У трэці раз у Мірскім замку прайшоў Міжнародны гістарычны фестываль "Спадчына стагоддзяў". Па сваіх маштабах мірскі фестываль не мае аналагаў у Беларусі.
Мерапрыемства сабрала ўдзельнікаў з Беларусі, Расіі, Украіны, краін Заходняй Еўропы (Польшчы, Латвіі, Аўстрыі), а таксама Ізраіля і іншых краін. У Мір з'ехаліся найлепшыя клубы гістарычнай рэканструкцыі, выканаўцы сярэднявечнай і фолк-музыкі, майстры старадаўніх рамёстваў, шоу-групы — усяго каля 800 чалавек.
Гэта была не простая імітацыя рыцарскага турніру, расказваюць удзельнікі, а самая сапраўдная рэканструкцыя. Адраджалася ўсё дасканала да самых дробязяў: ад адзення і зброі да гербаў і імёнаў. Месца ў гэтай сярэдневяковай іерархіі знайшлося не толькі грозным рыцарам і чароўным дамам, але і простым сялянам, якія дапамагалі воінам (праўда, у бітвах не ўдзельнічалі).
Побач з рысталішчам — сапраўдны сярэдневяковы кірмаш. Блазаны адпускаюць жарты на пацеху публіцы, "манахі" тут жа прадаюць індульгенцыі, а самыя сапраўдныя кавалі, не адыходзячы ад горна, рамантуюць узбраенне рыцараў, а ў перапынку куюць для гасцей сувеніры.
Галоўная ідэя фестывалю — максімальна дакладна ўзнавіць карціну сярэднявечнага рыцарскага турніру і жыцця палявога лагера. Госці ўбачылі рэканструкцыю баёў і побыту ХІV — ХV стагоддзяў. У праграме былі кірмаш рамёстваў, сярэднявечныя гульні і танцы, музычныя канцэрты, пешы і конны турніры, стральба лучнікаў, масавыя баі. Фестываль сумясціў рэканструкцыю матэрыяльнай культуры рыцарскіх турніраў і поўнакантактныя баі па правілах, якія існавалі ў ХІV — ХV стст. У адрозненне ад пастановачных, такія паядынкі адрозніваюцца дынамізмам, захопліваюць гледачоў сваім азартам і непрадказальнасцю. Праграма завяршылася вогненным шоу і салютам. Лета для ўдзельнікаў рэканструктарскіх клубаў — самы гарачы сезон. Наступны буйны фестываль адбудзецца на Міншчыне — у гонар перамогі ў Грунвальдскай бітве.
Антон ЗАПОЛЬСКІ.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.
