Энергетычная галіна краіны знаходзіцца ў добрым стане, аднак нашым энергетыкам трэба вучыцца працаваць яшчэ больш эфектыўна, паведаміў учора на адкрыцці міжнароднай выставы «Энергетыка. Экалогія. Энергазберажэнне. Электра» першы намеснік прэм'ер-міністра Беларусі Уладзімір СЯМАШКА.

Паводле яго слоў, рост валавога ўнутранага прадукту амаль у тры разы цягам апошніх гадоў быў дасягнуты без істотнага росту спажывання энергарэсурсаў, а звыш 80 працэнтаў іх краіна вымушана купляць за мяжой. Адсюль перад энергетыкамі і камунальнікамі стаяць пытанні як мага больш беражлівага абыходжання з рэсурсамі і максімальнага выкарыстання мясцовых відаў паліва і аднаўляльных крыніц энергіі. Паводле Дзяржпраграмы і канцэпцыі энергетычнай бяспекі, падкрэсліў віцэ-прэм'ер, у краіне актыўна вядзецца будаўніцтва міні-цеплаэлектрастанцый, якія працуюць на адходах драўніны, торфе — доля гэтых відаў паліва ў балансе ўжо сёння дасягае амаль 17 працэнтаў. Усё больш заяўляе пра сябе і ветраэнергетыка. Новыя генеруючыя магутнасці неўзабаве будуць уведзены ў эксплуатацыю на Бярозаўскай і Лукомльскай электрастанцыях, каскады гідраэлектрастанцый рознай магутнасці ўзводзяцца на Нёмане, Дняпры і Заходняй Дзвіне. Актыўна вядзецца работа і на нашай АЭС, першыя магутнасці якой будуць уведзены ў 2018 годзе.
Сёння, на думку першага намесніка прэм'ер-міністра, у краіне створаны надзвычай спрыяльны інвестыцыйны клімат для ўкладанняў у энергетычную галіну. Пра што сведчыць як сама выстава, так і энергетычны і экалагічны форум, што пачнецца ўжо сёння ў яе межах. Як падкрэсліў Уладзімір Сямашка, усе папярэднія падобныя мерапрыемствы заканчваліся не толькі наладжваннем новых кантактаў, але і падпісаннем узаемавыгадных кантрактаў.
Мэта правядзення мерапрыемстваў — агляд самых сучасных дасягненняў навукі, тэхнікі і тэхналогій у сферы энергетыкі, энергазберажэння, аўтаматызацыі, электронікі, аховы навакольнага асяроддзя, выкарыстання аднаўляльных крыніц энергіі. Штогод форум становіцца ўнікальным месцам сустрэч энергетыкаў і эколагаў Беларусі і замежжа, спрыяючы тым самым пашырэнню супрацоўніцтва, абмену перадавымі навуковымі распрацоўкамі і інавацыйнымі праектамі.
Сёлета на выставе прадстаўлена прадукцыя больш чым 360 прадпрыемстваў і арганізацый з 18 краін свету — з Расіі, Украіны, Малдовы, Літвы, Эстоніі, Польшчы, Чэхіі, Германіі, Аўстрыі, Францыі, Швейцарыі, Італіі, Даніі, Швецыі, Фінляндыі, Кітая і ЗША. У структуры экспазіцыі шырока прадстаўлены галіновыя раздзелы айчынных міністэрстваў энергетыкі, прамысловасці, прыродных рэсурсаў і аховы навакольнага асяроддзя, жыллёва-камунальнай гаспадаркі, Дзяржкамітэта па навуцы і тэхналогіях і Дэпартамента па энергаэфектыўнасці. Менавіта гэтыя міністэрствы і ведамствы знаходзяцца сёння на «пярэднім краі» работы па абнаўленні і павышэнні якасці працы энергетычнай галіны. Прычым на стэндах прадстаўлена адпаведная прадукцыя як дзяржаўных, так і прыватных нашых прадпрыемстваў, якія працуюць на энергетыку будучыні.
Асноўным на парадку дня энергетычнага і экалагічнага кангрэса стане разгляд энергетыкі як фактара павышэння эканамічнай бяспекі і канкурэнтаздольнасці з удзелам кіраўнікоў зацікаўленых міністэрстваў, а таксама навукова-практычны семінар па праблемах ужывання сучасных генерыруючых магутнасцяў пры вытворчасці цеплавой і электрычнай энергіі. Спецыялісты і вучоныя разгледзяць таксама вопыт выкарыстання ў краіне і свеце аднаўляльных крыніц энергіі і пытанні энергаэфектыўнасці ў жылым сектары.

Пятро РАМАНЧУК.