Вы тут

ФАКТЫ, ПАДЗЕІ, НАВІНЫ


Чорны дзень Белага возера

Удзень у нядзелю на возеры Белае, што ў Жыткавіцкім раёне, загінула пяць чалавек. З іх трое — хлопчыкі ва ўзросце чатырох, пяці і сямі гадоў. Глыбіня возера ў месцы, дзе перакулілася лодка, прыблізна 10 метраў, а адлегласць да берага — каля 200.

Як расказала афіцыйны прадстаўнік упраўлення Следчага камітэта па Гомельскай вобласці Марыя Крываногава, Жыткавіцкі раённы аддзел Следчага камітэта Рэспублікі Беларусь завёў крымінальную справу ў дачыненні да 40-гадовага жыхара Жыткавіч па прыкметах злачынства, прадугледжанага ч. 2 арт. 316 УК Рэспублікі Беларусь (парушэнне правіл бяспекі руху і эксплуатацыі маламерных суднаў асобай, якая кіруе суднам, што пацягнула па неасцярожнасці смерць чалавека).

Падчас папярэдняга следства высветлена, што гэты грамадзянін, знаходзячыся ў стане алкагольнага ап'янення, кіраваў дзюралевай маторнай лодкай "Прагрэс" на возеры Белае каля вёскі Баравая Жыткавіцкага раёна. У лодцы знаходзілася дзевяць пасажыраў. Яшчэ адзін чалавек перавозіўся ў надзіманым балоне для катання, так званай "таблетцы", якая буксіравалася з дапамогай вяроўкі. У нейкі момант, на віражы, кіроўца не справіўся з лодкай. Маламернае судна перакулілася і затанула. У выніку здарэння загінулі трое дзяцей, 32-гадовая маці старэйшага з іх (усе — жыхары Салігорска) і яшчэ 30-гадовая жыхарка Жыткавіч. На месцы здарэння працавалі супрацоўнікі МНС, Таварыства выратавання на вадзе, следча-аператыўная група Жыткавіцкага аддзела СК сумесна з супрацоўнікамі абласнога і цэнтральнага апарата Следчага камітэта Рэспублікі Беларусь, аператыўная група УУС Гомельскага аблвыканкама.

Зараз знойдзены ўсе целы загінулых. Маламернае судна канфіскавалі для правядзення экспертызы. Пры правядзенні першапачатковых следчых дзеянняў з боку кіроўцы лодкі выяўлены шэраг парушэнняў, у тым ліку: маторная лодка не была зарэгістравана ў вызначаным парадку і не была разлічана на такую колькасць чалавек, усе пасажыры знаходзіліся без выратавальных камізэлек.

У прэс-службе Гомельскага абласнога ўпраўлення МНС дадаюць, што тых, хто выжыў, выратавалі відавочцы няшчаснага выпадку, якія апынуліся побач на дзвюх маторных лодках. На жаль, дапамагчы астатнім яны не змаглі. Безвыніковымі былі і рэанімацыйныя мерапрыемствы, што праводзіліся жанчыне, якую без прыкмет жыцця вынялі з вады амаль адразу пасля аварыі.

Зараз кіроўца маторнай лодкі затрыманы і дае паказанні. Санкцыямі інкрымінаванага яму злачынства прадугледжана пакаранне да 7 гадоў пазбаўлення волі.

Першыя тысячнікі-камбайнеры

У Гомельскай вобласці ўшанавалі камбайнераў, якія з пачатку жніва намалацілі больш за тысячу тон збожжа.

У прыватнасці, першыя экіпажы-тысячнікі з'явіліся ў Брагінскім раёне. Такога высокага паказчыка ў рэгіёне ўжо дасягнулі два экіпажы камбайнераў ААТ "Чамярыскі" ў складзе Рыгора і Аляксея Сніцарэнкаў, а таксама Міхаіла і Вячаслава Салдаценкаў. Першую тысячу тон збожжа хлебаробы намалацілі вечарам у нядзелю. Каштоўнымі падарункамі камбайнераў-тысячнікаў аддзячыла кіраўніцтва Гомельскага аблвыканкама, абласнога прафсаюза АПК. Віншаванні з першай тысячай новага збожжа прыняў і экіпаж-тысячнік КСУП "Агракамбінат "Холмеч" Рэчыцкага раёна. У яго склад уваходзяць старшы камбайнер Васіль Каваль і камбайнер Віталь Ільеў. Хлебаробы працуюць на камбайне "Lехіоn-760", і на ўчарашнюю (15.07) раніцу яны намалацілі больш за 1211 тон збожжа.

Ірына АСТАШКЕВІЧ.

Вада трапіла нават у метро

У мінулую суботу на сталіцу абрынуўся моцны дождж, што прывяло да сур'ёзных наступстваў.

