Развіццё адносін усебаковага стратэгічнага партнёрства Рэспублікі Беларусь з Кітайскай Народнай Рэспублікай (далей — КНР) адпавядае доўгатэрміновым інтарэсам Беларусі, умацаванню яе міжнародных пазіцый, спрыяе забеспячэнню развіцця ўсяго спектра беларуска-кітайскага супрацоўніцтва.
Асноўным зместам беларуска-кітайскага супрацоўніцтва з'яўляецца ўзаемная рашучая падтрымка па пытаннях, якія датычацца карэнных інтарэсаў дзвюх краін, такіх як суверэнітэт, тэрытарыяльная цэласнасць, бяспека і эканамічнае развіццё.
З мэтамі развіцця адносін усебаковага стратэгічнага партнёрства Рэспублікі Беларусь з КНР:
1. Устанавіць, што супрацоўніцтва з КНР ажыццяўляецца на аснове наступных прынцыпаў:
раўнапраўе і ўзаемная выгада;
прымяненне пераважна рынкавых падыходаў з улікам інтарэсаў Рэспублікі Беларусь;
прыярытэтнасць, доўгатэрміновасць рэалізуемых праектаў, паслядоўнасць іх рэалізацыі;
прамое і цеснае ўзаемадзеянне рэспубліканскіх і мясцовых органаў дзяржаўнага кіравання з кітайскім бокам;
адказнасць суб'ектаў гаспадарання за эфектыўнасць рэалізацыі праектаў узаемавыгаднага супрацоўніцтва з КНР.
2. Вызначыць наступныя асноўныя напрамкі супрацоўніцтва з КНР:
глыбокая і ўзаемная інтэграцыя галін і прадпрыемстваў;
інфармацыйна-камунікацыйныя тэхналогіі;
фарміраванне сумесных даследчых і навукова-практычных цэнтраў, сумеснае развіццё галіновай навукі;
прамое і сістэмнае міжрэгіянальнае супрацоўніцтва;
стварэнне ў Рэспубліцы Беларусь рэгіянальнага цэнтра кітаязнаўства і ўзаемадзеяння з КНР.
3. Лічыць мэтавым напрамкам супрацоўніцтва з КНР сумеснае развіццё ў гандлёвай, інвестыцыйнай, фінансавай і інавацыйнай сферах, стварэнне і рэалізацыю сумесных праектаў і прадпрыемстваў.
Каардынацыйным органам садзейнічання развіццю адносін з КНР лічыць Беларуска-Кітайскі міжурадавы камітэт па супрацоўніцтве. Камісіі па напрамках супрацоўніцтва, якія ствараюцца пры гэтым камітэце, узначальваюцца кіраўнікамі рэспубліканскіх органаў дзяржаўнага кіравання.
4. Адміністрацыі Прэзідэнта Рэспублікі Беларусь:
4.1. у 2015 годзе сфарміраваць доўгатэрміновую аснову супрацоўніцтва з Міжнародным аддзелам Цэнтральнага камітэта Камуністычнай партыі Кітая па пяці ключавых напрамках:
рэгулярны абмен візітамі высокага ўзроўню;
арганізацыя сістэмы ўзаемных стажыровак работнікаў Адміністрацыі Прэзідэнта Рэспублікі Беларусь і Міжнароднага аддзела Цэнтральнага камітэта Камуністычнай партыі Кітая;
узаемадзеянне ў рэалізацыі канцэпцыі будаўніцтва Эканамічнага пояса Шаўковага шляху;
супрацоўніцтва ў даследаванні прынцыпаў устойлівага развіцця грамадства;
умацаванне ўзаемадзеяння аналітычных цэнтраў і сродкаў масавай інфармацыі;
4.2. з улікам новых рэалій у палітычным і эканамічным партнёрстве распрацаваць і да 1 студзеня 2016 г. прыняць план двухбаковага супрацоўніцтва на пяцігадовы тэрмін паміж Адміністрацыяй Прэзідэнта Рэспублікі Беларусь і Міжнародным аддзелам Цэнтральнага камітэта Камуністычнай партыі Кітая.
5. Дзяржаўнаму сакратарыяту Савета Бяспекі Рэспублікі Беларусь у 2015 годзе:
забяспечыць планаванне, каардынацыю і паглыбленне супрацоўніцтва з КНР у ваеннай і ваенна-тэхнічнай сферах, а таксама ў сферы бяспекі і ліквідацыі наступстваў стыхійных бедстваў і надзвычайных сітуацый;
сумесна з кітайскімі сілавымі структурамі вызначыць змест і напрамкі супрацоўніцтва, пералік сумесных праектаў на перыяд да 2020 года.
