Вы здесь

Як у Мінску святкавалі Дзень танкістаў


У другой палове дня ў нядзелю парк Перамогі ў Мінску ператварыўся ў адну вялікую забаўляльную пляцоўку. Сюды ішлі тысячы людзей, каб дакрануцца да арміі ў літаральным сэнсе гэтага слова. Яны святкавалі Дзень танкістаў. Арганізатарамі свята выступілі Мінскі гарвыканкам, Міністэрства абароны Рэспублікі Беларусь і кампанія Wargaming.


Першае практыкаванне прапаноўвалі прайсці ваеннаслужачыя Ваеннай акадэміі. Яно было немудрагелістае – паспрабаваць падняць над галавой снарад і стаць лепшым у максімальным падняцці клін-затвора танка Т72Б. Снарад, дарэчы, аказаўся не такі і цяжкі – усяго 22 кілаграмы вагой. А вось з клін-затворам выйшла неспадзяванка. Справа ў тым, што ён важыць на 50 кілаграмаў болей, а плошча паверхні яго значна меншая, каб лягчэй размеркаваць вагу. І таму з ім маглі справіцца толькі сапраўдныя асілкі.

47 разоў “выціснуць” клін-затвор здолеў Дзмітрый Карнееў. Ён атрымаў каштоўны падарунак. Сярод прызоў – вымпел і дыск з армейскімі песнямі.

– Цяжка было? – пытаюся.

- Так, і дагэтуль вібрацыя ў руках адчуваецца. Ніколі не думаў, што магу падняць столькі разоў. Ну 25, 30 без падрыхтоўкі… Раней, год да 20, я займаўся сілавымі відамі спорту і працаваў дома на зямлі. Сам я родам з вёскі, з Крычаўскага раёна. Зараз працую на Мінскім камбінаце хлебапрадуктаў намеснікам галоўнага інжынера. Але рукі памятаюць!

Адметна, што “Армейскі плацдарм” стаў сапраўдным сямейным святам. Дзецям было цікава ўсё. І ім дазволілі абсалютна ўсё – залезці на Т-72Б3, пасядзець унутры браніраванага аўтамабіля МЗКТ 490 100, аб чым іх таты ў свой час маглі толькі марыць… Месца кіроўцы тут – найбольш папулярнае. Пасля праз адтуліну яны трапляюць на дах, дзе ўстаноўлена турэль.

Вялікая чарга выстраілася каля пляцоўкі, дзе дэманстравалася ўкладка вучэбнага парашута Д-6. Малыя з радасцю прымервалі на сябе заплечнікі.

Цікаўлюся ў аднаго з іх, ці не цяжка яму?

- Ды ў мяне ў школе партфель столькі важыць! – адказвае з усмешкай пяцікласнік Дзіма. – Таму нічога страшнага, я ўжо загартаваны…

Крыху пазней распачаліся спаборніцтвы па ўкладцы парашута на час. Гэты конкурс быў сямейны – адзін чалавек з дапамогай металічнага крука складвае стропы, другі дапамагае прасоўваць тоўсты слой тканіны ў соце да ўпору. Міхаілу Міхееву ў гэтым дапамагае яго маленькая дачка.

- Вельмі цікава тут! Інтарэс і адрэналін разам… Цяжка было запоўніць першыя дзве соты, каб зразумець прынцып, як правільна гэта робіцца. Справа ў тым, што я да сёння з парашутамі справы не меў. Паболей б было такіх ваенных забаў, каб папулярызаваць ваенную службу, выхоўваць у гэтым кірунку дзяцей. Ім жа цікава – паглядзіце толькі, як яны ўсё абляпілі!

І сапраўды, дзясяткі малых абступілі танк Т-72Б, чый экіпаж удзельнічаў у нядаўніх міжнародных Армейскіх гульнях. Тыя хлопчыкі і дзяўчынкі, якім яшчэ не споўнілася 10 год, пасля невялікай лекцыі павінны былі адказаць на 15 пытанняў, з чаго складаецца танк. Прызёраў конкурса на веданне матэрыяльнай часткі ўзнагароджваў знакаміты беларускі спявак Анатоль Ярмоленка. Лепшым стаў першакласнік Акім, які не дапусціў ніводнай памылкі. Ён прыйшоў на свята ў майцы з красамоўным надпісам - "быць маміным абаронцам".

