Сёлета на Віцебшчыне запланавалі завяршыць аптымізацыю ўстаноў сістэмы адукацыі. Менавіта гэтае пытанне было ў цэнтры ўвагі на сесіі Віцебскага абласнога Савета дэпутатаў.
Рацыянальны падыход
Тэма хвалюе многіх жыхароў глыбінкі. Калі закрываюць школу ў вёсцы або сельская сярэдняя школа становіцца базавай, канешне, людзей гэта не радуе. Але ж што рабіць, калі вучні ў дэфіцыце? І штогод іх колькасць скарачаецца...
А пры гэтым трацяцца вялікія сумы на зарплаты настаўнікам, іншым работнікам, на аплату камунальных паслуг, рамонт і гэтак далей.
Старшыня абласнога Савета дэпутатаў Уладзімір Цярэнцьеў, дарэчы, нагадаў народным абраннікам, што на пачатку аптымізацыі было нямала незадаволеных. Многія часта не разумелі, навошта гэта рабіць. Але ж час паказаў, што быў выбраны правільны «вектар», бо закрываюць або рэарганізуюць толькі бесперспектыўныя ўстановы.
Сэканомленыя сродкі традыцыйна накіроўваюцца выключна на патрэбы адукацыі. Такім чынам паляпшаюцца ўмовы ў іншых школах, садках.
Як адзначыў начальнік упраўлення адукацыі Віцебскага аблвыканкама Дзмітрый Хома, за апошнія два гады, дзякуючы аптымізацыі, істотна павялічылася напаўняльнасць класаў у некалькіх раёнах, а паралельна змяншаецца кошт навучання аднаго вучня ў год.
— Увогуле, працу па эканоміі выдаткаў нельга ацэньваць толькі па закрыцці і рэарганізацыі ўстаноў. Гэта — комплекс мерапрыемстваў, накіраваных на аптымізацыю работнікаў, колькасці класаў, падгруп, класаў з музычнай накіраванасцю, на эканомію ад энергазберагальных мерапрыемстваў. Эфектыўнасць праведзенага — найважнейшы паказчык, — разважае Дзмітрый Хома.
Каб вазіць школьнікаў на заняткі, толькі летась купілі каля 60 аўтобусаў. А для тых хлопчыкаў і дзяўчынак, якім ездзіць вучыцца далёка, стварылі прышкольныя інтэрнаты. Яны ёсць ужо ў 15 з 21 раёна Віцебшчыны.
З мінулага ў будучыню
Школы ў глыбінцы і надалей будуць аптымізавацца. Напрыклад, на сесіі было агучана, што 37 будынкаў устаноў адукацыі з'яўляюцца непрыстасаванымі, 10 — у аварыйным стане. У больш чым 10 школах для ацяплення выкарыстоўваюць печы. А ў некалькіх — прыбіральня ў двары.
Будынкі не проста зачыняюць, а стараюцца выкарыстоўваць у новых мэтах. Для гэтага іх прадаюць на аўкцыёнах, і з 2010 па 2017 год больш за 90 купілі. Запланавана ўцягнуць у гаспадарчы абарот яшчэ 147 будынкаў. І ўсё больш прыкладаў, калі ў экс-школах арганізуюць новую вытворчасць. Дарэчы, школу можна набыць і пад жыллё.
Пра эфект ад аптымізацыі гаварылі і дэпутаты.
Старшыня Браслаўскага раённага Савета дэпутатаў Ніна Пучынская расказала пра вопыт раёна. Там, дарэчы, напаўняльнасць вучнямі ў сельскай мясцовасці прыкладна ў два разы меншая, чым у райцэнтры. Але і ў Браславе школы запоўнены не па поўнай, як той казаў. Ніна Пучынская лічыць, што закрываць школы, дзе вельмі мала вучняў, мэтазгодна. У выніку аптымізацыі на ўмацаванне матэрыяльна-тэхнічнай базы існуючых школ ужо накіраваны сотні тысяч рублёў.
А старшыня Верхнядзвінскага райсавета дэпутатаў Ірына Козел паведаміла пра магчымасць для развіцця сістэмы адукацыі выкарыстоўваць сродкі Міжнароднага банка рэканструкцыі і развіцця.
Дарэчы, у кожным раёне да 2022 года з'явіцца не менш за адну «Школу будучыні». Па абсталяванні яны павінны адпавядаць патрабаванням веку «высокіх тэхналогій». Яскравым прыкладам можна назваць СШ № 1 г. Дуброўна, дзе адпаведны праект ужо рэалізаваны.
Аляксандр ПУКШАНСКІ
Спасылкі
[1] https://zviazda.by/be/tags/alyaksandr-pukshanski
[2] https://zviazda.by/be/gramadstva
[3] https://zviazda.by/be/adukacyya
[4] https://zviazda.by/be/tags/adukacyya
[5] https://zviazda.by/be/tags/myascovae-samakiravanne
[6] https://zviazda.by/be/tags/vicebskaya-voblasc