О, часы, о, норавы... А цяпер да гэтага даўняга хочацца яшчэ і дадаць — о, тэхналогіі... Не гэтага мы, мабыць, чакалі ад іх развіцця... («Са з'яўленнем кругласутачнай службы дастаўкі ў нас знікла цудоўная магчымасць пазваніць позна ўвечары ў дзверы да суседкі з просьбай пазычыць солі».) Чулі, што ў Даніі нядаўна ўступіў у сілу закон, паводле якога ўяўная згода на секс павінна стаць абавязковай? Без яе той лічыцца згвалтаваннем. («Калі з жанчынай няма праблем, прыглядзіцеся больш уважліва. Магчыма, гэта не жанчына».) Для гэтага распрацавалі дадатак іConsent, які працуе па прынцыпе заключэння дагавора: ён аб'ядноўвае два бакі, выкарыстоўваючы іх нумары тэлефонаў, і дазваляе завяршыць транзакцыю на працягу хвіліны. У гэтым выпадку ўзаемная згода суадносіцца з адным інтымным кантактам. («Дзяўчаты! Стаўцеся да мужчын больш гуманна. Злавілі вечарам — адпусціце ранкам!»)
Згода на яго заканчваецца праз 24 гадзіны і можа быць адклікана ў любы момант. («— Яна змяніла нумар тэлефона, заблакавала яго ў сацсетках, змяніла адрас, зрабіла ўсё, каб ён не змог яе больш знайсці... — А ён? — А ён і не шукаў...») Дадатак выклікаў хвалю незадаволенасці ў краіне, многія датчане назвалі яго «вялікім глупствам». Газета Berlіngske напісала пра яго: «Нарэшце з'явіўся дадатак, які робіць секс такім жа несексуальным, як каранацыённая прэс-канферэнцыя». Юрысты таксама адзначылі, што згода наўрад ці працягнецца, нават у судзе, паколькі кожны мае права змяніць сваё рашэнне ў любы момант. («У Адэсе. — Софачка такі нездарма скончыла курсы кройкі і шыцця! Вы б паслухалі, як яна крые, калі адшывае!»)
З іншага боку, калі працягнуць размову пра тэхналогіі, менавіта яны прыйшлі на дапамогу многім у складаныя часы пандэміі каранавіруснай інфекцыі. Тут ужо ад чалавека залежыць, на што ён гатовы і да чаго падрыхтаваны. («— Адукацыя? — Сем гадоў ва «УКантакце» і чатыры гады ў «Інстаграме». — Прафесія? — Цік-Токар шостага разраду».) Так, гэтая навала парушыла планы многіх закаханых у свеце: праз яе жаніхі і нявесты пераносілі дні сваіх вяселляў. Таму ўжо летась COVІD-19 прымусіў улады некаторых краін (Марока, ААЭ) ці асобных штатаў дзяржаў (напрыклад, Каліфорніі, малазійскага Селангора) пайсці ім насустрач і дазволіць заключаць афіцыйныя шлюбы анлайн, выдаючы віртуальныя пасведчанні. («Пасля разводу Маша яшчэ тры гады пакутавала па вечарах ад фантомных боляў».) У Нью-Ёрку было абвешчана пра запуск «Праекта «Купідон» — спецыяльнай платформы для закаханых горада. Прысутнічаць пры рэгістрацыі саюза асабіста ўжо было не патрэбна: ні маладым, ні чыноўнікам, якія на самаізаляцыі маглі праводзіць відэаканферэнцыі. («Інтэрнэт — як жанчына. Толькі ім авалодаў, а ён ужо авалодаў табой».)
А ў Брытаніі мужчына зрабіў прапанову любай пры дапамозе наземнага робата Starshіp для дыстанцыйных даставак заказаў з супермаркетаў падчас каранціну. («Тата ўстанавіў у прыбіральні разетку, каб мама магла сядзець там з тэлефонам, калі ў таго скончыцца зарадка. Вось гэта я разумею — каханне! А не вашы гэтыя ўсе букеты!») Яшчэ да пандэміі на працягу двух гадоў робаты кампаніі дастаўлялі прадукты людзям, але попыт на паслугу істотна павялічыўся з пачаткам самаізаляцыі. Але справа ў тым, што такім чынам абслугоўваліся толькі жыхары горада Мілтан-Кінс, а ў населеным пункце, дзе пражывалі закаханыя, якія пачалі сустракацца перад першым лакдаўнам і пазней сталі жыць разам, такіх паслуг не было. Але дзяўчыне Шэры так спадабаліся гэтыя робаты, што яе хлопец Бен Хоган звярнуўся ў кампанію з просьбай даслаць аднаго такога ў горад Кемпстан з... заручальным пярсцёнкам. І мужчыне не адмовілі! («— Ён такі высакародны, мама! Калі я выходзіла з аўтобуса, ён спецыяльна для мяне выламаў дзверы...») Пісалі, што дата вяселля будзе залежаць ад сітуацыі з эпідэміяй каранавіруса ў Вялікабрытаніі, але пара спадзяецца, што робат Starshіp даставіць ім пярсцёнкі да алтара. Такая вось рамантыка на сучасны капыл... («— Чаму вы разводзіцеся? — З-за сексу. — У сэнсе, рэдка ім займаецеся? — Не, часта, але неадначасова».)