- Армія вучыць маладога хлопца быць мужчынам, які можа абараніць сваю сям’ю, сяброў, Радзіму. Зараз моладзь даволі інфантыльная, армія бярэ на сябе не толькі патрыятычную функцыю, але і навучыць авалодаць тэхнікай, што згадзіцца ў жыцці.

І, канешне ж, як забыць пра класіку – зборку-разборку аўтамата АК-47?

- Няправільна, - кажа юнак Дзмітрый, які сочыць за тым, як 12-гадовы хлопчык разбірае аўтамат. – Трэба ў такім парадку... – і пачынае пералічваць, што за чым ідзе.

Пытаюся: адкуль такая дасведчанасць, можа, нядаўна з арміі вярнуліся ці стральбой займаецеся?

- Не, гэта ў нас у ліцэі працаваў добры выкладчык дапрызыўнай падрыхтоўкі. Запомніць парадак разбору і было самым складаным. Зборка ж ідзе ў адваротны бок. У нарматыў я ўкладваўся. А ў арміі ў нас зборку-разборку аўтамата паказваў сяржант, які апярэджваў нарматыў на 2 секунды! Дэталі там "ляталі" ў яго руках так, што ледзь не зліваліся ў адно цэлае.

Велізарнейшай папулярнасцю карысталася пляцоўка, на якой было выстаўлена ўзбраенне і ўзоры ваеннай формы вопраткі падраздзяленняў сіл спецыяльных аперацый. Чаго там толькі не было – і снайперскія вінтоўкі, і спецыяльны аўтамат, і пісталет-кулямёт, і монакуляр начнога бачання, і бронекамізэлькі, і шлемы…

Крыху далей размясціліся сувязісты. Там таксама не было адбою ад дзяцей, і не ў апошнюю чаргу іх дзівіла тое, што можна размаўляць паміж сабой не толькі па мабільніку, але і па радыёстанцыях і палявых тэлефонных апаратах, карыстацца камутатарам... Што ж зробіш, тэхнічны прагрэс “выбіў” з дамоў кароткахвалевыя радыёпрыёмнікі, а сучаснае FM-радыё з больш “чыстым” прыёмам зноў жа змяшчаецца ў смартфоне. Назіраючы за тым, як дзеці перагаворваюцца адзін з адным па радыёстанцыях, чамусьці згадалася сцэна з фільма “ТАСС упаўнаважаны заявіць”, дзе перадавалі шыфр – “Трыанон, Трыанон…”

Сувязісты таксама праводзілі свой конкурс – хто хутчэй збярэ апаратуру для сувязі і перадасць паведамленне? Лепшым стаў мінскі чацвёртакласнік Павел Лісіца. Ён атрымаў у падарунак гадзіннік ад Міністра абароны.

- Мне спадабалася настройваць частоты, падключаць кабелі, несці катушку з кабелем, падаваць сігнал з тэлефона на радыёстанцыю. Усё гэта так захапляльна! І пасля сённяшняга свята я вельмі хачу, калі стану дарослым, адслужыць у войску.

Святочная праграма працягвалася па ўсім парку Перамогі.

Свята скончылася салютам. У тым ліку - і ў гонар тых танкістаў, якія няспынна абараняюць Радзіму. Нагадаем, што зараз у Беларусі праходзіць буйное камандна-штабное вучэнне, у якім задзейнічана каля 7 з паловай тысяч вайскоўцаў і каля 260 адзінак бранятэхнікі.

Валяр’ян ШКЛЕННІК

Фота Ганны ЗАНКАВІЧ і Таццяны ТКАЧОВАЙ

Выбор редакции

Культура

Чем в этом году будет удивлять посетителей «Славянский базар в Витебске»?

Чем в этом году будет удивлять посетителей «Славянский базар в Витебске»?

Концерт для детей и молодежи, пластический спектакль Егора Дружинина и «Рок-панорама».

Общество

Время заботы садоводов: на какие сорта плодовых и ягодных культур стоит обратить внимание?

Время заботы садоводов: на какие сорта плодовых и ягодных культур стоит обратить внимание?

Выбор саженца для садовода — тот момент, значимость которого сложно переоценить.

Сельское хозяйство

Как обстоят дела на полях Беларуси на данный момент?

Как обстоят дела на полях Беларуси на данный момент?

Успех зависит от соблюдения отраслевых регламентов и технологий.

Регионы

Бьюти-рецепты XVIII века восстанавливают в Грабовке

Бьюти-рецепты XVIII века восстанавливают в Грабовке

«Императорский» туристический маршрут поможет развивать сельскую территорию.