6. Савету Міністраў Рэспублікі Беларусь сумесна з зацікаўленымі дзяржаўнымі органамі, аблвыканкамамі і Мінскім гарвыканкамам:
6.1. да 1 студзеня 2016 г.:
вызначыць персанальную адказнасць кіраўнікоў рэспубліканскіх і мясцовых органаў дзяржаўнага кіравання і іншых дзяржаўных арганізацый за развіццё супрацоўніцтва з КНР;
вызначыць механізмы ўзмацнення каардынацыйнай ролі Камісіі па гандлёва-эканамічным супрацоўніцтве Беларуска-Кітайскага міжурадавага камітэта па супрацоўніцтве;
прапрацаваць пытанне аб мэтазгоднасці стварэння ў міністэрствах замежных спраў і эканомікі самастойных структурных падраздзяленняў па развіцці супрацоўніцтва з КНР за кошт павелічэння штатнай колькасці гэтых міністэрстваў;
арганізаваць прамое ўзаемадзеянне з профільнымі структурамі КНР па падрыхтоўцы і ўзгадненні плана мерапрыемстваў па спрашчэнні працэдур і нарматыўных патрабаванняў, звязаных з мерамі тэхнічнага рэгулявання, санітарнага, фітасанітарнага, ветэрынарна-санітарнага і санітарна-эпідэміялагічнага кантролю (нагляду), з мэтамі забеспячэння паляпшэння ўмоў узаемнага доступу на рынкі. Укараніць ва ўзаемным гандлі электронны сертыфікат кантролю якасці і каранціну;
стварыць сумесную кампанію па арганізацыі, суправаджэнні і прасоўванні ўзаемных паставак тавараў і паслуг;
укараніць ва ўзаемным гандлі сістэму прапанавання і прасоўвання беларускіх тавараў на электронных гандлёвых пляцоўках КНР;
на ўзаемнай аснове правесці працу па зніжэнні ўзроўню тарыфных і нетарыфных бар'ераў ва ўзаемным гандлі з КНР;
сфарміраваць комплексны план дзеянняў па дасягненні да 2020 года ўзроўню экспартных паставак у КНР у суме не менш як 1,5 млрд долараў ЗША;
6.2. у інвестыцыйнай сферы:
развіваць супрацоўніцтва на аснове павелічэння ўзаемных інвестыцый і стварэння спрыяльнага інвестыцыйнага клімату;
да 1 ліпеня 2016 г. сфарміраваць пералік прадпрыемстваў для прыцягнення буйных кітайскіх кампаній у праекты па развіцці кааперацыі і ўваходжанні ў акцыянерны капітал у сферы сельскагаспадарчага і цяжкага машынабудавання, станкабудавання, вытворчасці бытавой тэхнікі і электронікі, оптыка-механічнай прамысловасці, вытворчасці вырабаў з палімераў, тавараў медыцынскага прызначэння і бытавой хіміі;
сфарміраваць механізмы стымулявання прыцягнення ў 2016—2020 гадах прамых кітайскіх інвестыцый у энергетыку, вытворчасць будаўнічых матэрыялаў, транспартную інфраструктуру, вытворчасць і перапрацоўку сельскагаспадарчай прадукцыі і іншыя галіны, якія ўяўляюць узаемны інтарэс;
арганізаваць на тэрыторыі КНР зборачныя вытворчасці беларускай сельскагаспадарчай тэхнікі і сістэму яе перадпродажнага і пасляпродажнага абслугоўвання з улікам рэгіянальных асаблівасцей і вытворча-збытавых ланцужкоў буйных кітайскіх карпарацый. У 2016 годзе забяспечыць выпуск гэтымі вытворчасцямі і продаж не менш як 6 тыс. трактароў і 3 тыс. камбайнаў з нарошчваннем зборкі ў наступныя гады;
на сістэмнай аснове развіваць крэдытнае супрацоўніцтва на прынцыпах конкурснасці і сярэднетэрміновай акупнасці зыходзячы з прыярытэтнасці накіравання фінансавых сродкаў на развіццё малога і сярэдняга бізнесу і прыцягненне прамых кітайскіх інвестыцый праз крэдытныя інструменты;
актуалізаваць і ўзгадніць дзяржаўныя праграмы, прынятыя ў Рэспубліцы Беларусь, у сферы мадэрнізацыі і развіцця транспартнай, лагістычнай, інфармацыйна-камунікацыйнай, мытнай інфраструктуры з падыходамі па ўдзеле Рэспублікі Беларусь у канцэпцыі будаўніцтва Эканамічнага пояса Шаўковага шляху і Марскога шляху
