Сёння ў Музеі гісторыі прыватнага калекцыянавання адкрылася выстава бляшанак, скрынак і шкатулак для чая з прыватнай калекцыі Сяргея Лашкова «Five o’clock. Чай па-англійску», паведамілі [1] БелТА ў музеі.
Пачатак калекцыі быў пакладзены каля 20 гадоў таму. Калекцыянер звярнуў увагу на бляшанкі, якія, як лічыцца, прымяняюцца для гарбаты больш высокай якасці. У першую чаргу ўвагу прыцягнуў дызайн, які для кожнага гатунку гарбаты быў розным. Спачатку гэта былі класічныя карціны з гісторыі Вялікабрытаніі. Новыя калекцыі англійскага чаю выходзілі штогод. І калі спачатку Сяргей Лашко збіраў бляшанкі, якія сустракаліся ў беларускіх гандлёвых сетках, то з часам калекцыя стала папаўняцца пакункамі з Украіны, Расіі, краін Балтыі, Германіі, Францыі, а самыя эксклюзіўныя калекцыянер замаўляе напрамую з Лондана.
Цяпер у віцябляніна каля 200 чайных шкатулак, скрынак і бляшанак. Гэта асобныя сезонныя і тэматычныя серыі і наборы са спецыяльна падабранымі смакамі: «Замкі Англіі», рэдкая калекцыя «Алімпіяда ў Лондане», Art of Tea, «Калекцыя караля Эдварда», Fine Tea Collection, наборы, прысвечаныя Лондану. Ёсць і калекцыя «Каралеўскае вяселле Уільяма і Кейт» — серыя з партрэтамі каралеўскай сям’і, якая была выпушчаная ў гонар вяселля прынца Гары і Меган Маркл, а таксама бляшанкі з фатаграфіяй каралевы Лізаветы II, калядныя музычныя скрыначкі з гарбатай, навагоднія калекцыі.
«Чаяванне асацыюецца з ачагом і домам і сімвалізуе векавыя традыцыі Брытаніі: ветлівае грамадства і сціплае хатняе жыццё. Дакрануцца да традыцый англійскага чаявання і бліжэй пазнаёміцца з культурай гэтай краіны можна дзякуючы ўнікальнай калекцыі Сяргея Лашкова, якая выстаўляецца ўпершыню. Яна адлюстроўвае цесную ўзаемасувязь традыцый чаявання з англійскім ладам жыцця і культурай», — адзначылі ў музеі.
Выстава будзе працаваць да 3 мая.
Спасылкі
[1] https://www.belta.by/culture/view/prikosnutsja-k-traditsijam-anglijskogo-chaepitija-predlagajut-na-vystavke-v-vitebske-430183-2021/
[2] https://zviazda.by/be/tags/vystava
[3] https://zviazda.by/be/tags/chay
[4] https://zviazda.by/be/tags/vyalikabrytaniya