З нагоды Дня сям’і, які святкаваўся ўчора, натарыусы Мінска сёння ладзяць бясплатныя кансультацыі для шматдзетных сямей і бацькоў, якія выхоўваюць дзяцей-інвалідаў, у межах рэспубліканскай акцыі «Даступнае права».
Цягам працоўнага дня 16 мая грамадзяне абазначанай катэгорыі могуць звярнуцца ў любую натарыяльную кантору і бюро сталіцы, каб атрымаць прававую дапамогу па пытаннях здзяйснення натарыяльных дзеянняў. Юрысты падкажуць, на што можна расходаваць сямейны капітал, дапамогуць разабрацца ў правах уласнасці на маёмасць, сумесна нажытую сужэнцамі ў шлюбе, раскажуць пра асаблівасці наследавання спадчыны і адкажуць на іншыя натарыяльныя пытанні.
— Падобныя акцыі ладзяцца дзеля прававога інфармавання сямей і ўмацавання прэстыжу сямейных каштоўнасцей, — заўважыў Юрый Лукашэвіч, прэс-сакратар Беларускай натарыяльнай палаты. — Акрамя бяспатных кансультацый, якія праводзяць натарыусы па ўсёй краіне, спецылісты выступаюць з тэматычнымі лекцыямі ў працоўных калектывах і ўстановах, каб данесці прававыя веды да кожнай сям’і. Часта людзям трэба патлумачыць простыя для спецыялістаў, але складаныя для звычайнага беларуса пытанні афармлення правоў спадчыны, падзелу маёмасці, складання шлюбнага дагавору і шмат якіх іншых побытавых момантаў, правільнае юрыдычнае афармленне якіх значна спрашчае жыццё ў шлюбе.
Спіс натарыяльных кантор і бюро Мінска, а таксама іх адрас і час работы можна паглядзець на сайце Беларускай натарыяльнай палаты ў раздзеле «Знайсці натарыуса».
Ірына СІДАРОК
Прэв’ю: БелТА
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.