Пытаннi iнтэграцыi Беларусi i Расii былi ў фокусе ўвагi сустрэчы ў Палацы Незалежнасцi Прэзiдэнта Беларусi з дзяржаўным сакратаром Саюзнай дзяржавы Рыгорам Рапотам. Аляксандр Лукашэнка нагадаў пра асноўныя праблемныя пытаннi. Па словах беларускага лiдара, iх шмат...
Кiраўнiк дзяржавы падкрэслiў, што яны з лiдарам Расii дамовiлiся не ламаць дагавор аб стварэннi Саюзнай дзяржавы. «Мы дамовiлiся з Прэзiдэнтам Пуцiным, што не будзем ламаць дагавор. Калi мы ўлезем у ломку дагавора, мы разбурым усё, што створана за гэты час. Гэта па-першае, а па-другое, дагавор ў поўным аб’ёме не рэалiзаваны. Ён сёння актуальны, таму прэзiдэнты вырашылi — нельга чапаць дагавор. Трэба проста выпрацаваць дакументы, матэрыялы. Мы назвалi гэта праграмай дзеянняў па далейшай iнтэграцыi Беларусi i Расii ў рамках Саюзнага дагавора», — паведамiў Прэзiдэнт Беларусi.
Ён адзначыў, што ўжо дадзены адказ на галоўнае пытанне, якое турбавала ўсiх, — цi будзе аб’яданне краiн. «Гэтага сёння рабiць не трэба. Нават размаўляць на гэту тэму. I Пуцiн на гэту тэму адказваў, i я тым больш. Няма такой неабходнасцi», — запэўнiў Аляксандр Лукашэнка.
Каб рэалiзаваць палажэннi саюзнага дагавора, трэба рухацца паступова, крок за крокам, лiчыць беларускi лiдар. Ключавыя пытаннi знойдуць увасабленне ў праграме дзеянняў па рэалiзацыi саюзнага будаўнiцтва.
«Ёсць пытаннi бягучыя, без вырашэння якiх няма чаго гаварыць пра нейкую iнтэграцыю, нейкiя праграмы. Калi чалавек сёння галодны ходзiць, што яму пра камунiзм гаварыць i нешта абяцаць?» — задаў рытарычнае пытанне беларускi Прэзiдэнт.
На парадку дня саюзнай iнтэграцыi, на думку Аляксандра Лукашэнкi, шматлiкiя бягучыя пытаннi. Сярод iх — абмежаваны доступ беларускiх прадпрыемстваў на расiйскi рынак.
«Напрыклад, у нас сёння каля 80 прадпрыемстваў закрытыя Рассельгаснаглядам цi нейкiм там органам у Расii, а можа быць, i ўрадам. Хутчэй за ўсё, урадам. Закрытыя да паставак нашай прадукцыi ў Расiю. Прытым па надуманых падставах. Бо можна прыняць i абгрунтаваць любое рашэнне, — адзначыў Аляксандр Лукашэнка. — Калi мы так адно з адным сёння будуем адносiны, слухайце, аб якой агульнай валюце i ўваходжаннi цi аб’яднаннi дзяржаў можна гаварыць? Трэба расчысцiць гэта. Гэтага проста быць не павiнна ў адносiнах памiж дзвюма дзяржавамi».
Яшчэ адно пытанне — доступ беларускiх прадпрымальнiкаў да дзяржзаказаў у Расii. «Усе павiнны быць у роўных умовах — i прадпрыемствы Расii, i Беларусi», — звярнуў увагу беларускi Прэзiдэнт.
Сярод надзённых праблем i прамысловая кааперацыя, i падатковы манеўр, мiнулi тэрмiны па перамовах на пастаўкi прыроднага газу i нафты. Вырашаючы стратэгiчныя пытаннi, бакi дамовiлiся разбiрацца i з тактычнымi. «Без вырашэння гэтых пытанняў з нашага боку i размаўляць няма пра што. Маса праблем», — сказаў Аляксандр Лукашэнка.
