У рамках святочных мерапрыемстваў, прысвечаных Дню беларускай навукі, з 20 па 25 студзеня Нацыянальная акадэмія навук Беларусі праводзіць “Тыдзень навукі”.
Усе жадаючыя могуць бясплатна наведаць Музей гісторыі НАН Беларусі, пазнаёміцца з унікальнымі экспанатамі археалагічнай экспазіцыі Інстытута гісторыі НАН Беларусі і Музея старажытнабеларускай культуры Цэнтра даследаванняў беларускай культуры, мовы і літаратуры. У гэтыя дні расчыняць дзверы навуковыя ўстановы Нацыянальнай акадэміі навук. Для правядзення групавых экскурсій неабходна накіраваць заяўку. Вядомыя навукоўцы і маладыя даследчыкі сустрэнуцца з навучэнцамі, выступяць у школах, сярэдніх і вышэйшых навучальных установах з навукова-папулярнымі лекцыямі.
Музей гісторыі НАН Беларусі з'яўляецца мемарыяльным комплексам гісторыі Нацыянальнай акадэміі навук Беларусі і адначасова культурна-асветніцкай установай. На плошчы каля 250 кв. м. тут размешчана больш за 3,5 тысячы экспанатаў, якія адлюстроўваюць гісторыю станаўлення і развіцця навукі ў Беларусі, стварэнне і развіццё навуковых напрамкаў, навуковую і навукова-практычную дзейнасць вучоных, навуковых падраздзяленняў і інстытутаў, станаўленне акадэмічных навуковых школ у галіне прыродазнаўчых, тэхнічных , медыцынскіх і гуманітарных навук, выбітныя дасягненні беларускіх вучоных, міжнародныя навуковыя сувязі, пытанні дзяржаўнага кіраўніцтва навукай.
Тэлефон для кантактаў па наведванні музея: 8 (029) 241-52-10 (Аляксандр).
Надзея НІКАЛАЕВА
Прэв'ю: blog.predanie.ru
Спасылкі
[1] https://zviazda.by/be/tags/navuka
[2] https://zviazda.by/be/tags/tydzen-navuki
[3] https://zviazda.by/be/tags/nacyyanalnaya-akademiya-navuk