Неадольнае


У міфалогіі і фальклоры беларусаў вобразы птушак-птахаў маюць самыя розныя значэнні. Яны — сімвалы душы, духу жыцця, узнёсласці, волі, цыклаў дня, года, перыядаў чалавечага веку і г.д. Пашырана ў народных песнях увасабленне ў птушках дзяўчыны і хлопца, прычым спатканне якіх не заўсёды абяцае радасць: "Шэрая зязюлька, не ляці рана ў поле, бо там злове саколе..." У вершы Д. Бічэль "Чародка" яшчэ больш супярэчлівасці і напружання: веснавыя птахі, што "купаюцца высока між блакіту", сімвалізуюць маральную перашкоду ў адносінах паміж закаханымі. Гэта адчуванне розніцы ў гадах, нежаданне ахвяраваць воляю?.. Гама патаемных перажыванняў, сумятлівасць душы лірычнай гераіні паэтка перадае тонка і далікатна, у прыватнасці — праз рэфрэн, што абрываецца ў канцы верша: сіла кахання, мусіць жа, неадольная!

Данута Бічэль
Чародка
Злучыла нас вясна
лукой адною.
Чародка птахаў
між табой і мною.

Прагнаць бы неслухмяную
чародку
за бор усхваляваны,
за паводку!
Купаюцца высока між блакіту.
А ты ідзеш да сонейка...
Які ты
прасветлены бязвоблачнымі
днямі!

Але чародка птахаў
паміж намі.

Адразу нешчаслівы і шчаслівы.
Адразу і распусны і цнатлівы,
так рызыкоўна —
смелы і нясмелы —
мне пасылаеш
маладыя стрэлы.
Узбунтаваў душу,
нібы цунамі.

Але чародка птахаў
паміж намі.

Прыкінуўся вясёлым панямонцам,
маім невыпадковым абаронцам.
Упарта наравістая адвага
у клетку рук злавіла
сэрца-птаха...
І замаўляеш вуснамі дрыготка...
Але чародка...

Выбар рэдакцыі

Грамадства

Дыета ад хандры. Што жаваць, каб не перажываць

Дыета ад хандры. Што жаваць, каб не перажываць

«Сумныя» прадукты — прэч з халадзільніка!

Грамадства

«Сталінскі праспект мы называлі брадвеем». Як і чым жылі беларускія стылягі

«Сталінскі праспект мы называлі брадвеем». Як і чым жылі беларускія стылягі

Пасля смерці Сталіна «жалезная заслона», якая аддзяляла Савецкі Саюз ад навакольнага свету, прыадчынілася.

Калейдаскоп

Усходні гараскоп на наступны тыдзень

Усходні гараскоп на наступны тыдзень

АВЕН. Неабходна будзе сканцэнтраваць намаганні на рабоце.

Палітыка

Аляксандр Лукашэнка: Беларусы былі і будуць адным народам

Аляксандр Лукашэнка: Беларусы былі і будуць адным народам

Прэзідэнцкі прыём праходзіць у Нацыянальным выставачным цэнтры «БелЭкспа».