Музей жывой гісторыі пад адкрытым небам разгорнецца на адзін дзень 25 мая ў Гомельскім дзяржаўным універсітэце імя Ф.Скарыны, паведамляе [1]БЕЛТА са спасылкай на ВНУ.
На дзесяці інтэрактыўных пляцоўках удзельнікі студэнцкай навукова-даследчай лабараторыі "Белы крыж", прадстаўнікі клубаў гістарычнай рэканструкцыі Беларусі і блізкага замежжа раскажуць аб рэаліях, быце і рамёствах сярэдневякоўя.
Пакаштаваць стравы па рэцэптах кулінарных кніг, узрост якіх вымяраецца сотнямі гадоў, будзе прапанавана на сярэдневяковай кухні. Асобную лакацыю прысвецяць медыцыне і знахарству таго часу. Тут жа арганізуюць майстар-класы па прыгатаванні гаючага зелля і травяных настояў. Навучаць у музеі пад адкрытым небам і сярэдневяковым танцам, выконваць якія будуць пад музыку эпохі.
У экспазіцыі баявой часткі лагера прадэманструюць воінскія даспехі і зброю канца XIV-пачатку XV стагоддзяў, а ў бытавой - сярэдневяковыя шатры, мэблю, касцюмы і рэчы, якія выкарыстоўваліся ў штодзённым жыцці.
Відовішчным і эмацыянальным абяцае стаць турнір капейшчыкаў, адзетых у рэплікі рыцарскіх даспехаў і шлемы. Пікінёры прадэманструюць розныя прыёмы валодання кап'ём, рэканструяваныя з сярэдневяковых кніг па фехтаванні.
Таксама гасцей гістарычнага свята запросяць спасцігнуць навыкі кавальскай справы, паспрабаваць свае сілы ў стральбе з лука, згуляць у настольныя гульні і інш.
Экскурсіі з паясненнем па тэматычных пляцоўках музея пад адкрытым небам правядуць студэнты гістарычнага факультэта Гомельскага дзяржуніверсітэта і ўдзельнікі клубаў гістарычнай рэканструкцыі.
"Мерапрыемства пройдзе пяты раз ужо. Штогод пашыраецца яго фармат, павялічваецца колькасць экспанатаў, удзельнікаў і гасцей", - адзначылі ў ВНУ. Галоўная мэта музея пад адкрытым небам - абудзіць цікавасць да вывучэння гісторыі. Мерапрыемства аб'ядноўвае моладзь, прафесійных і пачынаючых рэканструктараў, усіх людзей, якія цікавяцца гісторыяй.
Спасылкі
[1] https://www.belta.by/culture/view/turnir-na-kopjjah-i-master-klass-po-srednevekovym-tantsam-provedut-v-muzee-zhivoj-istorii-v-gomele-348213-2019/
[2] https://zviazda.by/be/tags/muzey
[3] https://zviazda.by/be/tags/gistoryya
[4] https://zviazda.by/be/tags/gomel
[5] https://zviazda.by/be/tags/gomelski-dzyarzhauny-universitet-im-fskaryny