Прэм’ер-міністр Беларусі Раман Галоўчанка ў час сустрэчы ў Ерэване з прэм’ер-міністрам Арменіі Ніколам Пашынянам расказаў аб прапанове беларускага боку стварыць сумесную вытворчасць ліфтаў у Арменіі, паведамляе [2] БелТА.
«Гістарычныя сувязі, якія звязваюць нашы народы, вельмі моцныя і паспяхова праходзяць выпрабаванні часам. Што датычыцца гандлёва-эканамічных адносін, за апошнія гады мы зрабілі вельмі добрыя крокі наперад і нарасцілі тавараабарот. Прыемна, што знешні гандаль збалансаваны: расце як беларускі экспарт у Арменію, так і пастаўкі з Арменіі ў Беларусь. Растуць інвестыцыі. Гэта таксама дарога з двухбаковым рухам. Павялічваецца колькасць прадпрыемстваў з удзелам беларускага капіталу, якія зарэгістраваны ў Арменіі, а таксама з удзелам армянскага капіталу — у Беларусі. Гэта адлюстраванне таго, што мы на розных узроўнях актыўна і эфектыўна працуем», — сказаў Раман Галоўчанка.
Ён падкрэсліў, што важна не проста гандляваць, але і рэалізоўваць сумесныя праекты. «Мы разглядаем пытанні супрацоўніцтва ў галіне машынабудавання, стварэння сумесных вытворчасцей. Беларускія ліфты вельмі запатрабаваны ў Арменіі. Мы ўдзельнічаем у праграме замены ліфтаў. Беларускі вытворца «Магілёўліфтмаш» выступіў з ініцыятывай аб стварэнні вытворчасці ў Арменіі — не проста зборачнай, а з лакалізацыяй асобных элементаў. Для Арменіі гэта атрыманне новых машынабудаўнічых кампетэнцый, стварэнне новых рабочых месцаў», — адзначыў прэм’ер-міністр.
Тавараабарот Беларусі і Арменіі ў 2021 годзе склаў $97,2 млн і ў параўнанні з 2020 годам павялічыўся на 18,1 працэнта, экспарт — $68,4 млн і павялічыўся на 18,9 працэнта. Сальда дадатнае — $39,4 млн. Асноўнымі экспартнымі пазіцыямі ў мінулым годзе сталі малако і вяршкі, спецыфічныя тавары, мэбля, лекавыя сродкі, трансфарматары электрычныя, вылічальныя машыны для аўтаматычнай апрацоўкі інфармацыі, правады і кабелі, драўнянавалакністыя пліты, папера і кардон, алюмініевыя пруткі і профілі. Аснову імпарту тавараў з Арменіі ў 2021 годзе склалі моцныя спіртныя напіткі, спецыфічныя тавары, медныя адходы і лом, прадметы гігіены, цацкі і галаваломкі.
У студзені — жніўні 2022 года тавараабарот склаў $105,7 млн (рост на 105,7 працэнта ў параўнанні з аналагічным перыядам папярэдняга года), экспарт — $69,2 млн (на 82,5 працэнта). Сальда дадатнае — $32,6 млн.
Тавараправодная сетка беларускіх прадпрыемстваў у Арменіі ўключае 4 кампаніі, створаныя з прыцягненнем беларускага капіталу, а таксама больш за 80 суб’ектаў дылерскай сеткі. У Беларусі дзейнічаюць 39 прадпрыемстваў з армянскім капіталам, у тым ліку 10 сумесных.
Фота: БелТА
Спасылкі
[1] https://zviazda.by/be/ekanomika
[2] https://www.belta.by/economics/view/golovchenko-predlagaem-sozdat-sovmestnoe-proizvodstvo-liftov-v-armenii-530460-2022/
[3] https://zviazda.by/be/tags/raman-galouchanka
[4] https://zviazda.by/be/tags/nikol-pashynyan
[5] https://zviazda.by/be/tags/armeniya