Жывая зямля

Вярблюду мянушку дадуць на конкурснай аснове

У Магілёўскім заасадзе з'явіўся новы жыхар — двухгорбы вярблюд. Ён паходзіць з Казахстана, а набыць яго ўдалося ў Маскве з дапамогай сталічнага прадпрымальніка.

Пакуль вярблюд безыменны. Вырашана, што мянушку яму дадуць на конкурснай аснове навучэнцы прафесійнага агралесатэхнічнага каледжа (аграгарадок Буйнічы Магілёўскага раёна)

, для якіх заасад з'яўляецца навучальна-вытворчай пляцоўкай.

— Мы аб'явім конкурс 1 верасня і праз тыдзень вызначымся, — сказаў дырэктар каледжа Георгій Маліноўскі. — Гэта наш першы вярблюд, трэба яго назваць прыгожа. Дзеці ў нас вельмі творчыя, так што цікавых варыянтаў будзе шмат.

Вярблюду яшчэ толькі год. У будучыні яму плануюць набыць і сяброўку. У заасадзе гавораць, што вярблюду наш клімат добра падыходзіць: гэтая жывёліна можа вытрымліваць не толькі спякоту, але і моцны мароз.

Ілона Іванова

Невядомы звярок, падобны на янота, знойдзены ў Лацінскай Амерыцы

Спецыялісты далі яму імя АЛІНГІТА. Гэта новы від млекакормячых, якога больш за 100 гадоў таму памылкова прымалі за падобнага на яго алінга. Даследнікі выявілі алінгіта ў горных лясах Калумбіі. Жывёла адносіцца да сямейства янотавых, мае памеры янота і пысу плюшавага мішкі. Даследнікі з Смітсанаўскага інстытута ў Вашынгтоне вывучылі зубы, чэрап і скуру дзіўнага звярка і пацвердзілі, што гэта — першы выяўлены ў Новым свеце за 35 гадоў новы від драпежных жывёл.

Сяргей КУРКАЧ