Але ў шлюбу, як і ў медаля, ёсць два бакі. І тое, што пачыналася так прыгожа, можа скончыцца зусім не радасна... У Аўстраліі з-за пандэміі каранавіруса і каранціну назіраўся ўсплёск разводаў. («Яна: — Варта мне было з табой пераспаць, як ты адразу выдаліў мяне з сяброў у «Аднакласніках». І як гэта разумець? Ён: — Я з сябрамі не сплю».) Там пад такія справы нават выдзелілі асобную чаргу, але суды ўсё роўна былі заваленыя работай. Таму ўлады распрацавалі бясплатны інтэрнэт-сэрвіс, які дапамагае ўпарадкаваць гэты працэс. («— Дарагі, я сыходжу ад цябе... — Ну, давай хоць прыляжам на дарожку...») Праграма аналізуе тысячы папярэдніх варыянтаў распаду сем'яў і, супастаўляючы іх з канкрэтным выпадкам, выдае свае варыянты. Сэрвіс дапамагае скласці дагавор аб апецы над дзіцем або падзяліць маёмасць. Усё гэта дзеля таго, каб пазбегнуць судовага працэсу, які можа расцягнуцца надоўга і каштаваць пад 150 тысяч долараў. Праўда, распрацоўшчыкі заяўляюць, што ўсе гэтыя парады маюць сэнс, толькі калі муж і жонка «разбягаюцца» мірна. Калі ёсць спрэчкі, штучны інтэлект бяссільны. («— Сёння паехалі з жонкай разводзіцца. І не даехалі. — Чаму? — Пасварыліся!»)
Кастусь ХАЦЕЛАЎ-ЗМАГЕЛАЎ
Спасылкі
[1] https://zviazda.by/be/tags/kastus-hacelau-zmagelau
[2] https://zviazda.by/be/kaleydaskop
[3] https://zviazda.by/be/tags/sex-balyasy
[4] https://zviazda.by/be/tags/tehnalogii
[5] https://zviazda.by/be/tags/sluzhba-dastauki
[6] https://zviazda.by/be/tags/pazvanic-susedcy
[7] https://zviazda.by/be/tags/daniya
[8] https://zviazda.by/be/tags/zgvaltavanne
[9] https://zviazda.by/be/tags/zgoda-na-seks-0
[10] https://zviazda.by/be/tags/prykladanne-iconsent
[11] https://zviazda.by/be/tags/tranzakcyya
[12] https://zviazda.by/be/tags/palavy-akt
[13] https://zviazda.by/be/tags/sacsetki
[14] https://zviazda.by/be/tags/pandemiya
[15] https://zviazda.by/be/tags/karanavirusnaya-infekcyya
[16] https://zviazda.by/be/tags/ukantakce-0
[17] https://zviazda.by/be/tags/instagram-4
[18] https://zviazda.by/be/tags/zhanihi-i-nyavesty
[19] https://zviazda.by/be/tags/covid-19
[20] https://zviazda.by/be/tags/maroka
[21] https://zviazda.by/be/tags/aae
[22] https://zviazda.by/be/tags/kaliforniya
[23] https://zviazda.by/be/tags/malaziyski-selangor
[24] https://zviazda.by/be/tags/aficyynyya-shlyuby
[25] https://zviazda.by/be/tags/virtualnyya-pasvedchanni
[26] https://zviazda.by/be/tags/fantomnyya-boli
[27] https://zviazda.by/be/tags/nyu-york-3
[28] https://zviazda.by/be/tags/praekt-kupidom
[29] https://zviazda.by/be/tags/specyyalnaya-platforma
[30] https://zviazda.by/be/tags/zakahanyya-gorada
[31] https://zviazda.by/be/tags/registracyya-sayuza
[32] https://zviazda.by/be/tags/samaizalyacyya
[33] https://zviazda.by/be/tags/videakanferencyya
[34] https://zviazda.by/be/tags/brytaniya
[35] https://zviazda.by/be/tags/robat-starship
[36] https://zviazda.by/be/tags/miltan-kins
[37] https://zviazda.by/be/tags/kempstan
[38] https://zviazda.by/be/tags/zaruchalny-pyarscyonak
[39] https://zviazda.by/be/tags/altar
[40] https://zviazda.by/be/tags/adnaklasniki
[41] https://zviazda.by/be/tags/australiya
[42] https://zviazda.by/be/tags/skasavanne-shlyubu
[43] https://zviazda.by/be/tags/internet-servis
[44] https://zviazda.by/be/tags/razvodzicca-mirna
[45] https://zviazda.by/be/tags/shtuchny-intelekt