Вы тут

СУБОТНІК


Вясёлы слоўнік

Абабіць — ажаніць
Абабраць — злавіць бабра
Аблюбаваць — ажаніцца з Любай
Ацяпляць — рабіць абы-як
Вытрымаць — аб'явіць парадзісе аб нараджэнні тройні
Гуляш — лайдак
Закранаць — закручваць кран
Замарыцца — летуценіць
Кавалак — аматар кавы
Кратар — турэмшчык
Крыжаванка — могілкі
Лапацець — абуваць у лапці
Марылка — летуценніца
Матляць — брыдкасловіць
Пад'ёмнік — прапаршчык
Памылка — пральная машына
Папсаваць — слухаць сучасную музыку
Паядынак — застолле
Перапалка — шлагбаум
Пітон — п'янтос
Пляжыць — адпачываць каля мора
Правадыр — ДАІшнік
Прынос — пенснэ
Самацёк — час
Спадчына — страта пасады
Трапаць — садзіцца ў самалёт
Трыбунал — лектар
Трыбух

— трыа барабаншчыкаў
Хахаль — весялун
Цягнік — злодзей
Чыннік — кар'ерыст
Шыбаваць — шкліць вокны
Ялавец — рыбак-хвалько
Ярома — сталіца Італіі

Заўважыў Міхась ДУБОВІК,

Бярэзінскі раён, в. Арэшкавічы.

Барыс КАВАЛЕРЧЫК

Па-сваяцку

Гумарэска

Дрэнна, калі ў працоўным калектыве ўзнікаюць службовыя звадкі, калі адзін начальнік на месца другога меціць. Калі, напрыклад, галоўны інжынер капае пад дырэктара — і, вядома ж, не рыдлёўкай... Калі намеснік галоўнага бухгалтара з інтарэсам паглядае на крэсла шэфа.

А вось у нас на прадпрыемстве вельмі цёплыя адносіны. Іх нават сваяцкімі можна назваць. Ды і як інакш, калі ў намесніках у нашага дырэктара Івана Данілавіча родны брат яго жонкі ходзіць, а стрыечны — галоўным інжынерам працуе.

Шмат сваякоў і ў бухгалтэрыі ды іншых аддзелах, і ўсе яны дастойныя месцы займаюць. Апроч стрыечнага брата, сын яго Пётр Іванавіч тэхнічны аддзел узначальвае, дачка Машачка на кадрах сядзіць.

Вось толькі цешча Івана Данілавіча даўно на пенсіі і таму без працы. Але ж і яна кіруе — па тэлефоне: то загадае машыну прыслаць, каб у краму ці на рынак з'ездзіць, то з лецішча тэрмінова агуркі прывезці.

Каштоўныя ўказанні атрымлівае Іван Данілавіч і дома. Гэта адразу відаць, бо ён жа вой які смелы — гатовы горы звярнуць! А іншыя дні сядзіць ціхенька як тая мыш, што ад ката хаваецца. Зразумела, што жонка ды цешча з пасады яго не звольняць, але ж вымовы даюць. І, відаць, строгія.

А наогул, усё ў нашай фірме як мае быць. Асабісты вадзіцель Івана Данілавіча пачаў да яго дачкі заляцацца — парадніцца хоча. А чаму б і не: надакучыла, пэўна, абаранак круціць, а тут у нас неблагія вакансіі з'явіліся.

Толькі ў прыёмнай сакратарка Аксаначка, хоць нікому не сваячка, але такую адказную пасаду ўжо некалькі гадоў займае. Вельмі сімпатычная дзяўчына! Вы б толькі бачылі, якая ў яе фігура!

У апошні час і я пачаў усур'ёз задумвацца пра тое, што сорамна ў мае сорак у звычайных інжынерах хадзіць. Ды і родная сястра Івана Данілавіча летась аўдавела. Не буду ўтойваць: Аксаначка мне больш падабаецца. Але як на гэта паглядзіць Іван Данілавіч? Ён, як мне падаецца, і сам ахвотна б з ёй парадніўся, каб не жонка і цешча. А што датычыцца майго халасцяцкага жыцця, дык чаго дзеля пасады не зробіш? Можна адзін раз і жаніцца. Затое ўсё па-сваяцку будзе!..

г. Гомель.

Думкі ўголас

Злодзей — ананім, ды сляды — услед за ім.
Дзе гарэлка паваліла, там і спаць міла.
Спатыкнуўся конь, а разбіўся коннік.
Вушанка задумала, а валёнкі вінаватыя.
І сонны кракадзіл –– не бервяно.
Разумны і жалейку паслухае, дурному і барабан не ўказ.
Страчанае шчасце доўга аклікае.
Надзей –– мора, дасягненняў –– ручай.
Кашалёк ненаедны.
Шлях прамы, але ж па балоце.
Хамут вязе, а дуга цешыцца.
Не ўсе вежы ў Вавілоне.
І шыпшына вучыць, і крапіва.
Прачытала вогнішча ліст.
Вучыць кульгавы хадзіць прама.
Не рака шырокая, а мост кароткі.
Упоперак дарогі і адзін сабака –– перашкода.
Пеўню сніцца, што злавіў сініцу.
А ён без няні і ў акно не гляне.
Бачыш дзіва хвіліну, а памятаеш стагоддзе.

Барыс БЕЛЯЖЭНКА,

г. Віцебск.

Міхась СЛІВА

УСМЕШКІ

Улоў

Сустрэліся два мужыкі.

— Ну, як прайшла рыбалка? — пытае адзін у другога.

— Нармальна: учора — больш за тры кілаграмы, сёння — два прамілі...

Сіла волі

Размаўляюць два знаёмыя:

— Ты курыш?

— Не, месяц як кінуў і цяпер у рот не бяру — сіла волі...

— У мяне таксама... Год на працу не хаджу — і не цягне!

Выбар рэдакцыі

Грамадства

Дыета ад хандры. Што жаваць, каб не перажываць

Дыета ад хандры. Што жаваць, каб не перажываць

«Сумныя» прадукты — прэч з халадзільніка!

Грамадства

«Сталінскі праспект мы называлі брадвеем». Як і чым жылі беларускія стылягі

«Сталінскі праспект мы называлі брадвеем». Як і чым жылі беларускія стылягі

Пасля смерці Сталіна «жалезная заслона», якая аддзяляла Савецкі Саюз ад навакольнага свету, прыадчынілася.

Калейдаскоп

Усходні гараскоп на наступны тыдзень

Усходні гараскоп на наступны тыдзень

АВЕН. Неабходна будзе сканцэнтраваць намаганні на рабоце.

Грамадства

Прынцып Інэсы Караткевіч: цаніць кожную хвіліну

Прынцып Інэсы Караткевіч: цаніць кожную хвіліну

«Ні разу не пашкадавала, што прыйшла працаваць у такую ўнікальную структуру, як спажыўкааперацыя»