Недапаступленні ў рэспубліканскі бюджэт будуць кампенсавацца за кошт другасных патрэб
Пра гэта на прэс-канферэнцыі па выніках сацыяльна-эканамічнага развіцця краіны за І паўгоддзе 2013 года журналістам паведаміў намеснік міністра фінансаў РБ Максім ЕРМАЛОВІЧ. Па яго словах, зараз каля 13 трыльёнаў рублёў у дзяржаўным бюджэце не падмацавана прыбыткамі. Для таго, каб сёлета не дапусціць дэфіцыту бюджэту, Мінфін прыме шэраг мер. Сярод іх — скарачэнне непершачарговых выдаткаў, выманне часткі прыбытку дзяржаўных прадпрыемстваў, увядзенне ў зварот вытворчых пляцовак, якія выкарыстоўваюцца неэфектыўна.
У сваю чаргу, намеснік міністра эканомікі Беларусі Аляксандр ЯРАШЭНКА ахарактарызаваў сённяшнюю сітуацыю ў эканоміцы як "няпростую", але пры гэтым зазначыў, што хапае як пазітыўных момантаў, так і праблемных. Па яго словах, айчынная эканоміка прайшла "кропку перагібу": апошнім часам тэмпы росту ВУП Беларусі няўхільна зніжаліся і за першыя 5 месяцаў гэтага года склалі ўсяго 1,1%. Зараз жа зноў назіраецца рост: за І паўгоддзе ён дасягнуў 1,4%. Апераджальнымі тэмпамі, калі параўноўваць з прагнозамі, расце і прадукцыйнасць працы: за 5 месяцаў — на 2,6%.
Што датычыцца інвестыцый, то паказчык уласнага інвеставання таксама знізіўся. Зараз ён знаходзіцца на ўзроўні 108,8% ад узроўню аналагічнага леташняга перыяду. Аднак выключна пазітыўна такую лічбу ацаніць нельга, з-за істотнага зніжэння ўзроўню інвеставання летась. А вось колькасць замежных інвестыцый у беларускую эканоміку ўзрасла ажно ў 2,5 раза і дасягнула 1 543,3 мільёна долараў. Аляксандр Ярашэнка спадзяецца, што да канца года сума замежных інвестыцый перавысіць лічбу ў 2 мільярды долараў, у першую чаргу — за кошт супольных з іншымі краінамі прадпрыемстваў у сферы дрэваапрацоўкі і машынабудаўніцтва.
Экспарт беларускіх тавараў за мяжу знізіўся да 79,1% у параўнанні з перыядам студзеня—мая 2012 года, імпарт — да 89,1%. Па параметрах эканамічнай бяспекі Беларусь застаецца на стабільным узроўні: сумарная знешняя дзяржпазыка складае 12,4 мільярда долараў, або 18% ВУП. Парог бяспекі звычайна ацэньваецца як 25% ВУП. Унутраная дзяржпазыка захоўваецца на ўзроўні, далёкім ад парогу бяспекі.
Максім Ермаловіч таксама падкрэсліў, што мадэрнізацыя дзяржпрадпрыемстваў не фінансуецца з рэспубліканскага бюджэту, а праводзіцца за ўласныя сродкі прадпрыемстваў. Па яго словах, недапушчэнне дэфіцыту бюджэту і барацьба з інфляцыяй зараз з'яўляюцца прыярытэтнымі накірункамі эканамічнай палітыкі Беларусі.
Таксама намеснік міністра распавёў пра алгарытм атрымання сродкаў, які можа быць выкарыстаны ў дачыненні да вытворчых пляцовак, якія выкарыстоўваюцца неэфектыўна (адпаведныя змены плануецца ўнесці ў Падатковы кодэкс). Ён паведаміў, што зараз у краіне вельмі шмат памяшканняў, якія прастойваюць або, у лепшым выпадку, здаюцца ў арэнду. Хутчэй за ўсё, падатак на такія плошчы будзе павышаны, а ўладальнікам будзе прапанавана збыць плошчы пастаянным арандатарам па рынкавым кошце. У выніку адмовы арандатара ад набыцця памяшканні будуць выстаўляцца на аўкцыён. Эфект такіх мерапрыемстваў па словах спадара Ермаловіча, не фіскальны, а эканамічны, бо гэта створыць матэрыяльна-тэхнічную базу для развіцця малога і сярэдняга бізнесу.
Яраслаў ЛЫСКАВЕЦ
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.