У суперфінале за званне «Настаўнік года» змагаліся 8 педагогаў

Суперфінал Рэспубліканскага конкурсу прафесійнага майстэрства педагогаў «Настаўнік года Рэспублікі Беларусь—2020» прайшоў сёння ў сценах Акадэміі паслядыпломнай адукацыі і паставіў кропку ў марафоне, які доўжыўся амаль год.

Фіналісты конкурсу — пераможцы ад кожнай вобласці і сталіцы ў васьмі прадметных намінацыях — вызначыліся напрыканцы папярэдняга навучальнага года. Менавіта ў той час, калі ўсе масавыя мерапрыемствы былі адмененыя па прычыне распаўсюджвання каранавірусу, што не магло не адбіцца і на фармаце правядзення конкурсу. Тым не менш імёны 56 фіналістаў сталі вядомыя, а дзесяць дзён таму для іх распачаліся конкурсныя выпрабаванні ўжо на рэспубліканскім узроўні, якія праходзілі ў сценах сталічных устаноў адукацыі (конкурсныя ўрокі), Беларускага дзяржаўнага педагагічнага ўніверсітэта (майстар-класы) і Акадэміі паслядыпломнай адукацыі (псіхалагічнае і педагагічнае тэсціраванне).

Па выніках усіх выпрабаванняў у суперфінал выйшлі 8 педагогаў, якія набралі ў фінале ў сваёй намінацыі найбольшую суму балаў.

За званне найлепшага ў прафесіі сёння змагаліся настаўнік матэматыкі сярэдняй школы № 31 г.Віцебска Наталля Уладзіміраўна ШЧАГЛОВА, настаўнік нямецкай мовы сярэдняй школы № 3 г.Орша Вольга Аляксандраўна ТРУХАН, настаўнік рускай мовы і літаратуры Маладзечанскай сярэдняй школы № 1 імя Янкі Купалы Васіль Уладзіміравіч МАЛІНОЎСКІ, настаўнік пачатковых класаў гімназіі № 1 г.Свіслач Людміла Анатольеўна ПАБУДЗЕЙ, настаўнік геаграфіі сярэдняй школы № 19 г.Гомеля Вадзім Алегавіч ЛОСЕЎ, настаўнік біялогіі сярэдняй школы № 8 г.Гомеля Марына Віктараўна КАПЦЭВІЧ, настаўнік музыкі Гродзенскай гарадской гімназіі Святлана Міхайлаўна АДАМЧУК і выхавальнік дашкольнага цэнтра развіцця дзіцяці «Сонейка» г.Слуцка Вікторыя Пятроўна ГЯЧ.

У суперфiнале ўсё дзейства адбывалася на сцэне Акадэмii паслядыпломнай адукацыi. Канкурсанты павінны былі правесці мiнi-ўрок на тэму «Навошта трэба вывучаць...» (яна стала вядомая толькі напярэдадні) і раскрыць яе сродкамі свайго прадмета. У ролi «вучняў» выступалі іх калегi па фiнале. За гэта выпрабаванне можна было атрымаць самую вялікую суму балаў у суперфінале (да сарака). Таксама іх чакала публiчнае выступленне з асабiстым поглядам на сваю прафесію (максімум складаў дваццаць пяць балаў) i педагагiчная прэс-канферэнцыя (да пятнаццаці балаў), падчас якой канкурсанты адказвалі на пытаннi журы. Тут суперфiналiстам трэба было прадэманстраваць не толькi сваю педагагiчную эрудыцыю, але i iмгненную рэакцыю, бо ў штодзённай рабоце жыццё пастаянна падкiдвае педагогам нестандартныя сiтуацыi.

— Вельмі добра, што настаўнікі сёння разумеюць важнасць групавой работы ў класе, — падзяліўся сваімі ўражаннямі ад суперфіналу старшыня журы, рэктар Беларускага дзяржаўнага педагагічнага ўніверсітэта, доктар педагагічных навук, прафесар Аляксандр ЖУК. — Нельга, каб вучні былі на ўроку проста пасіўнымі слухачамі, нават у групе ўсе павінны працаваць. А некаторым канкурсантам удалося ўцягнуць у працу не толькі сваіх «вучняў», але і гледачоў у зале. Уменне ўстанавіць кантакт з аўдыторыяй і трымаць яе ўвагу — вельмі важнае для кожнага педагога. Удзельнікі суперфіналу выкарыстоўвалі актыўныя метады і формы навучання, інфармацыйныя тэхналогіі, гаджэты, інтэрактыў. Адным словам, было на што паглядзець. Хачу заўважыць, што ўсе конкурсныя ўрокі фіналістаў былі зняты, як і іх майстар-класы. Пасля апрацоўкі мы зробім іх даступнымі для ўсіх педагогаў, у тым ліку і для студэнтаў педагагічных спецыяльнасцей.

Імя пераможцы рэспубліканскага конкурсу «Настаўнік года Рэспублікі Беларусь —2020» аб’явяць 2 кастрычніка падчас урачыстасцей, якія пройдуць у Палацы Рэспублікі з нагоды прафесійнага свята ўсіх педагогаў. Ён атрымае таксама i ключы ад новенькага аўтамабiля «Geely».

Надзея НІКАЛАЕВА