Беларускаму дзяржаўнаму педагагiчнаму ўнiверсiтэту iмя Максiма Танка прысвоены статус базавай арганiзацыi дзяржаў — удзельнiц СНД па падрыхтоўцы, перападрыхтоўцы i павышэннi квалiфiкацыi педагагiчных работнiкаў i спецыялiстаў у галiне iнклюзiўнай i спецыяльнай адукацыi. Такое рашэнне было прынята на пасяджэннi Савета па супрацоўнiцтве ў галiне адукацыi СНД у Маскве.
Як адзначае рэктар Аляксандр ЖУК, Беларускi дзяржаўны педагагiчны ўнiверсiтэт мае глыбокiя гiстарычныя каранi, аўтарытэт i прызнанне ў якасцi самай магутнай навукова-педагагiчнай школы па падрыхтоўцы настаўнiкаў-дэфектолагаў. У вераснi 2016 года на базе БДПУ быў створаны Iнстытут iнклюзiўнай адукацыi. Ён падтрымлiвае цесныя сувязi з навуковымi i адукацыйнымi арганiзацыямi краiн СНД, Швецыi, Германii, Нарвегii i Нiдэрландаў. Мiжнароднае супрацоўнiцтва рэалiзуецца ў розных формах: выкананнi сумесных навуковых даследаванняў i рэалiзацыi мiжнародных праектаў, акадэмiчным абмене студэнтамi i выкладчыкамi, распрацоўцы сумесных праграм сеткавай магiстратуры.
Унiкальныя магчымасцi з'явiлiся ў сувязi з нядаўнiм адкрыццём у Iнстытуце iнклюзiўнай адукацыi ў партнёрстве з Дзiцячым фондам ААН (ЮНIСЕФ) Рэспублiканскага рэсурснага цэнтра iнклюзiўнай адукацыi. Ён дазволiць забяспечыць высокую якасць падрыхтоўкi будучых педагогаў, павысiць квалiфiкацыю ўжо практыкуючых педагогаў, а таксама кансалiдаваць намаганнi сiстэмы адукацыi i грамадзянскай супольнасцi ў забеспячэннi якасцi iнклюзiўнай адукацыi для ўсiх яе ўдзельнiкаў.
Надзея НIКАЛАЕВА
Спасылкі
[1] https://zviazda.by/be/tags/nadzeya-nikalaeva
[2] https://zviazda.by/be/gramadstva
[3] https://zviazda.by/be/adukacyya
[4] mailto:nikаlаеvа@zviаzdа.bу
[5] https://zviazda.by/be/tags/myascovae-samakiravanne
[6] https://zviazda.by/be/tags/adukacyya