Вы тут

Чаму пабываць на «Белагра-2023» варта нават тым, хто далёкі ад аграрнай сферы


Беларусь — аграрная краіна, і ў нашы дні гэта гучыць горда: у трэцім тысячагоддзі сельская гаспадарка — тая сфера, у якую дзяржавы ўкладваюць сродкі, а найлепшыя галовы — навуковы і даследчы патэнцыял. У сучасным свеце, насельніцтва якога складае каля 8 мільярдаў, харчовая бяспека выходзіць на першы план.


Фота: БелТА.

Канцэпцыя высокатэхналагічнай, або, як прынята казаць, разумнай сельскай гаспадаркі — выкарыстанне камп'ютарных праграм і складанага абсталявання для аптымізацыі працэсаў земляробства, раслінаводства, жывёлагадоўлі, атрымання малака і мяса — укараняецца ў жыццё і ў нашай краіне: гарантаваны ўзровень харчовай бяспекі застаецца адным з асноўных нацыянальных прыярытэтаў Беларусі. Асаблівасці такога падыходу да аграрных работ прафесіяналам будуць цікавыя з практычнага пункту гледжання, а тым, хто не звязаны з аграрнай сферай, — з пункту гледжання пазнавальнага. Тым больш што Міжнародная спецыялізаваная выстава «Белагра» штогод праходзіць не толькі як форум прафесіяналаў, але і як яркае шоу, дзе можна ўбачыць новыя пароды сельскагаспадарчых жывёл, пакаштаваць найноўшыя лініі прадукцыі ад айчынных і замежных вытворцаў і на свае вочы ацаніць інавацыйныя тэхналогіі ў агратэхніцы, раслінаводстве, жывёла- і птушкагадоўлі. А таксама — шырокі спектр магутнай сельгастэхнікі апошняга пакалення. Сёлета ў экспазіцыі выставы — больш за 240 новенькіх бліскучых сельгасмашын, якія выкарыстоўваюць ва ўсіх галінах сельскай гаспадаркі (ад тых, што здзіўляюць сваімі памерамі, да зусім малютак). Наведвальнікам дазволяць пасядзець у іх кабінах — так што на выставу варта прыйсці з дзецьмі.

Памятаеце, як падчас «Белагра-2021» сацсеткі запоўнілі сэлфі з першым айчынным трактарам-беспілотнікам? Напэўна, інавацыйнымі дзівосамі «Белагра» пачастуе наведвальнікаў і на гэты раз.

— Выстава будзе размешчана на плошчы больш за 28 тысяч квадратных метраў, — расказаў намеснік міністра сельскай гаспадаркі і харчавання Вадзім Шагойка.

У межах форуму пройдуць міжнародныя спецыялізаваныя выставы — у тым ліку «Белферма» і «Белпрадукт». Адкрыецца выстава 6 чэрвеня і завершыцца — 11-га. Айчынных аграрыяў, работнікаў харчовай і перапрацоўчай прамысловасці і іх замежных калег, а таксама гасцей «сельскагаспадарчай ВДНГ» яна збярэ ў выставачным цэнтры Кітайска-Беларускага індустрыяльнага парка «Вялікі Камень» (25 км ад Мінска і 6 км ад Нацыянальнага аэрапорта, дакладны адрас — пр. Пекінскі, 29).

На любы густ

Міжнародная спецыялізаваная выстава «Белагра-2023» сёлета будзе праводзіцца ўжо ў 33 раз. Удзел у вядучым форуме аграрыяў возьмуць 450 кампаній з дзесяці краін свету. Акрамя гаспадыні мерапрыемства — Беларусі, гэта Расія, Кітай, Пакістан, Турцыя, Германія, В'етнам, Італія, Індыя і Палесціна. Для параўнання, летась у нашу краіну для ўдзелу ў «Белагра» прыехалі прадстаўнікі 425 кампаній з пяць краін. Таксама на «Белагра-2023» будуць прадстаўлены экспазіцыі 14 абласцей Расійскай Федэрацыі.

— Буйныя экспазіцыйныя блокі прадставяць Мінскі трактарны завод, «МАЗ», «Гомсельмаш», «Амкадор», Рэспубліканскае аб'яднанне «Белаграсэрвіс», «Бабруйскаграмаш», Мінскі маторны завод і шэраг іншых буйных кампаній, — адзначыў Вадзім Шагойка.

Ён дадаў, што больш за 90 % тэхнікі, якая выкарыстоўваецца на нашых палях, — айчыннай вытворчасці. На «Белагра» можна пераканацца, што па якасных і тэхнічных характарыстыках яна не саступае вядучым сусветным узорам.

