Кожную нядзелю сацыякультурны канал «Беларусь 3» расказвае «Арт-гісторыі» ў цыкле праграм, прысвечаным 80-годдзю Нацыянальнага мастацкага музея. З першых вуснаў — ад навуковых супрацоўнікаў музея — гледачы могуць даведацца пра самыя розныя калекцыі, ад старажытнага іканапісу да рэдкіх і ўнікальных узораў рускага, еўрапейскага і ўсходняга мастацтва ХІХ—ХХ стагоддзяў, і пра тое, які след у свеце пакінуў той ці іншы мастацкі твор. Напрыклад, даследчык старажытнабеларускага мастацтва Дзмітрый Салодкі расказаў пра беларускія познасярэднявечныя іконы на прыкладзе некалькіх абразоў Маці Божай Адзігітрыі і навучыў «счытваць» з іх пэўныя сакральныя коды. Іншымі «Арт-гісторыямі» падзеляцца знаўца рускага і беларускага мастацтва ХІХ—ХХ стагоддзяў Надзея Усава, спецыяліст па ўсходняй мастацкай культуры Мікіта Моніч, мастацтвазнаўца Наталля Сяліцкая і загадчыца аддзела сучаснага беларускага мастацтва Кацярына Ізафатава.
Дарэчы, усе гэтыя гісторыі можна не толькі ўбачыць, але і паслухаць у падкастах — аўдыяверсіях праграмы, якія будуць змяшчацца на сайце тэлеканала www.3 bеlаrus.bу па аўторках.
8 лютага адзначыць 70-годдзе вядомая актрыса тэатра і кіно, народная артыстка Расіі Ірына Мураўёва. Гледачы розных узростаў ведаюць і любяць яе па фільмах «Чыста англійскае забойства», «Карнавал», «Масква слязам не верыць», «Самая абаяльная і прывабная», «Артыстка з Грыбава», «Гэта жанчына ў акне» і многіх іншых, па серыяле «Не нарадзіся прыгожай», папулярнай у свой час дзіцячай тэлепраграме «Будзільнік», мультфільмах «Сабака ў ботах» і «Кошкін дом», па мноству рознахарактарных тэатральных пастановак... І мала хто з прыхільнікаў паверыць, што стаць прафесійнай актрысай Мураўёвай удалося далёка
не адразу — з першай спробы ўсе тэатральныя інстытуты адмовілі ёй, а на другі год дзяўчына ледзьве паспела ўскочыць у апошні вагон і паступіла ў вучэбную студыю пры Цэнтральным дзіцячым тэатры, а пасля ўсё ж такі скончыла Дзяржаўны інстытут тэатральнага мастацтва. Час расставіў усё на свае месцы, і ад невялікіх эпізодаў актрыса лагічна перайшла да цэнтральных роляў, за якія яе, уласна, палюбілі гледачы, — у 1982-м часопіс «Савецкі экран» нават назваў Мураўёву найлепшай актрысай года, а крыху пазней «Самую абаяльную і прывабную» паглядзела звыш 80 мільёнаў чалавек! Больш за 40 гадоў актрыса пражыла з адным мужам — рэжысёрам Леанідам Эйдліным, і выхавала дваіх сыноў, прычым не ў тэатральным закуліссі ці на здымачнай пляцоўцы, а дома, з лёгкасцю адмаўляючыся ад заманлівых прапаноў, калі гаворка ішла пра сям'ю...
Уласна, што тут яшчэ дадаць. 9 лютага не прапусціце на АНТ меладраму «Самая абаяльная і прывабная», а таксама падрыхтаваны расійскімі тэлевізійнікамі да юбілею актрысы дакументальны фільм «Больш сонца, менш суму».
Праект «Анекдот-шоу», рэалізаваны паводле добра забытага старога «Белага папугая» ўсюдыісным і неўтаймоўным экс-гульцом КВЗ, рэзідэнтам «Камедзі Клаб», шоўменам, акцёрам і рэжысёрам Вадзімам Галыгіным, — гэта своеасаблівы гумарыстычны спарынг з удзелам запрошаных зорак — людзей тэатра і кіно, спартсменаў, палітыкаў, тэлеперсон і г. д. Пераможцу ў паядынку вызначае адмысловы «смехамер» — прылада, якая замярае гучнасць смеху гледачоў у зале. Пераможца атрымлівае асаблівы прыз — прэмію «Залатая рыдлёўка».
Што цікава, амаль год шоу выходзіла ў інтэрнэт-прасторы — у відэатрансляцыях сацыяльнай сеткі «Аднакласнікі» (прычым пілотны выпуск набраў больш як чатыры мільёны праглядаў!). Толькі ў канцы 2018-га праграма пераехала на расійскі канал Рэн-ТБ, а ўжо адтуль трапіла ў эфір СТБ і, адпаведна, на вочы землякам. Мяркуйце самі, наколькі гэта смешна або сумна — па нядзелях, у 23.30.
Спасылкі
[1] https://zviazda.by/be/kaleydaskop
[2] https://zviazda.by/be/teletydzen
[3] https://zviazda.by/be/tags/shto-paglyadzec