XXІ стагоддзя. Сфарміраваць адзіную стратэгію на перыяд да 2030 года;
пашырыць супрацоўніцтва ў галіне грамадзянскай авіяцыі. Сфарміраваць на 2016 — 2020 гады падыходы да формаў і механізмаў гэтага супрацоўніцтва, павелічэння аб'ёмаў паветраных перавозак;
штогод фарміраваць графік удзелу рэспубліканскіх і мясцовых органаў дзяржаўнага кіравання ў кітайскіх міжнародных інвестыцыйных кірмашах і форумах, забяспечыць высокі ўзровень прадстаўніцтва ўдзельнікаў гэтых мерапрыемстваў;
6.3. у фінансавай сферы:
забяспечыць штогадовы прырост выкарыстання нацыянальных валют ва ўзаемным гандлі, кітайскіх юаняў у дыверсіфікацыі структуры золатавалютных рэзерваў, а таксама ў размяшчэнні дзяржаўных і карпаратыўных каштоўных папер;
на рэгулярнай аснове актуалізаваць і ўкараняць новыя гібкія метады фінансавання інвестыцыйных праектаў;
выпрацаваць умовы і формы прыцягнення на рынак Рэспублікі Беларусь банкаўскіх паслуг кітайскіх банкаў і прыняць меры па іх прадастаўленні ў Рэспубліцы Беларусь;
з мэтамі арганізацыі венчурнага фінансавання інавацыйных праектаў, развіцця малога і сярэдняга бізнесу, павышэння эфектыўнасці дзяржаўных прадпрыемстваў прапрацаваць з кітайскім бокам пытанне стварэння сумеснага беларуска-кітайскага інвестыцыйнага фонду;
6.4. у галіне навукі і тэхнікі:
лічыць асноўным напрамкам супрацоўніцтва з КНР стымуляванне сумеснага развіцця галіновай навукі;
стварыць умовы для камерцыялізацыі вынікаў навукова-тэхнічнай дзейнасці і стварэння сумесных інавацыйных вытворчасцей на тэрыторыі Рэспублікі Беларусь і КНР;
забяспечыць практычную рэалізацыю мерапрыемстваў, якія прадугледжаны сумеснымі праграмамі навукова-тэхнічнага супрацоўніцтва Рэспублікі Беларусь і КНР, зацверджанымі на 2015 — 2016 гады, і да 1 ліпеня 2016 г. сфарміраваць пералік новых інавацыйных праектаў на 2017 — 2020 гады;
да 1 ліпеня 2016 г. сфарміраваць пералік новых сумесных даследчых і навукова-практычных цэнтраў з удзелам арганізацый Нацыянальнай акадэміі навук Беларусі, устаноў вышэйшай адукацыі Рэспублікі Беларусь і кітайскіх партнёраў па канкурэнтных перспектыўных напрамках;
да 1 студзеня 2017 г. гарманізаваць механізмы прававой абароны і патэнтавання аб'ектаў інтэлектуальнай уласнасці дзвюх краін;
6.5. у галіне супрацоўніцтва па развіцці Кітайска-Беларускага індустрыяльнага парка «Індустрыяльны парк «Вялікі камень» (далей — Парк):
суправаджаць праект стварэння Парка як стратэгічны праект у інвестыцыйнай сферы, узор маштабнага супрацоўніцтва паміж Рэспублікай Беларусь і КНР, а таксама найважнейшы элемент удзелу Рэспублікі Беларусь у канцэпцыі будаўніцтва Эканамічнага пояса Шаўковага шляху;
забяспечыць захаванне найлепшага прававога рэжыму для рэзідэнтаў Парка ў параўнанні з іншымі льготнымі рэжымамі вядзення камерцыйнай дзейнасці ў Рэспубліцы Беларусь і ў краінах ЕАЭС;
у выпадках няяснасці і недакладнасці прадпісанняў нарматыўных прававых актаў забяспечыць прыняцце дзяржаўнымі органамі рашэнняў на карысць дзяржаўнай установы «Адміністрацыя Кітайска-Беларускага індустрыяльнага парка «Індустрыяльны парк «Вялікі камень», Кітайска-Беларускага сумеснага закрытага акцыянернага таварыства «Кампанія па развіцці індустрыяльнага парка» і рэзідэнтаў Парка;
