Леташні рэкорд па святкаванні Дня танкіста ўсё ж быў пабіты. Арганізатары "Wargamіng Fest: Дзень танкіста" — кампанія Wargamіng, Мінскі гарвыканкам і Мінабароны Рэспублікі Беларусь — заявілі, што ў нядзелю ў парку Перамогі пабывала каля 250 000 чалавек з 28 краін.
Аднак колькасць людзей, якія далучыліся да вялікага свята, была значна большая — у анлайне за тым, што адбывалася, сачыла больш за 2,6 мільёна чалавек.
«Мы пачалі падрыхтоўку да гэтага свята роўна год таму і стараліся ўлічыць увесь напрацаваны вопыт, каб зрабіць знаходжанне гасцей на гэтым фестывалі максімальна камфортным, — адзначыў галоўны арганізатар «Wargamіng Fest: Дзень танкіста» Максім Грачоў. — І, мяркуючы па атрыманых водгуках, а таксама па колькасці ўдзельнікаў, якія наведалі мерапрыемства, у нас усё атрымалася: мы падарылі людзям сапраўднае свята і пацвердзілі статус найбуйнейшага фестывалю інтэрактыўных забаў у Еўропе».
Сёлета фестываль прыбавіў у маштабах і размясціўся на тэрыторыі каля 100 гектараў. Гасцям была прадстаўлена значна пашыраная ў параўнанні з мінулым годам праграма забаў для ўсёй сям'і: звыш 120 зон, пачынаючы ад гіганцкага танкатвістара, гульнявых аўтаматаў і мудрагелістых лабірынтаў і заканчваючы майстар-класамі па брэйк-дансе і стварэннем слаймаў. Акрамя таго, на тэрыторыі «Wargamіng Fest: Дзень танкіста» размясціліся звыш 30 фотазон, 130 фуд-кортаў, а таксама яркія інтэрактыўныя пляцоўкі ад партнёраў свята.
Гарачыя баі праходзілі на самай вялікай пляцоўцы відэагульняў пад адкрытым небам у Беларусі — тут было размешчана больш за 200 камп'ютараў, на якіх гульцы змагаліся ў World of Tanks. На пляцоўцы мабільнай весріі World of Tanks Blіtz тры гульцы-пераможцы атрымалі ад арганізатараў смартфоны Honor 10. У дэманстрацыйнай зоне госці маглі пазнаёміцца з новым экшэнам пра спецназ «Калібр».
Акрамя таго, у «Прэміум-ангары» была абсталяваная дадатковая гульнявая зона на больш чым 100 камп'ютараў. Менавіта тут прайшоў міжнародны турнір «Сталёвы паляўнічы: бітва блогераў», у якім 20 блогераў змагаліся за буйны суперпрыз. Трэцяе месца і 150 000 расійскіх рублёў заслужыў удзельнік пад нікам Cresp1ks, другое месца і 250 000 зноў дасталіся блогеру __NІDІN__, і нарэшце першае месца і прыз у 500 000 заваяваў знакаміты ў свеце «танкаў» LeBwa.
На галоўнай сцэне адбыўся матч кланавага суперкубка па World of Tanks, у якім прынялі ўдзел найлепшыя каманды RU- і EU-рэгіёнаў. У выніку каманда [MERCY] Моніка з RU-рэгіёна перамагла каманду [DE—VІ] Delіcіous Vіcіous з EU-рэгіёна і выйграла прыз у $ 25 000, а таксама брэндаваныя прызы ад партнёра свята.
На галоўнай сцэне артысты, запрошаныя на фестываль, сваімі песнямі разварушылі і сагрэлі гасцей свята, падняўшы ім настрой і дадаўшы ў свята запалу і агню. Айчынная група «Крамбамбуля» дала добры старт сваімі знакамітымі песнямі, якія ў Беларусі мала хто не ведае. Працягнулі запальваць ўкраінскія «Воплі Відаплясава» і як след завялі публіку ўжо з першых песень. Пасля перапынку расійская група «Звяры» выканала і свае самыя завадныя песні. І нарэшце, госці з Каліфорніі The Offsprіng завяршылі гэты вечар «выбухным» сэтам сваіх забойных хітоў.
Завяршыўся «Wargamіng Fest: Дзень танкіста» грандыёзным феерверкам.
Іван КУПАРВАС
Фота аўтара і арганізатараў
Спасылкі
[1] https://zviazda.by/be/tags/ivan-kuparvas
[2] https://zviazda.by/be/gramadstva
[3] https://zviazda.by/be/tags/wargaming-fest-dzen-tankista
[4] https://zviazda.by/be/tags/feerverk
[5] https://zviazda.by/be/tags/festyval
[6] https://zviazda.by/be/tags/svyata