Наведвальнікаў дакладна ўразіць «Белферма-2023». Там можна будзе ўбачыць абсталяванне для малочнатаварных фермаў, дзе за статкам сочыць і даглядае ўсяго некалькі аператараў, а практычна ўсе працэсы — аўтаматызаваныя. Прафесіяналам будзе цікава азнаёміцца з новымі кармамі і дабаўкамі, ветэрынарнымі прэпаратамі, праграмным забеспячэннем і біяэнергетычнымі тэхналогіямі. А калі вы вырашылі пабываць на выставе ўсёй сям'ёй, дзецям будзе даспадобы наведаць «Рыбацкую вёску» — яе арганізуе ДА «Белводгас».

Дванаццаццю прадпрыемствамі будзе прадстаўлена пладова-агароднінная прадукцыя, якая вырабляецца ў Рэспубліцы Беларусь, расказаў намеснік міністра сельскай гаспадаркі і харчавання. Вялікая ўвага сёлета аддадзена тэме ўгнаенняў і сродкаў аховы раслін — яна будзе прадстаўлена чатырнаццаццю прадпрыемствамі, паведаміў ён.

Выстава «Белпрадукт» размесціцца на плошчы больш за 1200 м2, удзел у ёй возьмуць 132 беларускія вытворцы з усіх рэгіёнаў краіны. Будзе арганізаваны кірмаш прадуктаў харчавання. «Кулінарны раздзел» аграрнага форуму па ўжо існуючай традыцыі прадугледжвае багацце і размах. Дэгустацыі на такіх выставах праходзяць паўсюдна, усё ўзорна-паказальна, смачна, духмяна і гасцінна — цалкам рэальна «надэгуставацца» да абсалютнай сытасці. Да таго ж у розных частках выставы будзе працаваць 11 пунктаў харчавання. Словам, ідэальнае месца, каб напоўніць халадзільнік і зведаць новыя смакі.

Дарэчы, на заметку дачнікам — на «Белагра» можна будзе і набыць не толькі гародніну і садавіну, але і насенне новых сартоў і гібрыдаў ад айчынных селекцыянераў: усходжасць — гарантуецца. Атрымліваецца зручна: ацаніў канчатковы вынік — набыў насенне.

— Праграма «Белагра-2023» прадугледжвае як інтарэсы прафесіяналаў, якія прыязджаюць на выставу для заключэння кантрактаў і выбудоўвання бізнес-адносін, так і наведвальнікаў, якія могуць на свае вочы ўбачыць дасягненні сельскай гаспадаркі і перапрацоўчай галіны і прыемна правесці час, — падкрэсліў Вадзім Шагойка.

Новы напрамак у праграме «Белагра» — спартыўны блок: лёгкаатлетычны забег і праграма Рэспубліканскага цэнтра коннага спорту з удзелам алімпійцаў.

Перагаворы і канферэнцыі

Але ўсе вышэйпералічаныя атрыбуты свята разлічаны ў першую чаргу на тых наведвальнікаў, хто прыйшоў «проста паглядзець». Прафесіяналам падобныя форумы цікавыя ў зусім іншым ключы — у першую чаргу як пляцоўка для дзелавых сустрэч. У рамках «Белагра» прадугледжана каля двух дзясяткаў канферэнцый і семінараў, распавёў Вадзім Шагойка. Расклад кожнага дня прадугледжвае В2В-сустрэчы, дэманстрацыі і прэзентацыі, разлічаныя менавіта на прафесійны інтарэс.

— Ключавы момант ацэнкі міжнароднага супрацоўніцтва — тавараабарот і паступленне экспартнай выручкі, — адзначыў Вадзім Шагойка. — За мінулы год мы прыраслі па экспарце сельгаспрадукцыі, сельскагаспадарчай сыравіны і харчавання практычна на чвэрць. Сёлета тэндэнцыя захоўваецца: мы павялічваем экспартную выручку. «Белагра» — пляцоўка, якая спрыяе ўмацаванню сувязяў, заключэнню кантрактаў і канкрэтных дамоўленасцяў на доўгатэрміновую перспектыву.

Словам, на «Белагра-2023» цікава будзе ўсім катэгорыям наведвальнікаў. Застаецца толькі нагадаць, што выстава будзе працаваць з 10 да 18.00, з 6 да 11 чэрвеня ў парку «Вялікі Камень». У гэтыя дні з Мінска ад станцыі метро «Магілёўская» будуць арганізаваны пастаянныя транспартныя зносіны.

Аляксандра АНЦЭЛЕВІЧ

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».