Майстры з'ехаліся на Рэспубліканскі фестываль-кірмаш народных мастацкіх рамёстваў

У чатырнаццаты раз у сталіцы праходзіць Рэспубліканскі фестываль-кірмаш народных мастацкіх рамёстваў «Вясновы букет». Сёлета ў ім прымаюць болей за трыста пяцьдзесят майстроў з усёй Беларусі. Кожны рэгіён прастаўлены сваімі самымі вядомымі майстрамі, многія з якіх з’яўляюцца членамі Саюза майстроў. Нямала тут і тых, каму нададзены ганаровы статус «Народны майстар», а таксама кіраўнікоў студыяў па навучанні будучых майстроў. Менавіта гэтыя творчыя асобы працягваюць лепшыя традыцыі нашых народных рамёстваў, перадаюць свой багаты досвед дзецям і дарослым. Мне пашчасціла сустрэць знаёмых, якіх шмат разоў фатаграфаваў на папярэдніх фестывалях — і на плошчы Старога горада, як цяпер, і ў Лошыцкім сядзібна-паркавым комплексе, калі толькі пачынаўся гэты адметны праект. Тут быў рэзчык па дрэве Анатоль Багамольцаў з Мінска, ткачыха Валянціна Волкава з Касцюковічаў, Таццяна Сіроціна і Таццяна Чараповіч з Дрыбіна, лазапляцельшчык Аляксей Меснік і бондар Уладзімір Станкевіч з Глуска, ганчар і разьбяр з Лепеля Анатоль Сімановіч, майстар па спіральнаму пляценню Васіль Сіманковіч з Гарадка, мастачка па маляванню дываноў з Глыбокага Святлана Скавырка, кавалі з Мсціслава і Баранавіч Сяргей Кудзікаў і Дзяніс Ашчэпкаў, вышывальшчык народных строяў з Гомеля Віктар Шыпкоў і іншыя знакамітыя рамеснікі і майстры. Госці фестываля маглі паўдзельнічаць у майстар-класах, набыць сувеніры. На галоўную сцэну каля мінскай ратушы, каб упрыгожыць свята, выйшлі музыкі, спевакі і танцоры, сярод іх былі вядомыя выканаўцы народны фальклорна-этнаграфічна ансамбль «Неруш», народны ансамбль танца «Белая Русь», узорны ансабль танца «Чабарок», узорны ансамбль народнай музыкі «Дударыкі», ансамбль гарманістаў «Кармянскія прымакі», народны ансамбль «Вязанка» з Асіповіцкага раёна і іншыя калектывы з розных рэгіёнаў краіны. 

Анатоль КЛЯШЧУК 

Фота аўтара