Аўтамабільнае паліва ў Беларусі даражэе з 20 кастрычніка на 1 капейку, паведамляе сайт канцэрна «Белнафтахім».
«Канцэрнам „Белнафтахім“ прынята рашэнне аб павелічэнні гранічных максімальных рознічных цэн на паліва. З 20 кастрычніка цана бензіну АІ-92-К5-Еўра складзе Br1,69, АІ-95-К5-Еўра — Br1,79, АІ-98-К5-Еўра — Br2,01, ДП — Br1,79», — паведамілі ў «Белнафтахіме».
У канцэрне адзначылі, што ўзровень коштаў на маторнае паліва ў Беларусі ў бягучым годзе працягвае заставацца ніжэйшым, чым у сумежных дзяржавах, на 15-46% і вышэйшым на 16%, чым у Расіі, дзе ўжываецца дэмпфіроўны механізм цэнаўтварэння.
«Канцэрн захоўвае стратэгію паэтапнай карэкціроўкі цэнаў на маторнае паліва, якая дазволіла не дапусціць рэзкіх цэнавых ваганняў і скокаў у перыяд пасяўной і ўборачнай кампаній. Таксама максімальна рэалізаваны магчымасці па іх стрымліванні без шкоды для эканомікі прадпрыемстваў нафтаперапрацоўкі, нягледзячы на негатыўны ўплыў знешніх эканамічных фактараў», — дадалі ў «Белнафтахіме».
Спасылкі
[1] https://zviazda.by/be/tags/autamabilnae-paliva-0