Вы тут

Як мы глядзелі тэлевізар у красавіку. Дадзеныя медыявымяральніка


Хоць сёлета вясна і халодная, але цыбулю садзіць трэба. Таму, напэўна, у красавіку параўнальна з сакавіком знізіўся і рэйтынг тэлебачання, і сярэднясутачны час прагляду «блакітнага экрана» амаль на 10 працэнтаў. На 4,5 працэнта скараціўся сярэднясутачны ахоп аўдыторыі.


Фота: pixabay.com

На чвэрць гадзіны пазней пасунуўся максімальны аб'ём аўдыторыі тэлебачання: з 17 да 22 гадзін. Павышэнне глядацкай актыўнасці ў выхадныя ў мінулым месяцы зафіксавана на гадзіну раней — з 8 раніцы. Гледзячы па зменах ва ўзроставай структуры гледачоў, на градкі першымі выйшлі людзі, якім больш за 65 гадоў, — іх колькасць перад тэлевізарам працягнула змяншацца. А вось «маладыя пенсіянеры», напэўна, вырашылі пачакаць, пакуль зямля лепш прагрэецца, — іх зноў было трошкі больш.

Нічога не змянілася ў топ-5 любімых жанраў сярод гледачоў: кіно, забаўляльныя праграмы, навіны, пазнавальныя праграмы, музыка. У красавіку незадаволеным застаўся попыт на кіно, навіны, сацыяльна-палітычныя і пазнавальныя праграмы. Прапанова спартыўных, забаўляльных, музычных і дзіцячых праграм перавысіла попыт.

Амаль усе каналы страцілі сярэднясутачныя рэйтынг і ў дынаміцы сярэднясутачнага ахопу. Дынаміка сярэднясутачнай долі трошкі вырасла толькі ў «РТР-Беларусь», «Беларусь 3» і Plus TV. На працягу другога вясновага месяца ў сярэднім 57,43 працэнта насельніцтва нашай краіны штодня ўключала тэлевізар (у сакавіку — 60,19 працэнта). Дынаміку сярэдняга часу прагляду сярод гледачоў здолелі падняць «РТР-Беларусь», Plus TV і «Беларусь 3».

У лідарах топ-15 праграм на каналах усё тыя ж назвы: «Прывітанне, Андрэй» (у суботу, 29-га), «Весткі тыдня» (нядзеля, 9-га), «Песні ад усёй душы» (нядзеля, 16-га) — усе «РТР-Беларусь». Наступныя тры пазіцыі — інфармацыйныя праграмы: «Вынікі тыдня з Ірадай Зейналавай» («НТБ-Беларусь», 2 красавіка), вячэрнія «Весткі» («РТР-Беларусь», 28 красавіка) і вячэрнія «Нашы навіны» (АНТ, 17 красавіка). На сёмым месцы выпуск ток-шоу АНТ 17 красавіка, прысвечаны спецыяльнай ваеннай аперацыі, якую ўзброеныя сілы Расіі праводзяць ва Украіне. У рэйтынг таксама трапілі эпізоды серыялаў «Вельмі дрэнная нявеста», «Запалярны вальс», «Каханне пераадолее ўсё» («РТР-Беларусь») і «Стражнік» («НТБ-Беларусь»).

Топавыя праграмы на каналах «РТР-Беларусь», «НТБ-Беларусь» і АНТ названы вышэй, а вось на «Беларусь 1» такой стаў выпуск «Зразумелай палітыкі» 17 красавіка, прысвечаны адносінам Венгрыі і Еўрасаюза; на МІРы — эпізод шоу-віктарыны «Гульня ў кіно» 5 красавіка; на СТБ, «Беларусь 2», «Беларусь 3» — эпізоды серыялаў «Падсудны» (28 красавіка), «Сляпая» (3 красавіка) і «Вечны кліч» (15 красавіка).

Вольга МЯДЗВЕДЗЕВА

Выбар рэдакцыі

Грамадства

На Гомельшчыне актыўна развіваюць валанцёрскі рух

На Гомельшчыне актыўна развіваюць валанцёрскі рух

Форма сацыяльнай актыўнасці падлеткаў.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».