Аляксандр Лукашэнка: "Выявілі праблему і неадкладна яе вырашылі..."

Прэзідэнт Беларусі Аляксандр Лукашэнка патрабуе павысіць эфектыўнасць дзейнасці рабочай групы па праблемных пытаннях будаўнічай галіны. Аб гэтым кіраўнік дзяржавы заявіў 23 ліпеня, прымаючы з дакладам аб ходзе работы групы кіраўніка Адміністрацыі Прэзідэнта Беларусі Андрэя Кабякова, старшыню Камітэта дзяржкантролю Аляксандра Якабсона і старшыню Камітэта дзяржбяспекі Валерыя Вакульчыка, паведамілі БЕЛТА ў прэс-службе беларускага лідара.

Аляксандр Лукашэнка нагадаў, што перад групай была пастаўлена задача вызначыць глыбінныя праблемы будаўнічай галіны і навесці ў ёй парадак. "Мы дамовіліся: працуем па прынцыпе "выявілі праблему і неадкладна яе вырашылі". Прытым жалезна і жорстка. Таму што гэта праблема ўжо зашкальвае. Насельніцтва вельмі не задаволена, асабліва тыя, хто вядзе будаўніцтва, прад'яўляюць абгрунтаваныя скаргі. Скардзяцца ва ўсе інстанцыі. Гэта ненармальна, недапушчальна ў той час, калі працуе камісія", — сказаў Прэзідэнт.

"Ёсць праблема — бяром яе і вырашаем. Прытым пачынаючы ад канкрэтнага дома, які не будуецца або будаўніцтва якога пратэрмінавана па віне будаўнікоў або забудоўшчыкаў, і заканчваючы рашэннямі на заканадаўчым узроўні, калі для гэтага ёсць нейкая неабходнасць", — падкрэсліў кіраўнік дзяржавы.

Дзейнасць рабочай групы знаходзіцца пад пастаянным кантролем Прэзідэнта. "Скажу шчыра, я не вельмі задаволены работай групы. Можа, я памыляюся, не ўсё бачу", — адзначыў Аляксандр Лукашэнка.

Прэзідэнт запатрабаваў актывізаваць работу групы, павысіць эфектыўнасць, павялічыць патрабаванні да адказных асоб. "Убачылі ў СМІ які-небудзь зварот групы нашых грамадзян або пачулі аб гэтым — неадкладна праверылі. Калі нехта не выпраўляе — дадзена каманда праваахоўным органам: наручнікі — і ў камеру. І няхай тады думаюць, як працаваць з народам", — сказаў кіраўнік дзяржавы.

Аляксандр Лукашэнка папярэдзіў, што маніторынг праблем будаўнічай галіны — гэта толькі пачатак. "І такім чынам пройдземся па ўсёй краіне, па ўсіх праблемных пытаннях, якія хвалююць людзей, пачынаючы з будаўніцтва і завяршаючы цэнаўтварэннем. Мы вымушаны прымаць радыкальныя меры, калі людзі не разумеюць, калі ім проста, зразумела, спакойна гавораць", — падкрэсліў кіраўнік дзяржавы.