З 11.10 да 12.15 было зарэгістравана выпадзенне амаль 54 мм ападкаў пры сярэднямесячнай норме 90 мм. У выніку падтапленняў глыбінёй да 35 см на сямі ўчастках дарог рух 21-га тралейбуснага маршрута спыніўся на час ад 40 хвілін да трох гадзін. Па інфармацыі Мінскага гарадскога ўпраўлення МНС, былі падтоплены тры прыватныя жылыя дамы па вуліцы Валгадонскай (узровень вады ў жыллі склаў 20 см). Эвакуацыя не праводзілася. Вада трапіла на станцыі метро "Парк Чалюскінцаў" і "Усход". Праўда, спынення руху электрацягнікоў не было. Работнікі МНС эвакуявалі з легкавога аўтамабіля па вуліцы Гало на сухі ўчастак мясцовасці двух чалавек. "Шкода" заглохла ў вадзе (узровень вады склаў 35 см). У машыне былі кіроўца 1983 года нараджэння і яго сын 2004 года нараджэння. Яны не пацярпелі.

Сяргей РАСОЛЬКА.

Будзе Дзень рыбака

У Беларусі плануюць узаконіць свята прафесіяналаў і аматараў рыбнай лоўлі — Дзень рыбака. Пра гэта паведаміў карэспандэнту БелТА прадстаўнік рэспубліканскага дзяржаўна-грамадскага аб'яднання "Беларускае таварыства паляўнічых і рыбаловаў" Сяргей Дарашэвіч па выніках пленуму РДГТ.

Дзень рыбака быў заснаваны ў канцы 1960-х гадоў указам Прэзідыума Вярхоўнага Савета СССР, нагадаў Сяргей Дарашэвіч. З тых часоў у многіх краінах былога СССР ён штогод адзначаецца кожную другую нядзелю ліпеня. "У Беларусі пасля распаду СССР Дзень рыбака адзначаўся нефармальна, цяпер свята атрымала другое жыццё", — дадаў Сяргей Дарашэвіч, адзначыўшы, што раней у БТПР не раз паступалі прапановы ад супрацоўнікаў рыбалоўных прадпрыемстваў і простых рыбакоў адрадзіць свята. Цяпер у мэтах папулярызацыі свята таварыства распрацоўвае план рыбалоўных мерапрыемстваў на бліжэйшыя гады. У перспектыве Дню рыбака плануюць надаць статус афіцыйнага прафесійнага свята. Адпаведную прапанову БТПР накіруе ў Савет Міністраў.

"Дзень рыбака — душэўнае свята, якое збірае разам прафесійных рыбакоў, супрацоўнікаў рыбаводных прадпрыемстваў, простых аматараў рыбалкі", — дадаў Сяргей Дарашэвіч.

...І раптам ударыла маланка

У Кармянскім раёне на рацэ Сож двое рыбакоў лавілі рыбу з металічнай лодкі з маторам. Сталі чутнымі далёкія грымоты, і хмары пачыналі згушчацца, але ў месцы, дзе яны рыбачылі, была ясная пагода.

Адзін з рыбакоў стаяў у лодцы, а другі сядзеў у ёй. Раптам ударыла маланка, — у рыбака, які стаяў. Яго выкінула з лодкі ў ваду. Відавочцы падплылі да пацярпелых на сваёй лодцы і аказалі першую медыцынскую дапамогу. Але ж мужчына памёр па дарозе ў бальніцу.

Падчас купання ў адным з гомельскіх вадаёмаў загінуў чацвёртакласнік. Як расказаў прэс-сакратар Гомельскага абласнога ўпраўлення МНС Руслан Габрылёў, трое падлеткаў вырашылі выкупацца ў возеры каля алеі Закаханых. Пры гэтым пачалі скакаць у ваду з моста. Затым два хлапчукі — родныя браты — адышлі пагутарыць з сябрамі. Трэці застаўся скакаць адзін. Калі дзеці вярнуліся, яны не знайшлі таварыша. Пры гэтым яго вопратка ляжала на беразе. Хлапчукі падбеглі да мінака і расказалі пра здарэнне, а мужчына патэлефанаваў у МНС. Па папярэдніх звестках, дзіця скокнула з моста і стукнулася галавой аб апору. Траўма не дазволіла падняцца на паверхню вады. Цела хлопчыка з дна вадаёма паднялі вадалазы Таварыства выратавання на вадзе.

Ірына АСТАШКЕВІЧ.

Выбар рэдакцыі

Грамадства

Дыета ад хандры. Што жаваць, каб не перажываць

Дыета ад хандры. Што жаваць, каб не перажываць

«Сумныя» прадукты — прэч з халадзільніка!

Грамадства

«Сталінскі праспект мы называлі брадвеем». Як і чым жылі беларускія стылягі

«Сталінскі праспект мы называлі брадвеем». Як і чым жылі беларускія стылягі

Пасля смерці Сталіна «жалезная заслона», якая аддзяляла Савецкі Саюз ад навакольнага свету, прыадчынілася.

Калейдаскоп

Усходні гараскоп на наступны тыдзень

Усходні гараскоп на наступны тыдзень

АВЕН. Неабходна будзе сканцэнтраваць намаганні на рабоце.

Грамадства

Прынцып Інэсы Караткевіч: цаніць кожную хвіліну

Прынцып Інэсы Караткевіч: цаніць кожную хвіліну

«Ні разу не пашкадавала, што прыйшла працаваць у такую ўнікальную структуру, як спажыўкааперацыя»