Многія тэлевізійныя праграмы разам са сваімі стваральнікамі летам адпачываюць. Тэлевізійны варыянт тэлевіктарыны «Размаўляем па-беларуску» — таксама. Таму да верасня ў эфіры тэлеканала «Беларусь 3» будуць ісці паўторы папулярнай праграмы. Але ж стваральнікі паклапаціліся пра тых, хто не збіраецца прыпыняцца ў вывучэнні беларускай мовы і падрыхтавалі арыгінальныя версіі друкаваных выпускаў.
Ці ведалі вы, што:
І дуды вобземлю. Што мы можам параіць чалавеку, калі ён ніяк не можа прыняць пэўнага рашэння, доўга вагаецца альбо марудна цягне справу да завяршэння? У такім выпадку можна сказаць: «Дык зрабі ж урэшце так ці гэтак — і дуды вобземлю!» Вельмі энергетычны выраз, насамрэч заахвочвае як мага хутчэй завяршыць справу. Гэты выраз мае і сінонімы, не менш сакавітыя: ужо й па клёцках, дый годзе.
Адкуль жа пайшоў такі вобразны выраз, адпаведны, скажам, рускаму «и дело с концом», украінскаму «та й по всьому»? Відаць, да яго ўзнікнення прычыніўся старадаўні звычай, калі дудары, адыграўшы, прыкладам, на вяселлі, кідалі дуды вобземлю на ўдалае завяршэнне вялікае справы.
Для тых, хто разважае пра свой удзел у тэлепраграме, нагадаем: каб стаць удзельнікамі, неабходна зайсці на сайт tvrgоmеl.bу [4] або 3bеlаrus.bу [5] і праз банер «Размаўляем па-беларуску» запоўніць заяўку на каманду з трох чалавек. Паўторы выпускаў тэлевіктарыны — у ранішнім эфіры «Беларусь 3» кожную суботу.
Ірына АСТАШКЕВІЧ
іоst@zvіаzdа.bу [6]
Спасылкі
[1] https://zviazda.by/be/tags/iryna-astashkevich
[2] https://zviazda.by/be/kaleydaskop
[3] https://zviazda.by/be/teletydzen
[4] http://www.tvrgomel.by/
[5] http://www.3belarus.by/
[6] mailto:іоst@zvіаzdа.bу
[7] https://zviazda.by/be/tags/razmaulyaem-pa-belarusku-0