Падчас нарады, якая адбылася ў Савеце Рэспублікі, упаўнаважаны прадстаўнік Прэзідэнта ў Мінску заслухала інфармацыю аб выніках работы сталіцы за першае паўгоддзе, дала канкрэтныя ўстаноўкі на бліжэйшую перспектыву. У першую чаргу Старшыня Савета Рэспублікі звярнула ўвагу на выкананне паказчыкаў сацыяльна-эканамічнага развіцця горада. Наталля Качанава нагадала: на папярэдняй нарадзе было дамоўлена, што Мінск сур’ёзна дадасць па ўсіх паказчыках.
«Эканоміка — перш за ўсё, — падкрэсліла яна. — Пра гэта кажа кіраўнік дзяржавы. Будзе працаваць эканоміка — выканаем усе сацыяльныя гарантыі, якія абяцалі людзям. Нам сёння проста жыццёва неабходна сур’ёзна дадаць у аб’ёмах прадукцыі, якая выпускаецца. Гэтую задачу ставіць Прэзідэнт нашай краіны. Дзе магчыма, у адпаведнасці з магутнасцямі прадпрыемстваў, трэба падвоіць выпуск прадукцыі, якая карыстаецца попытам».
Наталля Качанава прывяла канкрэтныя прыклады. «Сёння на расійскім рынку запатрабаваныя ліфты — значыць іх трэба выпускаць, — паставіла яна задачу. — Што датычыцца Мінскага аўтамабільнага завода, сёння патрэбны аўтобусы. „Камунарка“, „Слодыч“ — усё сёння запатрабавана. Толькі трэба сур’ёзна працаваць над гэтым. Уладзімір Яўгенавіч (Кухараў, старшыня Мінгарвыканкама. — „Зв“.) быў ва Ульянаўскай вобласці, ён бачыў, наколькі там наша прадукцыя патрэбна. Таму трэба сур’ёзным чынам ставіць задачу нашым прадпрыемствам па павелічэнні аб’ёмаў выпускаемай прадукцыі. Той, якая сёння мае свайго пакупніка і рынкі збыту і ў Расіі, і ў іншых краінах. Сёння — акно магчымасцяў. У гэтым няма ніякага сумнення».
У гэтым плане, па словах Старшыні Савета Рэспублікі, вялікае значэнне мае супрацоўніцтва паміж рэгіёнамі Беларусі і Расіі. Яна расказала, што ўжо на стадыі падрыхтоўкі да Форуму рэгіёнаў Беларусі і Расіі, які ў канцы чэрвеня адбудзецца ва Уфе, заключаюцца кантракты і пагадненні.
Аднак, як акцэнтавала ўвагу Наталля Качанава, эфектыўна працуючы на экспарт (летась толькі лёгкая прамысловасць паставіла за мяжу прадукцыі на 2 мільярды долараў), важна не забываць і пра ўнутраны рынак. У гэтай сувязі пастаўлена задача — максімальна забяспечыць напоўненасць крам прадукцыяй айчыннай вытворчасці.
Асобна спікер спынілася на кадравым пытанні. Па словах Наталлі Качанавай, сёння патрэбна падбіраць такое кіраўніцтва, якое будзе выконваць даручэнні. «Мінск — не той горад, дзе мы не можам набраць кадры», — перакананая яна.
Звярнула ўвагу ўпаўнаважаны прадстаўнік кіраўнік дзяржавы ў горадзе і на пытанне забеспячэння годных умоў працы і бяспечнай вытворчасці. У гэтай сувязі кіраўнікам адміністрацый раёнаў сталіцы пастаўлена задача аб’ехаць усе прадпрыемствы і пракантраляваць выкананне даручэнняў.
«Так, ёсць старшыня Мінгарвыканкама, але кожная асобна ўзятая адміністрацыя — гэта зона вашай адказнасці, дзе вы павінны займацца ўсімі пытаннямі: пачынаючы ад эканомікі і заканчваючы правапарушэннямі, злачынствамі, — звяртаючыся да кіраўніцтва горада, акцэнтавала ўвагу Наталля Качанава. — Вы нясеце персанальную адказнасць за падведамасную вам тэрыторыю і тых людзей, якія там пражываюць».
Напрыканцы нарады Старшыня Савета Рэспублікі адзначыла, што калі ёсць пытанні, якія неабходна вырашаць на ўзроўні рэспубліканскіх органаў кіравання, або ёсць патрэба ў заканадаўчым урэгуляванні некаторых момантаў, кіраўнікі адміністрацый раёнаў Мінска могуць смела звяртацца да яе. «Не трэба баяцца таго, захаваеце вы сваю пасаду або не, — заўважыла Наталля Качанава. — Трэба баяцца іншага: каб мы захавалі мір і спакой».
Вераніка КАНЮТА
Фота БелТА
Як адзначаюць фінансавыя эксперты, рынак жылой нерухомасці выйшаў на беспрэцэдэнтна высокія паказчыкі па колькасці здзелак.
Якія прамашкі жанчын у адзенні выдаюць адсутнасць густу?
Хто здолее змяніць гісторыю ці змяніцца пад яе ўплывам?
