Вы тут

Прыбярэмся ўсім светам


У суботу 14 верасня адбудзецца міжнародная акцыя «Сусветная прыборка — 2013. Зробім!» — своеасаблівы суботнік, што аб'яднае мільёны людзей з розных краін свету, якія хочуць зрабіць нашу планету больш чыстай. У Беларусі яна пройдзе ўжо другі раз. Правядзенне акцыі падтрымліваецца Міністэрствам прыродных рэсурсаў і аховы навакольнага асяроддзя.

Міжнародная акцыя «Сусветная прыборка» праводзіцца ў свеце з 2008 года. Традыцыйна ў 90 краінах валанцёры прыбіраюць ад хламу лясы, берагі рэк і вадаёмаў, зоны адпачынку.

1379021635690_13-11

Як удакладняе дырэктар Цэнтра экалагічных рашэнняў Яўген ЛАБАНАЎ, акцыя носіць добраахвотны характар і не з'яўляецца цэнтралізаванай. Гэта значыць, што кожны можа выступіць яе арганізатарам у сваім рэгіёне — горадзе, пасёлку школе, або двары.

Летась у акцыі ўпершыню прынялі ўдзел і беларускія валанцёры. Так, напрыклад, ініцыятыўная група Мінскага веласіпеднага таварыства разам з кіраўніком фонду «Экалагічны транспарт» Джонам Росманам збіралі смецце каля ракі Нёман.

Дарэчы, калі пытаешся ў Джона, адкуль ён, хлопец толькі ўсміхаецца: «Нарадзіўся ў Нью-Ёрку, шмат гадоў пражыў у Расіі, ужо
5 гадоў жыву ў Мінску. Так што цяпер я адсюль»... Калі Джон з сябрамі едуць на роварах на прыроду, ён заўсёды бярэ з сабой пакеты для смецця, каб прыбраць у лесе. «У Мінску вельмі добра прыбіраюць вуліцы, і смецця на іх нашмат менш, чым у Нью-Ёрку», — гаворыць ён. Але сітуацыя з прыгараднымі лесапалосамі іншая.

1379021637612_13-12

Як лічаць эксперты, з'яўленне несанкцыянаваных звалак — вялікая праблема для Беларусі, і звязана яна з банальнай чалавечай лянотай, непавагай да прыроды і іншых людзей, якія, верагодна, таксама захочуць адпачыць на гэтым месцы. Калі ставіцца адзін да аднаго больш культурна і паважліва, правільна паводзіць сябе на прыродзе, праблема звалак знікне, а ў падобных акцыях не будзе патрэбы. Але пакуль такая патрэба ёсць. Таму далучайцеся да глабальнага суботніка!

Як гэта зрабіць?

1) Выбіраеце месца для прыборкі (засмечаная лесапаркавая зона, бераг вадаёма, месца адпачынку і г.д.) і прызначаеце час. Пажадана, каб дабрацца да гэтага месца было лёгка — на веласіпедзе або на грамадскім транспарце.

2) Знаходзіце аднадумцаў сярод сваіх знаёмых, аднакурснікаў, аднакласнікаў, суседзяў, сяброў. Падумайце загадзя пра тое, колькі людзей вам трэба для эфектыўнай прыборкі: важна, каб усім удзельнікам знайшлася праца.

3) Купляеце мяшкі для смецця (лепш вялікіх памераў — на 100 літраў і больш), рабочыя баваўняныя пальчаткі, пашукайце інвентар (калі трэба).

4) У названы час выходзіце на прыборку. У залежнасці ад колькасці сабранага смецця вы можаце альбо забраць яго з сабой да бліжэйшага стацыянарнага кантэйнера, альбо дамовіцца з мясцовымі камунальнымі арганізацыямі аб дапамозе ў яго вывазе. Вы можаце таксама звярнуцца ў вашу раённую (гарадскую) інспекцыю прыродных рэсурсаў і аховы навакольнага асяроддзя па дапамогу ў арганізацыі вывазу сабранага смецця.

Калі ёсць жаданне і магчымасць, збірайце асобна пластыкавае смецце (ПЭТ-бутэлькі) і шкло. Гэта дасць магчымасць выкарыстоўваць частку адходаў як другасную сыравіну.

5) Раскажыце пра сябе! Пасля правядзення акцыі дасылайце фотаздымкі і кароткую інфармацыю пра свой лакальны суботнік на sdеlаеm@есоіdеа.bу. А калі вы дашляце кароткае апісанне сваёй акцыі і фота ў нашу газету, мы апублікуем яго ў адным з бліжэйшых нумароў.

ДАРЭЧЫ

Цэнтр экалагічных рашэнняў у дзень акцыі арганізуе прыборку на Заслаўскім вадасховішчы пад Мінскам. Прыборка стартуе 14 верасня ў 12:00 у прыбярэжнай зоне Заслаўскага вадасховішча, недалёка ад дамбы і лодачнай станцыі (яхт-клуб).

Да 12 гадзін арганізатары будуць чакаць усіх ахвотных на станцыі, пад сцягам «Зробім!». Калі вы заблудзілі, можаце экстранна звязацца па тэлефоне +37529 1886973 з арганізатарамі.

Прыборка будзе праходзіць прыблізна да 15:00. Пасля яе будзе арганізавана сумеснае чаяванне з супрацоўнікамі і валанцёрамі Цэнтра экалагічных рашэнняў. Не прапусціце магчымасць добра правесці час і прагуляцца на Мінскае мора!

Р.S. Калі ў вас ёсць пытанні па арганізацыі прыборак, звяртайцеся ў Грамадскі інфармацыйны цэнтр па пытаннях хімічнай бяспекі і адходаў па тэлефоне +375 17237 40 70.

Святлана БУСЬКО.

Выбар рэдакцыі

Грамадства

Дыета ад хандры. Што жаваць, каб не перажываць

Дыета ад хандры. Што жаваць, каб не перажываць

«Сумныя» прадукты — прэч з халадзільніка!

Грамадства

«Сталінскі праспект мы называлі брадвеем». Як і чым жылі беларускія стылягі

«Сталінскі праспект мы называлі брадвеем». Як і чым жылі беларускія стылягі

Пасля смерці Сталіна «жалезная заслона», якая аддзяляла Савецкі Саюз ад навакольнага свету, прыадчынілася.

Калейдаскоп

Усходні гараскоп на наступны тыдзень

Усходні гараскоп на наступны тыдзень

АВЕН. Неабходна будзе сканцэнтраваць намаганні на рабоце.

Грамадства

Прынцып Інэсы Караткевіч: цаніць кожную хвіліну

Прынцып Інэсы Караткевіч: цаніць кожную хвіліну

«Ні разу не пашкадавала, што прыйшла працаваць у такую ўнікальную структуру, як спажыўкааперацыя»