Змяненні і дапаўненні ў палажэнне аб парадку планавання, правядзення і фінансавання капітальнага рамонту жылфонду ўнесены пастановай Савета Міністраў ад 21 студзеня 2019 года нумар 39, паведамляе БЕЛТА [1] са спасылкай на сайт урада.
У прыватнасці, пастановай удакладнены пералік работ пры капітальным рамонце жылых дамоў за кошт бюджэтных сродкаў і паступаючай ад насельніцтва платы за капрамонт. Дадаткова ў яго ўключаны работы па ўстаноўцы тэрмарэгулятараў на ацяпляльных прыборах у кватэрах, уладкаванне сістэмы дыстанцыйнага здыму паказанняў з прыбораў індывідуальнага ўліку расходу вады, газу. У пералік таксама ўключаны работы па рамонце, замене і ўладкаванні процідымнай абароны, установак проціпажарнай аўтаматыкі, рамонце сістэмы вентыляцыі, уладкаванні рэцыркуляцыі ўнутрыдамавой сістэмы гарачага водазабеспячэння (без уладкавання знадворных сетак) і іншыя віды работ.
Згодна з пастановай капітальны рамонт можна праводзіць адначасова з уцяпленнем фасадаў жылых дамоў. Гэта пытанне вырашаюць заказчык і ўласнікі, наймальнікі жылых памяшканняў на стадыі фарміравання задання на праектаванне.
Для таго каб пазбегнуць неабгрунтаванага выкарыстання бюджэтных сродкаў на капітальны рамонт жылфонду, у тэхнічныя ўмовы не будуць уключацца работы па замене і рамонце сетак і збудаванняў, што знаходзяцца ва ўласнасці, гаспадарчым веданні або ў аператыўным кіраванні арганізацый энергетыкі, сувязі, жыллёва-камунальнай гаспадаркі.
Дакументам вызначана магчымасць уключэння жылых дамоў таварыстваў уласнікаў і арганізацый забудоўшчыкаў у перспектыўную праграму і бягучыя графікі правядзення капітальнага рамонту з выкарыстаннем сродкаў мясцовых бюджэтаў.
Пастанова ўступае ў сілу пасля яе афіцыйнага апублікавання.
Палажэнне аб парадку планавання, правядзення і фінансавання капітальнага рамонту жыллёвага фонду зацверджана пастановай урада ад 21 красавіка 2016 года нумар 324.
Спасылкі
[1] https://www.belta.by/society/view/v-belarusi-izmenen-porjadok-planirovanija-i-provedenija-kapremonta-zhiljja-333660-2019/
[2] https://zviazda.by/be/tags/kapramont
[3] https://zviazda.by/be/tags/zhyllyo
[4] https://zviazda.by/be/tags/kapitalny-ramont-zhyllya