпутатаў.
Нядаўна для старшынь сельсаветаў на базе аграгарадка Семукачы прайшло выязное навучанне па рабоце з Указам № 116. Вядома, што для эфектыўнай дзейнасці мала ведаць нарматыўныя дакументы, трэба ўмець будаваць дыялог з мясцовымі жыхарамі.
Старшыні Семукацкага сельсавета Тамары Укружскай было што расказаць з гэтай нагоды. Толькі за апошнія два гады на тэрыторыі сельсавета ўведзена ў севазварот 168 гектараў невыкарыстаных зямель. На семінары разглядалі паслядоўнасць правядзення такой работы, канкрэтныя дзеянні па аптымізацыі зямельных участкаў.
У якасці прыкладаў разглядаліся пляцоўкі ў Вялікіх Бялевічах і непасрэдна Семукачах. Выгляд Вялікіх Бялевіч псавалі зарослыя ўчасткі. Летась яны былі цалкам ліквідаваныя. Такім чынам было акультурана больш за 20 гектараў.
З пачатку года на тэрыторыі сельсавета ў рамках 116-га Указа прададзена 12 пустых дамоў. Гэта значыць, і яны, і зямля вакол іх (а менш як 25 «сотак» ніхто не афармляў) набудуць прыстойны выгляд. У хуткім часе на продаж пойдзе яшчэ 21 дом.
— Попыт на іх вялікі, — сцвярджае суразмоўніца. — Калі мы 12 дамоў выставілі на продаж, пакупнікі адразу ж знайшліся. Яшчэ і жадаючыя засталіся. Вельмі шмат ахвотных купіць сабе ў нас дамок.
Тамара Укружская ўся ў рабоце, разам з камандай аднадумцаў грабе лісце, пілуе дрэвы, фарбуе помнікі.
— Усе мы зацікаўленыя, каб на зямлі быў парадак, — кажа яна. — У нас у рабоце задзейнічаны і прадпрыемствы, і арганізацыі, і сельвыканкам, і насельніцтва. У адносінах да нядбайных жыхароў выпісваем прадпісанні, складаем пратаколы. Людзі ведаюць, што дровы, пясок, будматэрыялы і гэтак далей з зямель агульнага карыстання вясной трэба прыбіраць. І пытанні не ўзнікаюць. Акрамя таго, жыхары актыўна задзейнічаныя ў суботніках — прыбіраюць паркі, фарбуюць абсталяванне на дзіцячых пляцоўках. І, як правіла, грошы на фарбу збірае менавіта насельніцтва.
Нэлі ЗІГУЛЯ
Сітуацыя будзе толькі пагаршацца.
Канцэрт для дзяцей і моладзі, пластычны спектакль Ягора Дружыніна і «Рок-панарама».