стварыць на тэрыторыі Парка рэгіянальны лагістычны цэнтр з прымяненнем перадавога вопыту КНР у будаўніцтве аб'ектаў-аналагаў і комплексным абслугоўванні рэзідэнтаў у адпаведнасці з найлепшай сусветнай практыкай;
6.6. у галіне рэгіянальнага супрацоўніцтва:
сфарміраваць і зацвердзіць праграму міжрэгіянальных выставачна-кірмашовых мерапрыемстваў, Дзён правінцый і абласцей, гарадоў на перыяд да 2020 года са штогадовай яе актуалізацыяй і канкрэтызацыяй;
фарміраваць штогадовы план візітаў кіраўнікоў мясцовых выканаўчых і распарадчых органаў з перыядычнасцю не менш як адзін раз на год у кожную правінцыю (аўтаномную акругу, горад), з якой падпісаны пагадненні аб супрацоўніцтве і пабрацімскіх сувязях;
да 1 студзеня 2020 г. забяспечыць ахоп большасці правінцый і гарадоў цэнтральнага падпарадкавання КНР пагадненнямі аб супрацоўніцтве з абласцямі і гарадамі Рэспублікі Беларусь у адпаведнасці са структурай вытворчасці і перспектывамі эканамічнага развіцця;
распрацаваць і зацвердзіць на ўзаемнай аснове праграмы супрацоўніцтва абласцей і гарадоў Рэспублікі Беларусь з правінцыямі, аўтаномнымі акругамі і гарадамі КНР на перыяд да 2020 года, прадугледзеўшы ў іх рэалізацыю канкрэтных інвестыцыйных праектаў, стварэнне сумесных вытворчасцей, узаемную пастаўку тавараў;
штогод на перыяд да 2020 года забяспечваць кожнай вобласцю і г. Мінскам прыцягненне ў рамках міжрэгіянальнага супрацоўніцтва не менш як 100 млн долараў ЗША прамых кітайскіх інвестыцый;
6.7. у гуманітарнай сферы:
узгадніць з кітайскімі партнёрамі і зацвердзіць праграму накіравання на навучанне беларускіх юнакоў і дзяўчат ва ўстановы вышэйшай адукацыі КНР пачынаючы з 2016/17 вучэбнага года. Распрацаваць парадак і ўмовы бюджэтнай падтрымкі такога навучання;
да 1 студзеня 2016 г. сумесна з кітайскімі партнёрамі распрацаваць праграму стварэння да 2018 года цэнтраў традыцыйнай кітайскай медыцыны і цэнтраў традыцыйнай кітайскай гімнастыкі ў кожным абласным цэнтры Рэспублікі Беларусь;
арганізаваць стварэнне сумеснай турыстычнай кампаніі, якая спецыялізуецца на ўзаемным фарміраванні тураў і экскурсій, падрыхтоўку гідаў-перакладчыкаў;
вызначыць форму і механізм узаемадзеяння паміж рэспубліканскім унітарным прадпрыемствам «Нацыянальная кінастудыя «Беларусьфільм» і кітайскай кампаніяй «Chіna Fіlm Group Corporatіon» (CFGC);
сфарміраваць сістэму, перыядычнасць, напрамкі культурнага абмену паміж дзвюма краінамі на перыяд да 2020 года;
прыняць меры да вядзення афіцыйнага сайта Рэспублікі Беларусь у тым ліку на кітайскай мове.
7. Савету Міністраў Рэспублікі Беларусь сумесна з Нацыянальным банкам, аблвыканкамамі і Мінскім гарвыканкамам, Адміністрацыі Прэзідэнта Рэспублікі Беларусь, Дзяржаўнаму сакратарыяту Савета Бяспекі Рэспублікі Беларусь прыняць неабходныя меры па выкананні гэтай Дырэктывы.
8. Савету Міністраў Рэспублікі Беларусь, Адміністрацыі Прэзідэнта Рэспублікі Беларусь і Дзяржаўнаму сакратарыяту Савета Бяспекі Рэспублікі Беларусь два разы на год (да 15 студзеня і да 15 ліпеня) у вызначаным парадку дакладваць кіраўніку дзяржавы аб ходзе выканання гэтай Дырэктывы.
9. Кантроль за выкананнем гэтай Дырэктывы ўскласці на Адміністрацыю Прэзідэнта Рэспублікі Беларусь.
Прэзідэнт Рэспублікі Беларусь Аляксандр Лукашэнка
Спасылкі
[1] https://zviazda.by/be/dakumenty
[2] https://zviazda.by/be/palityka-0
[3] http://zviazda.by/wp-content/uploads/2015/09/31.jpg