«Вы павiнны гэта трымаць пад кантролем проста. I ўдзельнiчаць у гэтых перамовах як кiраўнiк апарата Саюзнай дзяржавы, — звярнуўся беларускі Прэзідэнт да Рыгора Рапоты. — Я гэта кажу да таго, што ўжо прайшло столькi перамоваў, i вось мне сёння дакладваюць, што адны абяцаннi. Перамоўная група натыкнулася на нейкае пытанне — урад Расii абяцае даць, у тым лiку прэм’ер Мядзведзеў, усе каманды, распараджэнні, каб у комплексе вырашаць пытаннi. Таму што вызначана тактыка вядзення перамоў: паабяцалi — забылiся, другi раз паабяцалi — забылiся. Гэта значыць, iдзе незразумелае тармажэнне гэтых працэсаў».
«I чаму я так публiчна пра гэта кажу: таму, што ўжо „заўтра“ нам сустракацца з Прэзiдэнтам Пуцiным у Пiцеры. I абмяркоўваць вынiкi гэтых перамоваў. А абмяркоўваць няма чаго на сённяшнi дзень. Таму я б папрасiў вас узяць гэта пад кантроль i iнiцыяваць, паставiць жорстка пытанне перад расiйскiм бокам аб тым, што мы павiнны ўжо лiтаральна за некалькi дзён выйсцi на нейкiя вынiкi. Каб мы маглi выпрацаваць парадак дня i абмяркоўваць гэтыя пытаннi з Прэзiдэнтам Пуцiным 17-18 лiпеня ў Пiцеры. Проста сустрэцца i пасядзець адзiн перад адным, нi пра што не гаварыць — напэўна, гэты час ужо сышоў», — сказаў Аляксандр Лукашэнка.
Сустрэча прэзiдэнтаў Беларусi i Расii запланавана, па словах Аляксандра Лукашэнкi, 17-18 лiпеня ў Санкт-Пецярбургу i Валааме. «Трэба, дамовiўшыся тут, потым фармалiзоўваць на Вышэйшым дзяржаўным савеце гэтыя дакументы, але папярэдне разглядзець на саюзным саўмiне. Часу зусiм не засталося. Загналi сябе ў кут i нiчога не робiм для таго, каб выйсцi адтуль», — заключыў Прэзiдэнт Беларусi.
На думку Рыгора Рапоты, вырашыць бягучыя праблемы да сустрэчы прэзідэнтаў Расіі і Беларусі ў Санкт-Пецярбургу наўрад ці магчыма. «Для таго каб вырашыць любую задачу, неабходны два складнікі. Першы — гэта палітычная воля і, зразумела, узаемаразуменне. І другі — дастатковы ўзровень кампетэнцыі ў выканаўца», — сказаў Рыгор Рапота.
Дзяржаўны сакратар Саюзнай дзяржавы падкрэсліў, што Пастаянны камітэт Саюзнай дзяржавы гатовы ўдзельнічаць у абмеркаваннях праблемных пытанняў інтэграцыі Беларусі і Расіі ў рамках дзейнасці сумеснай рабочай групы.
Рыгор Рапота пагадзіўся са сцвярджэннем Аляксандра Лукашэнкі, але паказаў на адсутнасць прадстаўнікоў Пастаяннага камітэта ў складзе створанай рабочай групы. «Ёсць адна дэталь. Яна заключаецца ў тым, што Пастаянны камітэт не ўключаны ў рабочую групу па пытаннях інтэграцыі Беларусі і Расіі, таму мне вельмі складана каментаваць, пра што яны там дамовіліся. Гэта значыць, я ў курсе спраў у цэлым, але мне цяжка каментаваць па сутнасці нейкіх дамоўленасцяў або недамоўленасцяў».
Па словах Рыгора Рапоты, у саюзным дагаворы шмат пазіцый, якія патрабуюць развіцця. Гэта, напрыклад, адзіная прамысловая палітыка, транспартная і энергетычная прастора. На думку дзяржаўнага сакратара, справа не ў прававых пытаннях — патрэбны сумесныя значныя праекты, якія б стваралі такую адзіную прастору.
Марыя ДАДАЛКА
Фота БелТА
Спасылкі
[1] https://zviazda.by/be/author/maryya-dadalka
[2] https://zviazda.by/be/palityka
[3] https://zviazda.by/be/prezident
[4] https://zviazda.by/be/tags/prezident
[5] https://zviazda.by/be/tags/aliaksandr-luka%C5%A1enka
[6] https://zviazda.by/be/tags/sayuznaya-dzyarzhava
[7] https://zviazda.by/be/tags/rygor-rapota