Як выраслі прахадныя балы на матэматычных спецыяльнасцях у БДУ?

Рэкордныя паказчыкі зафіксаваны падчас сёлетняй прыёмнай кампаніі ў БДУ, Так, у параўнанні з папярэднім годам у Белдзяржуніверсітэце на 6,7% павялічылася колькасць ахвотных паступіць на дзённую бюджэтную форму навучання. І гэта на фоне змяншэння ў краіне агульнай колькасці і выпускнікоў школ, і абітурыентаў, якія праходзілі цэнтралізаванае тэсціраванне.

Сярэдні конкурс па ўніверсітэце склаў сёлета 1,7 чалавека на месца (у 2012 годзе — 1,5). Сярод абітурыентаў БДУ 128 пераможцаў міжнародных і рэспубліканскіх алімпіяд, у тым ліку 10 прызёраў міжнародных алімпіяд і 5 лаўрэатаў спецыяльнага фонду Прэзідэнта Рэспублікі Беларусь.

Акрамя таго, у конкурсе за права стаць студэнтам БДУ спаборнічаюць 598 "залатых" медалістаў (што на 22% перавышае паказчык папярэдняга года) і 1731 выпускнік ліцэяў і гімназій (што на 15,2% вышэй за леташні паказчык).

44,5%(!) прэтэндэнтаў на званне студэнта БДУ маюць сумарны бал (за тры сертыфікаты плюс сярэдні бал атэстата) больш як 300 балаў.

Асабліва ў Белдзяржуніверсітэце задаволеныя высокім конкурсам на прыродазнаўча-навуковыя спецыяльнасці. Напрыклад, конкурс на біялагічным факультэце склаў у бягучым годзе 1,7 чалавека на месца, на геаграфічным факультэце і факультэце радыёфізікі і камп'ютарных тэхналогій — 1,5, на факультэце прыкладной матэматыкі і інфарматыкі, механіка-матэматычным і хімічным факультэтах — 1,4. А самы высокі конкурс зафіксаваны ў БДУ на спецыяльнасцях, звязаных з дызайнам:"Камунікатыўны дызайн" — 10,8 чалавека на месца і "Дызайн прадметна-прасторавага асяроддзя" — 8,2.

Між іншым, у БДУ ўжо адбылося адкрытае залічэнне абітурыентаў на некаторыя факультэты. Так, на факультэце радыёфізікі і камп'ютарных тэхналогій сярэдні бал залічаных па конкурсе склаў 270
(у 2012 годзе — 237,) а сярэдні бал атэстата ў залічаных — 8,7. Самы высокі прахадны бал на гэтым факультэце быў зафіксаваны на спецыяльнасці "Камп'ютарная бяспека" — 302 (у 2012 годзе — 270). Крыху меншым быў прахадны бал на "Прыкладной інфарматыцы" — 277.

На геаграфічным факультэце сярэдні бал залічаных — 280, але, напрыклад, на спецыяльнасці "Геалогія і разведка радовішчаў карысных выкапняў" прахадны бал быў 329, на спецыяльнасцях "Геаграфія" (спецыялізацыя "геаінфармацыйныя сістэмы") — 310 і "Космааэракартаграфія" — 304.

У залічаных на эканамічны факультэт сярэдні бал склаў 346, а сярэдні бал атэстата — 9,5.

На механіка-матэматычным факультэце сярэдні бал быў 298, а сярэдні бал атэстата ў залічаных — 9,0. На спецыяльнасці "Матэматыка і інфармацыйныя тэхналогіі" прахадны бал склаў 317 (у 2012 годзе — 282), "Камп'ютарная матэматыка і сістэмны аналіз" — 314 (у 2012 годзе — 257), "Матэматыка" (эканамічная дзейнасць) — 285 (у 2012 годзе — 247), "Матэматыка" (навукова-канструктарская дзейнасць) — 272 (у 2012 годзе — 192), "Матэматыка" (навукова-вытворчая дзейнасць) — 263 (у 2012 годзе — 204), "Матэматыка" (навукова-педагагічная дзейнасць) — 251 па гарадскім конкурсе і 196 — па сельскім
(у 2012 годзе — 182), "Механіка і матэматычнае мадэляванне" — 251 (летась — 220).

Надзея НІКАЛАЕВА.