Пра гэта стала вядома ўчора падчас пасяджэння Нацыянальнага савета па працоўных і сацыяльных пытаннях, якое прайшло ў Доме прафсаюзаў.
— Сёлета мы ўжо двойчы павышалі тарыфную стаўку першага разраду — у студзені і ў красавіку. Дзякуючы гэтаму сярэдняя зарплата работнікаў бюджэтнай сферы ў маі дасягнула 3,704 мільёна рублёў. А сярэдні заробак па краіне ўжо наблізіўся да адзнакі ў пяць мільёнаў. Каб крыху скараціць разрыў, і было прынята гэтае рашэнне, — патлумачыў намеснік міністра працы і сацыяльнай абароны Аляксандр Румак. — Сярод іншага, у наступным годзе мы плануем накіраваць на павышэнне зарплат бюджэтнікаў і тыя сродкі, якія былі атрыманы ў выніку аптымізацыі дзяржаўнага сектара.
Прыйдуць змены і ў сістэму аказання адраснай дапамогі. 115 тысяч чалавек атрымалі ў яе рамках ад пачатку года 191 мільярд рублёў. Што і казаць, грошы для бюджэту вялікія. Аднак некаторыя грамадзяне паступова прывыкаюць да дзяржаўных дапамог і зусім не імкнуцца зарабляць на хлеб самастойна, фактычна ператвараючыся ва ўтрыманцаў. Таму міністэрства працы і сацыяльнай абароны падрыхтавала праект указа, што абмяжоўвае падставы для выплаты штомесячнай дапамогі працаздольным людзям, якія адносіліся да катэгорыі занятых менш за шэсць месяцаў да даты звароту. Зрэшты, гэта будзе адносіцца і да хранічных беспрацоўных, якія адмаўляюцца ад працаўладкавання ці навучання азам новай прафесіі.
Рэформы закрануць і нядаўна зацверджаны ўрадам новы парадак аплаты бальнічных лістоў. Згодна з пастановай Савета Міністраў, першыя дванаццаць дзён непрацаздольнасці зараз аплачваюцца на 80%, а поўны заробак налічваецца толькі пасля гэтага тэрміну. Аднак такую сістэму моцна крытыкуюць прафсаюзы.
— Я не разумею, што ж такога здарылася ў грамадстве, што ў хворага чалавека трэба адняць дваццаць працэнтаў заробку? — заявіў старшыня Федэрацыі прафсаюзаў Беларусі Леанід Козік. — Мы ні ў якім разе не выступаем супраць гэтых новаўвядзенняў, калі чалавек страціў працаздольнасць па сваёй віне, напрыклад, у стане алкагольнага ці наркатычнага ап'янення. Аднак калі зімой на прадпрыемстве быў парушаны тэмпературны рэжым і работнік захварэў менавіта з-за гэтага, то ў чым ён вінаваты?
У сваю чаргу, першы віцэ-прэм'ер краіны Уладзімір Сямашка запэўніў, што да канца наступнага тыдня ўрад правядзе неабходныя кансультацыі па гэтым пытанні. Пасля іх нашумелую пастанову скарэктуюць альбо ўвогуле адменяць.
Валяр'ян ШКЛЕННІК.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.