На працягу тыдня лепшыя калектывы вобласці выступаюць на летняй сцэне цэнтральнай плошчы горада. Праграма доўжыцца з 18 да 22 гадзін.
Савецкая плошча на гэтым тыдні выглядае па-асабліваму ўтульна і ажыўлена. Гродзенцы прыходзяць сюды вечарамі, каб атрымаць асалоду ад выступлення калектываў, якія маюць званні «народны», «заслужаны», «узорны». Усяго да Дня Незалежнасці выступяць 400 калектываў з усіх раёнаў вобласці.
— Артысты рады выступіць на абласной сцэне, — задаволена дырэктар Цэнтра культуры Воранаўскага раёна Ірына Камінская. — У некаторых калектывах, як напрыклад, у «Лявонаў», змяніўся склад ансамбля, і некаторыя яшчэ ў абласны цэнтр з канцэртам не выязджалі.
Удзельнікам канцэртаў імпануе, што на плошчы збіраецца нямала гледачоў. Гродзенцы прыходзяць сем'ямі, многія размяшчаюцца ў крэслах каля сцэны ці за столікамі летняга кафэ.
— Наш марафон мы назвалі «Талентаў россып — да Свята краіны», — расказала вядучы метадыст абласнога метадычнага цэнтра Святлана Дуброўская. — Ён праходзіць упершыню і прысвечаны аднаму з найважнейшых дзяржаўных свят — Дню Рэспублікі Беларусь. Многія вакальныя нумары выконваюцца на беларускай мове, танцы ў асноўным народныя. Гэта прэстыжна — прыняць удзел у такім марафоне.
Таксама на плошчы працуе інтэрактыўная дзіцячая пляцоўка і выстаўка-продаж выяўленчага і дэкаратыўна-прыкладнога мастацтва. Трэба адзначыць, што Савецкая плошча паступова набывае статус культурнага цэнтра Гродна. Тут пачаўся летні музычна-турыстычны сезон канцэртаў «Нядзеля ля Палаца».
Маргарыта УШКЕВІЧ
margo@zviazda.by [4]
Спасылкі
[1] https://zviazda.by/be/author/margaryta-ushkevich
[2] https://zviazda.by/be/gramadstva
[3] https://zviazda.by/be/regiyony-0
[4] mailto:margo@zviazda.by
[5] https://zviazda.by/be/tags/grodna
[6] https://zviazda.by/be/tags/dzen-nezalezhnasci
[7] https://zviazda.by/be/tags/kancerty